Rares foi titular por primeira vez en Terceira co Racing

A décima xornada da Terceira non estivo do lado dos equipos lucenses. Só o Polvorín e o Racing Villalbés conseguiron puntuar. Fixérono por medio dun empate en cadanseus partidos. Aínda así, a fin de semana deixou a primeira titularidade de Rares co primeiro equipo do Racing. E máis protagonistas nos #LucensesNaTerceiraGalega.

Primeiro marcar, logo titular:

Dez xogadores da provincia participaron no duelo da Porta Santa entre o Paiosaco e o Racing Villalbés. Coa primeira titularidade para o xuvenil Rares Mezdrea. O futbolista vilalbés xa sabe o que marcar en Terceira (fíxoo o curso anterior) e xogar minutos nesta tempada. Pero foi a primeira vez que saíu no once inicial do conxunto chairego. O Racing igualou a dous goles. López marcou o seu segundo en toda a traxectoria como xogador sénior racinguista. Cuadrado sumou o seu quinto gol da tempada. Entre el e Santi Gegunde suman dez goles. A parella lucense só é superada en número de goles en toda a categoría pola do Somozas formada por Pablo Rey e Luis Nuño.

Os triunfadores:

O Somozas volveu ao camiño da vitoria ante o As Pontes. Venceu pola mínima e tivo maior presenza Aldán Naval. Entrou xa o comezo da segunda metade. O viveirense entrou no campo xunto con Alberto Novoa. Substituíron a David Rojo e a Juan Martínez. O cadro de Ferrolterra conseguiu o gol da vitoria precisamente no segundo acto.

O Fabril tamén foi un dos triunfadores da xornada co seu triunfo en Fisterra. Venceu pola mínima (1-2) con Diego Villares xogando todos os minutos. No conxunto local Ramón volveu ser titular. Enlazou o seu cuarto encontro seguido baixo paus.

O Silva conseguiu a segunda vitoria da tempada antes de visitar ao Vilalbés. Xusto xogou todo o encontro como titular ante o Arzúa. No cadro arzúan ningún dos lucenses foi da partida. Álex Vázquez entrou no minuto 70. Brais Prieto non tivo minutos. E Pedro Delgado non puido xogar por cumprir o seu segundo partido de sanción. Aínda lle queda un máis. O duelo foi arbitrado por Jesús López Fernández. O colexiado estivo asistido por Adrián López Bermúdez e Gabriel Polo Fraga.

O partido con máis lucenses:

Catorce lucenses participaron na derrota do Viveiro ante o Bergan. Volveron ter minutos os xuvenís Luis Pernas e Xoel Trasancos. Os dous por segunda vez na tempada. A participación de Xoel é por segunda xornada seguida. O monfortino Iago volveu á convocatoria do cadro de Carballo aínda que non dispuxo de minutos. As condicións do campo e o resultado favorable permitiron que Iago non forzase. Non obstante, o central xa adestra co grupo que prepara Lemos.

Catro xogadores da provincia no Polvorín 0-0 Estudiantil. Ángel Fraga repetiu titularidade e o capitán Marcos González entrou no segundo tempo.

Empates lucenses no sur:

No grupo B non gañou ningún dos seis primeiros clasificados. E nesas posicións camiñan os equipos que contan con lucenses nos seus cadros de xogadores. O Arousa mantese de líder. Empatou sen goles ante o copeiro Ribadumia. Martín López Ross volveu ser da confianza de Rafa Sáez e xogou todo o encontro.

Non aproveitou o resultado o Arenteiro. Os pupilos de Fran Justo seguen na segunda praza. Igualaron tamén a un gol ante o Rápido de Bouzas. O vilalbés Víctor Eimil foi convocado pero non gozou de minutos. O encontro do Espiñedo tivo trío lucense. Iván Abel Bruzos dirixiu o encontro asistido nas bandas por Alberto Blanco Méndez e Jesús Adán Gallego.

Pola súa banda, o Choco é quinto clasificado e empatou o seu cuarto encontro seguido. Non foi da partida Alberto Suárez. O mediocentro lucense non puido xogar por molestias físicas. Probablemente sexa baixa ata o inicio do 2020. O ‘6’ era un dos fixos do once de Gonzalo Fernández.

Imagen por defecto
Iván Calaza
Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.
Artículos: 467

Deja un comentario