O Antas prolongou o seu inicio perfecto cunha goleada no campo do Atlético Villalonga B, mentres o Chantada remontou o temperán gol do Bandeira para manter tamén o pleno de vitorias. A Milagrosa estreou a súa puntuación cun empate sen goles e o derbi entre o San Lázaro e o PM Friol B resolveuse cun trepidante 2-2.

O Antas impón a súa lei en Vilagarcía

Tres partidos, tres vitorias e catorce goles a favor. O Antas mantén o paso firme na Primeira Futgal logo de superar por 1-4 o Atlético Villalonga B nun encontro que foi decantando ao seu favor co paso dos minutos.

As ulloás xeraron numerosas ocasións desde o comezo, aínda que tiveron que agardar ata o minuto 25 para abrir o marcador por medio de Nuria. O tanto deu tranquilidade ao equipo visitante, que terminou de romper o partido tras o descanso. Jenny asinou o 0-2 no minuto 50 e Nuria repetiu no 58 para completar o seu dobrete. Apenas catro minutos despois, Yanire elevou a renda ata o 0-4. Sabela marcou no 81 o gol da honra dun Villalonga B que xa non tivo marxe para discutir a terceira vitoria consecutiva do Antas.

A Milagrosa suma a base de resistencia

A Milagrosa inaugurou a súa conta de puntos cun empate sen goles na visita ao Xallas. As lucenses asumiron o control da posesión durante a primeira metade, pero non atoparon a precisión necesaria nos últimos metros para converter o seu dominio en vantaxe.

O escenario cambiou despois do descanso. O Xallas deu un paso adiante e acumulou chegadas sobre a portaría defendida por Naty, pero a Milagrosa resistiu con orde e solidariedade. O traballo defensivo permitiu ás xogadoras de Fran Rodríguez conservar o 0-0 e obter o primeiro punto da tempada nun campo esixente.

Diana rescata o San Lázaro no minuto 96

O derbi lucense da Segunda Futgal entre o San Lázaro e o PM Friol B rematou cun empate a dous despois dun desenlace cargado de emoción. A igualdade dominou unha primeira metade trabada, con poucas concesións e sen goles.

Paola rompeu o equilibrio no minuto 48, pero a resposta friolesa foi contundente. Vanesa igualou no 64 e completou a remontada ao transformar un penalti no 76. O filial do PM Friol puido ampliar a súa vantaxe desde os once metros, mais Naibel non acertou no lanzamento.

O partido entrou nun tramo final de máxima tensión. O PM Friol B quedou con dez pola expulsión directa de Lidia no minuto 82 e o San Lázaro tamén perdeu a Kathy, por dobre amoestación, no 88. Cando parecía que os tres puntos marcharían cara a Friol, Diana apareceu no minuto 96 para establecer o 2-2 definitivo e repartir o premio.

O Chantada responde cunha goleada

O Chantada continúa compartindo o liderado da Segunda Futgal logo de vencer por 5-1 o Bandeira. O encontro comezou cun contratempo para as locais, sorprendidas polo gol de Dana cando apenas transcorreran cinco minutos. A reacción, porén, foi inmediata.

Saray restableceu a igualdade no minuto 9 e volveu marcar no 15 para culminar a remontada. O Chantada xa non permitiu que o rival regresase ao encontro: Sharon fixo o terceiro no 25 e Laura Caseiro ampliou a diferenza no 37. Na segunda metade, Sharon completou o seu dobrete cun último tanto no minuto 63.

O conxunto chantadés suma así seis puntos de seis posibles e nove goles a favor, cifras que confirman a súa convincente entrada na categoría.

O PM Friol conserva o pleno sen xogar

O PM Friol non tivo que saltar ao campo esta xornada debido ao abandono da competición por parte do Domaio. O equipo friolés figura con nove puntos despois das tres primeiras xornadas e continúa na zona alta da Terceira Federación, igualado coas líderes e mantendo ademais a súa portaría a cero neste inicio de curso.

Comeza esta fin de semana de San Froilán a Terceira Futgal e farao con novidade no fútbol provincial. O Antas estreará un filial feminino, «Antas B», co que tratará de seguir nutrindo o primeiro equipo de grandes futbolistas da casa grazas á experiencia dende a canteira, gañando minutos e confianza.