Agosto vai collendo o camiño de saída e setembro traerá de volta as competicións do fútbol afeccionado. Á espera de que comecen as ligas e de que saia a IV Guía Futbolinlugo, continúan sucedéndose noticias pola provincia. Sobre todo, polas categorías máis baixas do noso balompé.
A Primeira Rexional comezará na finde do 11 de setembro. Para esa data, o Sporting Pontenova poderá contar con Brais, a última fichaxe en ser anunciada. O lateral ou carrileiro procede da SD Ribadeo xuvenil e ten tamén pasado nas categorías inferiores do CD Lugo. Reforza esa parcela do equipo logo da grave lesión de Lucas.
Na Segunda Rexional, cuxa competición empeza na finde do 18, o Xermade continúa anunciando as súas fichaxes para o novo curso. Segue incorporando xuventude da man de Eyob; o defensa procede do Galicia de Caranza xuvenil.
Na zona sur, tamén segue apostando pola xente nova a SD Becerreá. Da man de Antón Méndez, dende o equipo queren que esa siga sendo o sinal de identidade. Os ata agora xuvenís Damián, Iago e Álex Navia soben definitivamente ao primeiro equipo. Ademais regrese o extremo Álvaro, logo dun ano sen xogar.
A Terceira Rexional iniciará a súa división a última finde do mes da vendimia. Para a volta da competición prepáranse no Abadín. O conxunto recén descendido anunciou a fichaxe de Pablo Díaz Otero. Un xogador da casa para reforzar a defensa.
Pola súa banda, o Castroverde suma para o seu cadro de xogadores a Samu. O extremo chega dende o xuvenil do EF Polvorín. Ademais ficha a Quique, futbolista de banda esquerda que vén do Rábade FS. Anteriormente estivo no Pabellón do seu Ourense natal.
