Un inicio fulgurante válelle ao Chantada Atlético ante un Meira con baixas (5-2). Os locais comezaron o duelo na matinal do domingo moi enchufados, e no minuto 10′ xa mandaban por 2-0. O Meira conseguiu recurtar diferenzas á saída dun córner, pero os chantadinos seguiron moi intensos e anotaron dous tantos máis antes do descanso, 4-1. Na reanudación melloraron os visitantes, que pecharon ao Chantada Atlético no seu campo, pero foron máis efectivos os do Sangoñedo e o resultado rematou cun abultado 5-2 e coa expulsión do local César.

Unha parte para cada un no Ladairo (1-1). Foi mellor o Taboada ao longo do primeiro tempo, con chegadas claras que non se materializaron ata que Fabio perforou a rede rival á media hora de xogo. Os visitantes mantiveron o ritmo e puideron facer algún tanto máis, pero o Guntín aproveitou o aire a favor na segunda metade para pechar ao Taboada no seu campo e, xa na recta final do choque, lograr o empate por medio de Quiñones, 1-1 nun Ladairo en mal estado.

O Lourenzá supera con claridade ao Guitiriz nun duelo de urxencias (4-0). Púxose de cara o choque para os laurentinos cun gol de Xoel no primeiro minuto de xogo, mentres que o Guitiriz tivo que remar desde o inicio nunha situación adversa. Erik e Antón levaban o peso do xogo visitante, mentres que o Lourenzá facía dano con balóns ás costas da defensa do Guitiriz. O 2-0 chegou antes do descanso e, pese a que os chairegos fixeron méritos para anotar no segundo tempo, sería o cadro de Roberto Ramallal o que sentenciaría a contenda con dous goles máis, 4-0 na Santa Cruz.

A Milagrosa non levanta cabeza e cae ante o Santaballés (0-2). Bastoulles a primeira metade aos chairegos, que souberon xogar cun home menos durante 60′. Foi precisamente tras a expulsión cando comezaron a carburar os de Freire, con dous goles na recta final do primeiro tempo que deixaron moi tocados aos albivermellos. Tras o descanso, a Milagrosa acumulou xente por diante do balón, pero o oficio do Santaballes foi suficiente para manter a portería a cero e sacar tres puntos de ouro do López Gorgoso, 0-2.

O líder Pol non da opción ao Monterroso (7-0). Xa mandaban os locais por 3-0 no minuto 9′, logo dun inicio fulgurante do Pol ante un Monterroso que aínda non chegara ao terreo de xogo. O 5-0 no 24′ auguraba unha mañá moi longa para os visitantes, pero o Pol baixou o pistón e tan só anotou dous goles máis no resto do partido, 7-0 para pechar un duelo sen historia no Manuel Luna.

O Foz confirma o seu bo estado de forma a costa do Riotorto (4-0). Un tempraneiro gol de Moreda deu moita tranquilidade a un Foz que está a consolidarse como un dos equipos máis en forma da categoría. Os locais impuxéronse ao Riotorto ao longo dun primeiro tempo que rematou con 2-0, aínda que os visitantes tiveron ocasións que non concretaron ata a expulsión de Jesu, cando o electrónico xa marcaba o 3-0. Así, a seguridade e intensidade mariñás valéronlle ao Foz para sentenciar a contenda con un tantos máis, 4-0.