ÓL: Ao principio pensabas que non ía ser moi complicado, pero cando ves que comezan a chegar facturas, débedas, reclamacións dos cartos que se debían e que chegabas a xullo e a Federación reclamaba débedas que se non as pagabas non se podía inscribir ao equipo, que en ocasións non tiña xogadores inda a finais de mes. Eran unhas semanas fastidiadas porque nos víamos desbordados porque non contabamos coa situación que atopamos.

Fil: Nestes oito anos, que intentastedes cambiar e que novidades incluístedes dentro do Lemos para que o clube siga cara adiante e estea consolidado na Preferente?

ÓL: Creouse un Lemos B, que eu considero que é fundamental para un clube coma o noso que non ten fútbol base, así podes axudar con xogadores novos que van subindo a un equipo que ten un cadro de xogadores pequeno. O ano pasado ademais creamos un equipo de fútbol sala, xa que en Monforte non había ningún equipo federado e na zona sur só había en Quiroga.

Fil: Con que te quedas principalmente da túa etapa coma presidente?

ÓL: Quédome con dúas cousas. Unha cousa boa é a xente que coñecín que son boas persoas que está metida no fútbol e outra xente mala que contamina este mundo e me fai pensar que o fútbol non pode seguir así con certas cousas que eu non acabo de entender.

Fil: Cal foi o mellor consello que che deron no fútbol?

ÓL: Que fora eu, que non intentara tirar máis do que daba a máquina.

«Sempre quixen deixar o Lemos completamente saneado»

Fil: Despois de todo este camiño cun cadro moi consolidado, decides deixar o clube. Como foi tomar esa decisión?

ÓL: Ao acabar o primeiro mandato eu non quería continuar porque estar no Lemos esixeche un compromiso e unha responsabilidade moi grande, pero quería deixalo completamente saneado e sen ningunha débeda, pero estabamos nas mesmas que ao principio, ninguén quería entrar e tiven que voltar a presentarme. Pero, como vexo que podía pasar o mesmo, eu avisei durante bastante tempo que eu non ía acabar o meu mandato e que este ano ía dimitir. Quero que o colla alguén diferente que veña que traia outras ideas. Dimitín porque tiña medo de que non viñera ninguén e que se me volvera pasar pola cabeza a reelección.

Fil: Intentaron convencerte de que volveras presentarte desta vez?

ÓL: Houbo xente que me dixo que volvera continuar, pero eu entendía que a miña etapa coma presidente xa acabara. Ao mellor como directivo podía ser, pero na presidencia non.

Fil: Agora son tempos de cambio. Que camiño cres que debería tomar o clube para seguir avanzando?

ÓL: O problema dos equipos do interior é o de sempre, ou saen xogadores de Monforte que teñan a calidade suficiente para estar no primeiro equipo ou é moi complicado. A categoría do Lemos é a Preferente. A xente non lle gustará escoitalo pero para chegar a Terceira RFEF necesítase unha gran inversión. Á nova directiva só lle pido que non cometan os erros que se cometeron hai anos.

Fil: Daríaslle os mesmos consellos a nova directiva que che deron a ti no seu momento?

ÓL: Ás veces hai que arriesgar porque cada ano a situación é diferente. Pode que haxa un ano que acertes coas fichaxes e o equipo vai cara arriba, pero endeudarse coma se endebedou o clube e ir aos campos e que se comente unha mala situación do Lemos non se pode permitir. Pídolles que teñan cabeza e que fagan o que lles pareza mellor, pero sempre cos pés no chan.