Redactor - Marcos Fernández

O Viveiro remata a segunda fase invicto en Cantarrana

Rematou a temporada en Terceira para os conxuntos lucenses, e fíxoo cun intrascendente encontro do Viveiro en Cantarrana onde logrou un empate diante do Pontellas, que o mantén invicto no seu feudo nunha segunda fase practicamente impecable dos mariñáns, que rematan a competición con cincuenta puntos.

O encontro resultou insulso e descafeinado, froito da situación clasificatoria de ámbolos equipos. O Viveiro coa permanencia acadada e o Pontellas co descenso matemático xa consolidado. Foi o cadro porriñés quen levou a iniciativa nos primeiros vinte minutos de encontro e foi quen de inquedar a portería defendida por Tomás por medio dun perigoso Berni, que disparou moi preto do pao. Co paso dos minutos os mariñáns colléronlle o pulso ao encontro e non tardaron en chegar as ocasións. O que estivo máis preto de acadar o tanto foi Rolle, que estrelou o balón no pao en dúas ocasións. A primeira delas logo dun gran centro de Agus que o canteirán rematou coa testa e pouco despois cun zurdazo que tamén rematou no pao.

A insistencia do Viveiro na procura do gol na primeira metade rematou con outra gran ocasión, desta volta nas botas de Facu. O extremo prantouse só diante do gardameta rival e a súa vaselina saiu moi preeto do pao. Cando parecía que o marcadaor chegaría inamovible ao descanso, o colexiado sinalou penalti a favor do Pontellas ao derribar na área Pablo Rey a un atacante porriñés. Nando non errou desde os once metros.

A segunda metade convertiuse nun ida e volta con chegadas continuas a ámbalas dúas áreas, aínda que sen practicamente ningunha ocasión clara de gol. Tan só un lanzamento de falta de Xaime ante o que Toni tivo que empregarse a fondo. Co tempo regulamentario xa cumprido, Javi Rey recolleu un balón dentro da área que culminou cun dereitazo que rematou dentro da portería e fixo xustiza ao visto durante os noventa minutos.

O partido Fisioterapia Ronda . . . Sarriana – Boiro: todo ou nada no debut de Jaime Paz no banquiño

Se a pasada xornada xa era unha final, o encontro da Sarriana diante do Boiro acada o calificativo de finalísima. Todo ou nada para o conxunto lucense o domingo ás 18:30 horas na Ribela coa arbitraxe do colexiado coruñés Belmonte Martell.

A semana comezou convulsa na Sarriana coa destitución de Charly á fronte do equipo á falta de dúas xornadas para o remate de liga. Logo dunha gran primeira fase na que os sarriaos remataron líderes do grupo lucense, dous malos resultados na liguiña de ascenso remataron coa destitución do adestrador e o nomeamento Jaime Paz á fronte do equipo. O técnico, con experiencia nas categorías inferiores de C.D. Lugo e Deportivo afronta o difícil reto de rematar nas dúas primeiras posicións.

 

A primeira embestida chegará este domingo diante do Boiro. Un triunfo da Sarriana serviríalles para superar aos da Barbanza na clasificación e chegar á derradeira xornada diante do Noia coas opcións de ascenso intactas.  Para iso é preciso recuperar o olfato goleador que a Sarriana amosou na primeira fase de competición, con preto de tres goles de media por encontro, e que desapareceu agora xa que non foron que de anotar nas dúas xornadas disputadas.

O Boiro conta por vitorias os seus encontros, ámbolos dous no campo de Barraña diante de Lemos e Atlético Coruña Montañeros. O equipo adestrado por Cristian Pérez deu mostra dun equipo sólido, que apenas concedeu ocasións de gol aos seus rivais. Con xogadores experimentados como Paco, Borja, Cea ou Jon e coa ameaza constante para o rival de Jorge Casal ou Saviola, o Boiro pasa por ser un dos grandes favoritos a xogar a vindeira temporada en Terceira.

O último encontro entre ámbolos conxuntos na Ribela data do 14 de novembro de 2019 e rematou con triunfo visitante por un gol a dous. Alvarito adiantou á Sarriana e Óscar “La Magia” Martínez e Saviola déronlle a volta ao marcador para o Boiro.

Falamos do encontro con Álex Pérez, que logo de acadar o ascenso a pasada temporada co Viveiro, buscará repetir éxito coa Sarriana.

 

QUE OPINAN OS PROTAGONISTAS?

ÁLEX PÉREZ (S.D. SARRIANA).

 – O mal comezo de segunda fase. “O gran problema é que non conseguimos marcar. Creo que os dous primeiros partidos foron bastante cerrados, moi típicos dunha fase de ascenso. Contra o Montañeros tivemos unha ocasión moi clara para adiantarnos cun tiro ao longueiro e na acción seguinte márcannos o único tanto do partido. No último partido diante do Sofán tivemos tamén tres ou catro opcións claras que non conseguimos que remataran en gol. As fases de ascenso son así e está todo moi igualado. O que pensara que ía ser doutro xeito está equivocado”.

– O encontro co Boiro. “É unha final. Sabemos que só vale gañar e iso é o que imos intentar. No caso de perder ou empatar acabaríase o ano, pero se vencemos estaríamos a un paso do ascenso. O rival ten moitos xogadores con experiencia en categorías superiores e ata o momento son mellor equipo ca nós, polo que non será nada doado”.

– A posibilidade de repetir ascenso. “No caso de logralo sería unha gran alegría. Por unha banda a nivel persoal e por outra a nivel de clube, xa que a Sarriana nunca estivo en Terceira”.

O Polvorín cae co Somozas e di adeus ao soño do ascenso

Non teremos representante lucense na nova Segunda RFEF. O Polvorín caeu no Anxo Carro en semifinais da fase de ascenso diante do Somozas, cun tanto nos últimos intres de encontro. O Viveiro, co obxectivo da permanencia xa acadado, non puido sumar na súa visita ao campo do Barco.

Un tanto de Luis Nuño preto do final racha coas ilusións do Polvorín (0-1).

O Polvorín continuará a vindeira temporada en Terceira. Máis que meritoria a campaña realizada polo filial do C.D. Lugo que pelexou ata o final por acadar un dos postos de ascenso. Pero este non foi o mellor encontro dos de Álex Ortiz que foi superado no cómputo global dos noventa minutos por un Somozas que tivo máis claridade no seu ataque.

O cadro de ferrolterra non tardou en mandar o primeiro aviso por medio do ex racinguista Iago Blanco logo dun gran pase de Pablo Rey.  Nas botas do media punta ferrolán estiveron as mellores ocasións para o Somozas na primeira metade con dous lanzamentos de falta que inquedaron a portería de Julen. Os de Jairo Bello foron medrando froito dos desaxustes defensivos do Polvorín e preto do descanso chegou a oportunidade máis clara para os visitantes, cun testarazo de Luis Nuño tras un medido centro de Álex Cabarcos que marchou fóra por moi poucos centímetros. A primeira ocasión para o cadro local chegou co tempo cumprido. Manu Núñez regateou a Garrido na frontal e conectou un disparo que puxo en serios apretos a Marcos Souto.

Na segunda metade, o Somozas chegou de xeito reiterado á área lucense. Alberto Novoa, cun lanzamento alto, e Luis Chacón que disparou ao lateral da rede puxeron en serios apretos a Julen. Co paso dos minutos o encontro perdeu ritmo e sufriu numerosas interrupcións por problemas físicos de xogadores de ámbolos conxuntos. Cando xa todo parecía encamiñado á prórroga surxiu a maxia de Pablo Rey, que inventou un pase á banda esquerda onde entrou con espazo Luis Chacón. O extremo colocou un balón medido que superou aos centrais do Polvorín e Luis Nuño, sen oposición, rematou ao fondo da portería.

O Viveiro perdeu en Calabagueiros diante dun Barco que se xogaba a vida (3-1).

O conxunto mariñán, co obxectivo da permanencia acadado, non alcanzou o nivel de intensidade dun Barco que se xogaba a súa continuidade en Terceira. Malia ao triunfo, o conxunto de Valdeorras terá que sumar un punto na última xornada para non ter que mirar o resultado da UD Ourense. Chusky deulle entrada no once titular ao gardameta Tomás, que fixo o seu debut esta temporada, así como na categoría, e tamén ao lateral zurdo Pablo Louzao.

O cadro local levou o peso do encontro e gozou de ocasións claras para acadar un marcador máis abultado. Óscar Martín, ata en dúas ocasións puido adiantar a un Barco que logrou o primeiro tanto por mediación do seu capitán Omar, que rematou un saque desde o curruncho botado por David Álvarez. Foi este último quen ampliou as diferencias no marcador poucos minutos despois cun preciso lanzamento desde fóra da área e puido sentenciar logo dunha boa asistencia de Rodri que rematou fóra con todo a favor.

O Viveiro non inquedou a portería local ata o desconto do primeiro tempo. Xaime sacou un córner que peinou Álex Meitín e Rolle rematou no segundo pao ó fondo da portería. A inquedanza no marcador só durou ata a primeira xogada do segundo tempo. Óscar Martín, desta volta si estivo acertado e rematou axustado ao pao desde o vértice da área.

A segunda metade non deu para moito máis, pero deixounos a boa nova do debut, logo dunha longuísima lesión do central Roi, peza determinante en Preferente, e que por fin volveu a saltar ao verde.

O partido Fisioterapia Ronda . . . Sarriana – Sofán: unha final anticipada na Ribela

A segunda xornada da fase de ascenso no grupo norte de Preferente convertiuse nunha auténtica final para a Sarriana. A Ribela será testigo, o domingo ás 18:30 horas,  do enfrontamento entre dous dos primeiros clasificados na primeira fase, o cadro local e un Sofán que tamén pon enriba da mesa as súas opcións de ascenso. O encontro será arbitrado polo ferrolán Barrera Lourido.

A derrota na xornada inaugural diante do Atlético Coruña Montañeros supuxo un duro revés para a Sarriana. Despois dunha case que inmaculada primeira fase na que o conxunto adestrado por Charly dominou con suficiencia o grupo lucense, os sarriaos chegan a esta segunda xornada coa obriga de acadar os tres puntos para engancharse á cabeza da clasificación e afrontar con opcións reais de ascenso dúas xornadas de infarto diante de rivais da entidade de Boiro e Noia.

Unha das bazas da escadra lucense é o seu gran potencial ofensivo. Na primeira fase foi quen de anotar 26 goles en dez encontros, tendo en Gerardo e Omar as principais referencias, sen esquecer a gran aportación goleadora de xogadores de banda como Borja Castro ou Javicho.

Non o terá doado a Sarriana. O Sofán chega á Ribela nunha situación moi semellante á do conxunto local. A derrota da primeira xornada no Carral diante do Noia complicou a situación do cadro carballés, que ao igual que o lucense, dominou o seu grupo de principio a fin. O conxunto adestrado por Alberto Rodríguez amosouse moi forte a domicilio na primeira fase na que estivo invicto ata a última xornada, á que chegou cos deberes feitos.

O último enfrontamento entre Sarriana e Sofán na Ribela tivo lugar o 2 de febreiro de 2020 e rematou con empate a dous tantos. Omar e Jacobo marcaron para o conxunto local e Raúl, en dúas ocasións, igualou o encontro.

Falamos do encontro con Omar, un dos goleadores da Sarriana.

QUE OPINAN OS PROTAGONISTAS?

OMAR (SD SARRIANA)

– Unha final. “O encontro diante do Sofán afrontámolo como o que en verdade é: unha final. Se queremos ascender, as nosas opcións parten por gañar este encontro na Ribela. Non cabe outra posibilidade”.

– O rival. “Agardamos un partido moi difícil cun rival que tamén se xoga todo, xa que chega logo de encaixar unha derrota na primeira xornada. Agardemos que o factor campo nos axude, xa que, xogar na casa diante da túa afección supón un plus para nós”.

– Unha competición moi curta. “Sempre tes que ter en conta o factor sorte e logo intentar cometer o menor número de posibles. Nós xa patinamos unha vez, polo que non podemos permitirnos a segunda, xa que, se caemos de novo complicaríase moitísimo todo”.

 

Cantarrana festexa a ansiada permanencia do Viveiro

O Viveiro xogará a vindeira temporada en Terceira. Desde a pasada xornada era un segredo a voces, pero era preciso ter o certificado de xeito matemático e o punto acadado diante do Ourense CF dictou sentencia. Non resultou doado diante dun conxunto que chegaba cos deberes feitos e que logrou adiantarse tres veces no marcador, pero outras tantas atopou a resposta dun equipo celeste disposto a lograr o seu obxectivo ao prezo que fora. Ao final 3-3, choiva de goles nunha tarde soleada en Cantarrana e delirio final de xogadores e afección.

Foto: Viveiro CF

Antes do comezo do encontro Pablo Rodríguez, ex xogador do Viveiro, C. D. Lugo e Racing de Ferrol entre outros, e agora asistente técnico do Vilarreal realizou o saque de honra logo de proclamarse campión da Europa League co conxunto castellonense.

Os visitantes comezaron o encontro demostrando que son equipo para outras aventuras e foron quen de chegar á área local con moito perigo. No primeiro acercamento chegou o primeiro tanto. Braganza centrou desde o perfil esquerdo e o burelao Julio Delgado enganchou un bo remate ao que respostou Manu Cedrón, pero no rexeite Ernesto empuxou o balón ao fondo da portería. O encontro foi un toma e daca con chegadas constantes a ambas áreas. Rolle puxo a proba a Juanvi cun tiro cruzado e Braganza fixo o propio con Manu Cedrón, xusto antes de que Javi Rey establecera a igualada. Asier fixo de 9 e aguantou o balón ata que o cedeu para o lanzamento do lucense que marcou o primeiro.

A falta de contundencia da zaga do Viveiro, tantas veces comentada durante a temporada, volveu a aflorar no segundo tanto do cadro visitante. Ata tres disparos logrou realizar o Ourense CF logo de rexeites da defensa ata que Kanteh logrou albiscar un oco polo que colar o esférico.  Tan só dous minutos despois, os mariñáns lograron de novo nivelar a contenda. E non podía faltar o día da permanencia un tanto de falta de Xaime, aínda que desta volta fora un lanzamento un tanto escorado á banda.

Na segunda metade o cadro adestrado por Rubén Domínguez meteu de novo o medo no corpo á parroquia viveirense. Un saque desde o curruncho rematouno Wadir sen oposición na área pequena e puxo o terceiro no marcador. A partir de aí máis de media hora para lograr unha igualada que se resistía en chegar. Estivo preto Álex Meitín, que rematou unha boa xogada trezada por Javi Rey e Tichu, pero o colexiado sinalou fóra de xogo do de Xove. Tempo tivo tamén Julio Delgado, moi motivado na súa volta á Mariña, para facer o cuarto, aínda que o seu lanzamento non colleu porta por moi pouco.

A falta de catro minutos para o final un saque de falta de Xaime atopou no segundo pao o preciso testarazo de Tichu para marcar o terceiro tanto. Un gol que vale, nen máis nen menos, que unha permanencia.

 

 

O partido Fisioterapia Ronda . . . Viveiro – Ourense CF: un punto para seguir en Terceira

A permanencia do Viveiro pode quedar pechada este o domingo. A gran igualdade existente durante toda a temporada, e moi especialmente nesta segunda fase presaxiaba que o desenlace se viviría na derradeira xornada, pero a gran traxectoria dos mariñáns adiantou acontecementos. Este domingo ás 17:30 horas en Cantarrana un só punto diante do Ourense C.F. outorgaríalle ao Viveiro a permanencia matemática en Terceira. Arbitrará o colexiado compostelán Martínez Barral.

Nove puntos de vantaxe sobre a zona de permanencia con tres partidos por disputar. É a inmellorable situación do conxunto dirixido por Chusky, que certificará a súa continuidade en categoría nacional esta mesma xornada se é quen de acadar un só punto diante do Ourense CF, líder, co obxectivo xa cumprido e único conxunto que foi quen de derrotar ao Viveiro nesta fase. A traxectoria dos mariñáns en Cantarrana convida ao optimismo nun encontro no que o técnico local poderá contar con tódolos seus efectivos agás os lesionados de longa duración Jacob e Iván. Tamén quedaría garantida a permanencia cunha derrota se a UD Ourense e Ribadumia non son quen de gañar.

O Ourense CF foi unha das vítimas do sistema de competición desta temporada, na que non existía o marxe de erro. Fai un ano pelexaba coa SD Compostela por subir a Segunda División B, e logo dunha ampla remodelación do seu cadro de xogadores, así como do seu corpo técnico o cadro ourensán tardou en coller o ritmo de competición e rematou por disputar a permanencia na Terceira. Pero os pronósticos cumpríronse e a pasada xornada xa foi quen de garantir a súa continuidade na categoría ao gañarlle no Couto ao Estudiantil.

Falamos do encontro con Pablo Rey, dono da banda esquerda de Cantarrana.

QUE OPINAN OS PROTAGONISTAS?

PABLO REY (VIVEIRO C.F.)

 – O obxectivo á vista. “Afrontamos este encontro como calquer outro. Sairemos a gañar co obxectivo posto en acadar tres novos puntos, sen pensar que un é suficiente para alcanzar a permanencia”.

 – O rival. “Agardamos un partido moi complicado con ritmo de balón e moito desgaste físico, ao igual que na primeira volta. Foi o único equipo que nos conseguiu gañar nesta fase. Teremos que estar moi atentos aos seus xogadores de ataque, xa que Julio Delgado, Borja Domingo ou Andoni son futbolistas de gran nivel”.

– A temporada de Pablo Rey. “Persoalmente foi un ano moi bo. Atopeime cun grandísimo vestiario que me acolleu xenial desde o primeiro día. Deportivamente tamén o valoro moi positivamente. Estou moi contento xa que xoguei case todo e cun bo rendemento”.

 

O triunfo do Viveiro en Ribadumia outórgalle a permanencia virtual

O Viveiro suma e segue nesta fase de permanencia. A vitoria no campo da Senra diante do Ribadumia foi a quinta nos seis últimos encontros, pero esta trouxo consigo un premio especial, o da permanencia virtual. Con nove puntos en xogo e outros tantos de vantaxe sobre o quinto clasificado, a UD Ourense, tan só unha carambola acabaría cos mariñáns na Preferente. De tódolos xeitos, Cantarrana é un gran esceario para poder festexar a continuidade en categoría nacional.

Como era previsible, o encontro non foi doado. O Ribadumia foi superior na primeira metade aínda que non tivo a puntería para atinar coa porta de Manu Cedrón. Charles desde dentro da área e Cerqueiras cun lonxano disparo e Fran Fandiño tiveron as máis claras para os locais. O Viveiro non foi quen de chegar con perigo á área rival, pero non tardou en adiantarse gracias a un penalti cometido sobre Javi Rey. O propio xogador lucense non errou desde os once metros.

Na segunda metade, o Viveiro mellorou, en boa medida axudado polos dous trocos realizados ao descanso. Uriol reforzou a liña defensiva e Facu deulle saída ao equipo mariñán nas contras. O Ribadumia amosouse moito máis impreciso e apenas xerou ocasións claras de gol. Nico, o mellor do conxunto adestrado por Chusky sobre o céspede da Senra tentou ampliar as diferencias cun lanzamento lonxano que saiu desviado por pouco. Xa no desconto o Ribadumia quedou en inferioridade pola expulsión de Pablo González por dobre cartón amarelo.

A vindeira xornada o Viveiro enfrontarse en Cantarrana ao Ourense C.F., conxunto que xa acadou a permanencia nesta xornada.

O Polvorín derrota ao Alondras e remata a fase de ascenso na cuarta praza

O Polvorín derrotou ao Alondras a domicilio na última xornada da fase de ascenso (0-1).

O filial albivermello cumpriu a súa parte e derrotou ao Alondras no Morrazo, pero tivo que conformarse coa cuarta praza logo do triunfo do Arousa na Lomba no seu encontro diante do Somozas. O gañador da eliminatoria entre o Alondras e o Estradense será o rival dos lucenses na segunda rolda das eliminatorias polo ascenso a Segunda Federación.

Os de Álex Ortiz chegaron xustos de efectivos a un encontro que comezou sen ritmo, tanto que parecía un encontro de pretemporada. Malia todo ámbolos conxuntos chegaban a área rival con certo perigo, aínda que con imprecisións nos últimos metros. Á beira da media hora de partido Gabarre roubou e a internada pola banda de Torrada rematou co balón nas botas de Morais que desde a frontal da área colocou o balón lonxe do alcance de Nucho. Co marcador a favor, o Polvorín mellorou e sentiuse máis cómodo con balón. Estivo preto o 0-2 nun testarazo de Fidalgo á saída dun córner.

Na segunda metade, o Polvorín baixou as súas prestacións froito das numerosas baixas e o Alondras inquedou a portería defendida por Ángel Fraga. Luismi e Jonás tiveron dúas claras ocasións para acadar un empate que faría xustiza ao visto durante os noventa minutos.

O Viveiro suma un punto en Cantarrana diante dunha UD Ourense que xogou a segunda metade en inferioridade (1-1).

Os mariñáns mantéñense invictos en Cantarrana na segunda fase e camiñan con paso firme cara a permanencia, malia que desperdiciaron unha boa ocasión para deixala case pechada. A falta de doce puntos puntos por disputarse, o Viveiro ten seis de marxe sobre a zona de descenso.

Voltou Chusky a repetir unha liña de cinco zagueiros, desta volta con Uriol no canto de Dani Montes. A pesar de tentar non pasar apuros en defensa, foi o cadro ourensán quen gozou das mellores ocasións para adiantarse no marcador. As dúas máis claras nas botas de Raúl Melo. A primeira salvouna Manu Cedrón, moi atinado no un contra un. A segunda, un providencial Nico case sobre a liña. O Viveiro tan só creou perigo nun lanzamento de falta de Rolle. Ao borde do descanso chegou unha acción clave do encontro. Champi viu o segundo cartón amarelo e deixou á UD en inferioridade para a segunda metade.

Logo do paso por vestiarios, os mariñáns buscaron o tanto e este non tardou en chegar. Asier aproveitou un erro defensivo para batir a Borja cun preciso tiro cruzado. Cuarto tanto para o focense na súa primeira temporada en Terceira. A UD Ourense non se veu abaixo e malia a estar cun home menos buscou o empate. Un lanzamento de falta de Alfredo rematou en córner e no saque desde o curruncho Viti cabeceou o balón ao fondo das mallas.

Con preto de media hora por diante o Viveiro controlou o encontro, pero non foi quen de xerar ocasións claras para marcar. Nos últimos dez minutos o adestrador local desfixo a liña de cinco coa entrada de Facu en sustitución de Uriol, pero non supuxo máis claridade no ataque local.

O Partido Fisioterapia Ronda . . . Lemos – Residencia: coa fase de ascenso no punto de mira

A penúltima xornada da Preferente déixanos unha auténtica final. Lemos e Residencia enfróntanse o domingo ás 18 horas na Pinguela co claro obxectivo de acadar a segunda praza que outorga o pase á fase de ascenso a Terceira. O encontro será arbitrado polo colexiado ourensán García Vázquez.

O gran comezo do Lemos nunha competición tan curta presaxiaba unha clasificación para a fase de ascenso do cadro monfortino dun xeito máis doado. Pero un só triunfo nos últimos cinco encontros fixeron que os de Edu Rodríguez cheguen a esta xornada decisiva coa obriga de vencer á Residencia, segunda clasificada, un punto por enriba dun Lemos ao que unha derrota apartaríao de xeito definitivo da pelexa polo ascenso. O empate diante do Santaballés cun gol dos chairegos no desconto e a derrota no Martínez Otero diante dun Foz xa sen aspiracións, foron dous resultados puxeron contra as cordas a un Lemos que buscará un triunfo que lle permita chegar á derradeira xornada dependendo de si mesmo.

A Residencia afronta o encontro desde a segunda posición, consciente de que un triunfo na Pinguela daríalle de xeito definitivo o pase á fase de ascenso. Non era este un obxectivo prioritario para o conxunto adestrado por Álvaro Meilán, máis acostumado a pelexar por manter a categoría, pero co paso das xornadas o cadro capitalino asentouse na zona alta do grupo lucense froito, entre outras cousas, da súa fortaleza como local, manténdose invicto na Cheda.

Na derradeira xornada, o Lemos visitará a Ribela para medirse a unha Sarriana xa clasificada para a fase de ascenso como primeira de grupo de xeito matemático, mentres que a Residencia recibirá no seu campo ao Ribadeo, conxunto sen posibilidade algunha de alcanzar o terceiro posto. Precisamente desde esa posición, o Santaballés estará moi pendente do que pase na Pinguela, xa que se é quen de sacar adiante o seu encontro na Liga diante da Sarriana pode rematar a xornada na segunda posición.

O último enfrontamento na Pinguela entre Lemos e Residencia tivo lugar o 10 de febreiro de 2019 e rematou con triunfo local por catro tantos a un. Varela, Denis, Hugo e Brais Meco foron os autores dos goles monfortinos, mentres que Carlos Raposo marcou para a Residencia. Esa temporada finalizou co ascenso á Preferente dos dous conxuntos.

Falamos deste decisivo encontro con Adrián Díaz (Lemos) e Dani López (Residencia).

QUE OPINAN OS PROTAGONISTAS?

ADRIÁN DÍAZ (LEMOS)

 – A situación do equipo. “A verdade é que pensabamos que estaríamos nunha situación mellor nesta xornada, aínda que creo que a actual tampouco é mala. Se gañamos á Residencia dependemos de nós mesmos no último partido”.

– A Residencia. “É un rival que nos sorprendeu moito no encontro de ida. Sabiamos que ía ser un partido moi complicado, pero dominaron tódolos aspectos e é un equipo con moitos recursos. Practican o xogo ao espazo, pero tamén saben ter continuidade con balón. Ademáis teñen xogadores perigosos en moitas facetas”.

– Unha final. “O equipo está traballando moi ben estas dúas semanas e todos estamos moi implicados e motivados. Entrar na fase de ascenso é algo moi bonito para o club e para os xogadores que queremos disfrutar. Quedar fóra sería duro, polo que temos que ter claro que temos que traballar e lograr estes tres puntos para acadar o que todos queremos”.

DANI LÓPEZ (RESIDENCIA)

 – O equipo. “Estamos con confianza e sentímonos ben fisicamente. Sabemos que faltan só dúas xornadas para rematar a primeira fase e temos a dous equipos a tan só un punto. Temos que ir a Monforte a xogar o mellor posible xa que é un dos partidos máis importantes”.

– O Lemos. “Agardamos un rival moi intenso xa que é unha final e ademáis xogamos na súa casa, o que para eles é un extra. Nós imos coa tranquilidade de que estamos a facer as cousas ben e conscientes de que facendo o noso fútbol e coa intensidade axeitada podemos acadar a vitoria”.

– Obxectivos. “Nesta primeira fase só pensamos en gañar os partidos que nos quedan. Para a fase de ascenso pasarán os dous equipos que mellor o fixeron estes meses e si nós somos un deles sería unha gran recompensa ao noso esforzo”.

O terceiro triunfo consecutivo achega o Viveiro ao gran obxectivo da permanencia

Terceiro triunfo consecutivo, quinto nas sete xornadas da fase de permanencia. A gran regularidade do Viveiro nesta carreira por manter a categoría outórgalle oito puntos de vantaxe cos postos de descenso con cinco xornadas por diante para rematar a temporada.

Como estaba previsto, o encontro non foi sinxelo para os mariñáns no campo do Carballo ante un Atios que sempre vende cara a súa pel como local. Esta foi a súa primeira derrota na casa na segunda fase. As primeiras ocasións foron para os pupilos de Yago Yao. O seu dianteiro Kiko Mintegui puxo a proba a Manu Cedrón en dúas ocasións. A primeira preto do cuarto de hora de partido e a segunda cumprida a media hora, na que o gardameta interviu decisivamente para enviar o balón ao longueiro. A primeira ocasión do Viveiro tívoa Tichu, pero Diego desviou o lanzamento do de Outeiro a córner.

Co marcador inamovible, Chusky modificou a punta de ataque no descanso. Rolle relevou ao capitán Álex Meitín na procura de máis presenza na área rival, aínda que lle costou xerar ocasións a un Viveiro que viu como o Atios chegaba con máis claridade á súa área. Christian e Jony gozaron de dúas claras ocasións para adiantar ao cadro local, pero non estiveron acertados. Con vinte minutos por diante, Tichu protagonizou unha das ocasións máis claras do encontro ao rematar ata en dúas ocasións facendo intervir con éxito a Diego. Tan só dous minutos máis tarde Adrián Mouriño viu a segunda tarxeta amarela e deixou aos seus con dez. A acción foi moi protestada polos xogadores dun Atios que, en inferioridade, deron un baixón que aproveitou o Viveiro para facerse co dominio do encontro.

O único tanto do partido chegou no minuto 86. Tichu, o mellor dos mariñáns sobre o céspede do Carballo, aproveitou un balón que a zaga local non acertou a despexar e superou ao gardameta local.

Na vindeira xornada o Viveiro recibirá en Cantarrana á UD Ourense que vén de perder no Couto ante o Estudiantil.

 

 

O partido Fisioterapia Ronda . . . Peluquería Mixta Friol – UD Collerense: a derradeira oportunidade para seguir en Reto Iberdrola

A fase pola permanencia en Reto Iberdrola, a segunda categoría nacional do fútbol feminino, chega ao seu momento decisivo e a situación do Peluquería Mixta Friol non convida ao optimismo. De tódolos xeitos, as matemáticas din que o obxectivo é posible e a gran reválida terá lugar hoxe sábado ás 20 horas na Reigosa onde o conxunto local recibe ao Collerense. O equipo mallorquín atópase tamén ao borde do abismo.

Ao igual que a competición, o Peluquería Mixta Friol tivo nesta temporada dúas fases ben diferenciadas. Na primeira, o cadro lucense acadou catorce puntos e ata as últimas xornadas mantivo opcións reais de evitar a fase pola permanencia. De feito comezou a pelexa pola salvación a tan só dous puntos do obxectivo, o que amosa o bo facer das rapazas do Friol nos primeiros encontros ligueiros. Varios contaxios de Covid-19 nas xogadores obrigaron ao equipo a un parón que resultou moi perxudicial para os resultados posteriores.

En cambio na segunda fase os encontros cóntanse por derrotas. O Friol non foi quen de acadar ningún punto e convertiuse en pechacancelas do seu grupo. A falta de dúas xornadas para o remate desta segunda fase, máis o encontro aprazado diante do Seagull, que se disputará o vindeiro día 22 de maio, o Friol atópase a oito puntos da permenencia. O reto é maiúsculo do conxunto presidido por Geluco Villar e pasa por acadar os nove puntos e que os resultados dos rivais acompañen.

Traxectoria oposta a do rival do Friol nesta xornada. O Collerense tan só foi quen de sumar catro puntos na primeira fase e comezou a carreira pola permanencia case sen opcións de poder acadala. Pero unha melloría salientable nas prestacións das mallorquinas nesta segunda fase convidou ao cadro balear a soñar con manterse en Reto Iberdrola. Con dezaseis puntos no casilleiro tan só lles vale gañar na Reigosa e unha derrota do Parquesol, ao que se enfrontarán na vindeira xornada, para seguir con opcións.

Falamos con Geluco Villar, presidente do Peluquería Mixta Friol.

QUE OPINAN OS PROTAGONISTAS?

Geluco Villar na presentación da xogadora Amani. Foto: asnosas.gal

GELUCO VILLAR (P.M. FRIOL)

 – A fase de permanencia. “Complicóusenos todo. Ao pouco de comezar a loita pola permanencia varios contaxios de Covid-19 fíxonos estar paradas doce días e iso matounos. Ademáis varias lesións importantes, como a de Lucía Pardo, que a perdemos catro partidos, tamén foi un aspecto decisivo. De tódolos xeitos, salvo no último encontro co Seagull, competimos ben e perdemos sempre pola mínima. Tampouco nos beneficiou o colectivo arbitral, que teño que decir que experimentou unha melloría importante no fútbol feminino, pero con nós non estiveron ben, sobre todo na ida co Collerense ou co Zaragoza”.

As opcións de salvación. “Son moi remotas. Dependemos dos demáis, e a verdade e que tal e como está o equipo dubido que podamos gañar os tres encontros que nos restan. O Collerense ten máis opcións ca nós de manter a categoría e se nos gañan teñen opcións. Gustaríame que as xogadoras non tiraran a toalla e loitaran ata o final, aínda que xa estiveramos descendidas”.

O futuro do Peluquería Mixta Friol: É preciso darlle unha volta a todo, pensar e reflexionar sobre esta temporada. Como máximo responsable son o culpable desta situación. Non me saliron as cousas ben, non acertei en case nada este ano. Incluso terei que meditar se vou continuar á fronte do equipo. Falarémolo na xunta directiva e se alguén está disposto a coller o relevo eu apartareime a un lado”.

O Collerense. “Reforzouse ben no mercado de inverno e notou bastante melloría no seu xogo, aínda que na ida fomos moi superiores, pero vímonos perxudicados polas decisións arbitrais. Elas virán a morte, xa que teñen máis opcións ca nós. Fan un fútbol directo que non nos favorece, polo que teremos que pelexar por ter o balón para facerlles dano”.

Foto de portada: asnosas.gal

O partido Fisioterapia Ronda . . . Residencia – Sarriana: o fortín da Cheda, un obstáculo cara o ascenso directo

Antepenúltima xornada da Preferente no formato exprés que deseñou a Federación Galega para esta temporada, na que se enfrontan os dous primeiros clasificados do subgrupo lucense. A Residencia e a Sarriana pelexarán por tres puntos que os acheguen aos seus obxectivos, no caso dos visitantes, serían definitivos de cara a lograr o pase á fase de ascenso. A Cheda será o esceario do encontro o domingo ás 17:45 horas, coa arbitraxe do colexiado ourensán Rodríguez Delgado.

A Residencia afronta o encontro desde o segundo posto e sen presión por acadar a clasificación para a fase de ascenso. Ademáis, o conxunto de Álvaro Meilán conta por vitorias os encontros disputados na Cheda. Os triunfos folgados diante do Santaballés e o Lemos seguiuno outro máis axustado diante do Foz, pero en todos eles amosou o conxunto lucense ser un bloque sólido ao que resulta complexo dobregar. Unha vitoria nesta xornada outorgaríalle á Residencia a vantaxe de chegar por diante do Lemos ao que se antolla encontro decisivo da vindeira xornada na Pinguela.

A Sarriana tan só cedeu un empate en tódalas xornadas disputadas. Foi na segunda xornada no Pepe Barrera diante do Ribadeo. A partir de aí cinco triunfos consecutivos que o colocaron no liderato e con posibilidades de acadar, a falta de dúas xornadas, a clasificación para a fase de ascenso, obxectivo prioritario do cadro sarriao. Cabe destacar do conxunto adestrado por Charly a súa insultante capacidade para marcar. En seis dos sete encontros xogados foron quen de anotar tres ou máis goles. Pola contra, encaixan con certa facilidade, sendo quen a Sarriana e o Foz de anotarlle tres tantos cada un.

O último encontro na Cheda entre os dous equipos tivo lugar o 26 de xaneiro de 2020 e rematou con triunfo visitante por dous goles a cinco. Lucas e Moha adiantaron á Residencia, pero un hat-trick de Omar, Jacobo e Álvaro, hoxe nas filas do cadro lucense, déronlle a volta ao marcador para a Sarriana.

Falamos do encontro con Adrián (Residencia) e Luis Díaz (Sarriana).

QUE OPINAN OS PROTAGONISTAS?

ADRIÁN (RESIDENCIA)

 – O futuro inmediato. “Afrontámolo con moita ilusión, sabendo que todo o que poidamos acadar é un premio co que non contariamos nunha temporada normal, así que imos xogar estas últimas xornadas con moitas gañas . . . e a por todas”.

A Sarriana. “Agardo un partido moi complicado. Son un gran equipo, son líderes e iso non é casual, pero nós na casa ata o de agora gañamos tódolos encontros, polo que será moi competido. Debemos estar a un gran nivel, se o logramos teremos as nosas opcións”.

Os rivais. “Sería moi positivo chegar ao seguinte encontro na Pinguela por diante do Lemos, está claro, pero nós polo momento só pensamos na Sarriana. Como se soe decir, partido a partido”.

LUIS DÍAZ (SARRIANA)

Foto: La Preferente

 – O nivel do equipo. “Creo que imos de menos a máis, sobre todo nos últimos catro partidos. Ao comezo sacamos bos resultados, pero as sensacións non eran as mellores, o que é lóxico despois de tanto tempo sen xogar, moitos xogadores novos e unha pretemporada atípica. Somos conscientes do potencial do equipo que temos e seguimos mellorando”.

O encontro na Cheda. “Será un partido moi igualado. Eles xogarano como se fose unha final e nós se logramos os tres puntos aseguramos o pase á fase de ascenso e o primeiro posto. A Residencia ten un bloque moi sólido, coñécense ben e saben ao que xogan. A Cheda sempre é un campo complicado para os visitantes”.

Os goles encaixados. “É certo que se pasamos á segunda fase será importante reducir o número de goles en contra, pero tamén é verdade que aínda que levemos bastantes goles encaixados non nos xeran moitas ocasións. Boa parte deles debéronse a ocasións correxibles ou incluso de mala sorte”.

O Racing Vilalbés non logra sentenciar o pase ao play off e o Viveiro distánciase de novo do descenso

A mellor nova para os conxuntos lucenses de Terceira estivo na Mariña. O Viveiro logrou tres puntos no seu fortín de Cantarrana diante do Barco para alonxarse de novo dos postos de descenso. O Racing Vilalbés non puido selar o pase ao play off polo ascenso logo de empatar na Madalena co Choco e o Polvorín non dependerá de si mesmo para rematar na terceira posición tras caer co xa ascendido Arenteiro.

A enorme pegada do Arenteiro frustra a ambición do Polvorín (1-2).

O Polvorín dominou o balón e non foi inferior a un Arenteiro que aproveitou para dar minutos a xogadores menos habituais no once inicial de Fran Justo. O filial albivermello viuse penalizado por erros puntuais que o rival non perdonou.

Os de Álex Ortiz foron quen de xerar perigo ante a portería rival. Christian tivo a primeira e máis tarde Morais e tamén Dani Vidal gozaron de ocasións para superar a Ángel. Preto do ecuador da primeira metade, un erro na saída de balón foi aproveitado por Presas para batir con clase a Julen. O Arenteiro amosou o seu potencial na Cheda, sobre todo na parcela atacante. Un centro desde o perfil esquerdo do ataque rematouno Sylla ao longueiro. O rexeite caeulle a Jhony que empuxou o balón ao fondo da portería. Ao minuto seguinte a xogada repetiuse, pero desta volta o colexiado anulou o tanto por fóra de xogo.

Na segunda metade o Polvorín conseguiu recurtar diferencias nun saque de esquina sacado ao segundo pao, onde Antón Escobar que viña de entrar no terreo de xogo, rematou lonxe do alcance de Ángel. No minuto 74 o colexiado interpretou agresión de Antón Escobar a Portela e enviou aos vestiarios ao dianteiro do Polvorín. A decisión desquiciou ao filial do C.D. Lugo, aínda que tentou a igualada ata o final.

O Racing Vilalbés apraza a clasificación para o play off logo de empatar co Choco (1-1).

Non puido certificar o Racing Vilalbés a súa presenza no play off polo ascenso á Segunda RFEF e terá puntuar diante do Estradense a vindeira semana para logralo. Antes do encontro o cadro de xogadores, corpo técnico e directiva rendíronlle unha homenaxe a Paco Ruíz, presidente da entidade nos últimos oitos anos e que deixará o cargo ao remate da temporada.

O Choco tivo a posesión do balón e foi quen de chegar con certo perigo á área rival. Davo a piques estivo de marcar na máis clara dos redondeláns, pero enviou o balón ao lateral da rede tras desfacerse de Javi Rumbo e Yago Vázquez cabeceou un córner preto do pao esquerdo. Make tivo as máis claras do Racing na primeira metade. Xusto antes do intermedio Martín Rafael acadou o tanto do Choco. O canteirán do Celta lanzou unha falta que sorprendeu a Javi Rumbo.

O segundo tempo comezou co Racing Vilalbés na procura do empate. Aos dez minutos Sandá centrou, Muiña prolongou e Pedrosa cun tiro cruzado superou a Kevin. O cadro chairego tivo ocasións para facer o segundo nos seguintes minutos nas botas de Santi Gegunde e Make. O encontro sufriu un parón pola lesión do redondelán Yago Vázquez, que tivo que marchar en ambulancia do terreo de xogo e nos últimos intres de partido apenas se viron ocasións para desnivelar o marcador para un ou outro lado.

O Viveiro supera ao Barco en Cantarrana e volve distanciarse da zona de descenso (2-0).

Os últimos minutos de encontro fixeron xustiza ao visto nos case noventa anteriores en Cantarrana. O cadro mariñán foi mellor que o Barco, pero ata o minuto 87 non foi quen de poñerse por diante no marcador.

Na primeira metade ámbolos dous equipos gozaron de ocasións para marcar. As do Viveiro case sempre coa sinatura de Rolle, que se atopou coa boa intervención do gardameta visitante Iván Oviedo. A máis clara para o Barco chegou logo dun centro de Pablo Rubio que rematou Rodri moi preto do pao.

Na segunda metade o Viveiro foi moi superior ao rival. Chusky viuno desde o banquiño e modificou o esquena inicial, desta volta con defensa de cinco, cun equipo máis ofensivo coa entrada de Asier e Álex Meitín e máis tarde a de Arturo. A primeira gran ocasión tívoa Xaime. Omar cometeu penalti sobre Álex Meitín, pero o 8 do Viveiro errou desde os once metros. A falta de tres minutos para o final, o colexiado sinalou de novo penalti por derribo de Diego a Álex Meitín. Desta volta Arturo foi o encargado do lanzamento e abriu o marcador.

Case sen tempo para máis o Barco a piques estivo de empatar. Óscar Martín enviou o balón ao longueiro. Na seguinte xogada Asier sentenciou logo dunha contra levada por él mesmo e Arturo que rematou co tanto do focense.

O partido Fisioterapia Ronda . . . Racing Vilalbés – Choco: tres puntos que garanten o play off de ascenso

O Racing Vilalbés afrontará na penúltima xornada da segunda fase de Terceira un encontro decisivo diante do Choco. Será o domingo ás 17 horas na Madalena coa arbitraxe do colexiado compostelán Martínez Santos. O cadro chairego, cun triunfo, garantirá a súa presenza no play off polo ascenso a Segunda RFEF.

Os dous conxuntos chegan a este choque en dinámicas opostas. O Racing Vilalbés non foi quen de amosar a regularidade que na primeira fase lle serviu para situarse na zona alta da táboa clasificatoria e as tres derrotas colleitadas na segunda fixo que a vantaxe de puntos coa que chegaban os de Simón Lamas se esfumase. “Creo que a diferencia de puntos coa que chegabamos nos fixo relaxarnos e agora cóstanos saír desa mala racha, pero estou seguro que diante do Choco o faremos”, comenta Javi Rumbo, gardameta do Racing.

Pola súa banda o Choco, que evitou xogar a fase de permanencia de forma agónica na última xornada, foi quen de despregar o seu potencial neste camiño ao play off e nas catro xornadas disputadas non coñece a derrota. Tres vitorias e un empate, o pasado domingo diante do Fabril, fixeron que o cadro de Gonza Fernández chegue a esta penúltima etapa dependendo de si mesmo para entrar na apetecible promoción de ascenso. Para Javi Rumbo o encontro “será difícil como todos os desta competición, e máis xogándonos estar no play off. Sabemos que teñen un bo xogo por dentro e tamén buscando os espazos. Teremos que estar concentrados e ser quen de facer o noso fútbol na Madalena”.

Aínda que como xa é coñecido por parte dos distintos estamentos do club chairego, a clasificación para a promoción de ascenso non é ningunha obriga “sería un premio a un ano difícil e recompensaría o gran esforzo e traballo de todo o grupo”, asegura Javi Rumbo.

O último enfrontamento entre Racing Vilalbés e Choco na Madalena data do 13 de outubro de 2019 cun triunfo in extremis para os chairegos. O único tanto do encontro anotouno Cuadrado xa no tempo de desconto.

O Polvorín queda sen opcións de ascenso directo

Tres derrotas noutros tantos encontros. O Polvorín caeu nun encontro polémico no campo do Arousa e o Racing Vilabés perdeu o liderato logo de perder diante do Rápido de Bouzas. O Viveiro rachou a súa boa xeira no Couto onde caeu ante o Ourense CF.

O Polvorín despídese do ascenso directo nun polémico encontro diante do Arousa (2-1).

O filial albivermello non puido sacar nada positivo da súa visita ao campo da Lomba nun encontro con dúas metades ben diferenciadas. Os primeiros corenta e cinco minutos tiveron un único dono: O Polvorín. Nada máis comezar o encontro Antón Escobar prantouse só diante do ex fabrilista Álex Cobo e o seu disparo sacouno un defensor local cando o balón xa superara a liña de gol. O colexiado non outorgou o tanto, decisión que foi moi protestada polos xogadores lucenses. Na seguinte xogada Christian estrelou o balón no pao e o propio Antón Escobar volveu tentalo sen éxito. Os de Rafa Sáez non atopaban o seu xogo e o Polvorín era quen de chegar con perigo á área rival. Iago Novo, logo dunha boa acción persoal, trabucouse na definición noutra boa ocasión.

Na segunda metade, o Arousa reestructurou o seu equipo e mellorou as súas prestacións aínda que non eran quen de crear perigo. Pero unha falta ao borde da área foi executada á perfección por Mon. Julen non puido facer nada e o Arousa, case sen crelo púxose por diante. O Polvorín perdeu frescura física e non tivo a claridade de ideas da primeira metade. Outra acción polémica protagonizouna o lucense Ross, que derribou a Christian dentro da área, pero de novo o colexiado non apreciou acción punible. Xa no tempo de desconto Javi Otero sentenciou o encontro para o conxunto local. No 94 Christian recurtou diferencias.

Derrota do Racing Vilalbés que lle custa o liderato diante do Rápido de Bouzas (1-0).

O Racing Vilalbés cedeulle o liderato a un Estradense en racha logo da derrota no Baltasar Pujales. Malia ao resultado foi un bo encontro do conxunto chairego. O Rápido de Bouzas tivo o dominio do balón na primeira metade, pero os de Simón Lamas estiveron cómodos na recuperación e saínda en rápidas transicións. Ámbolos equipos tiveron ocasións para adiantarse no marcador. Canhoto e Álex Rey para os locales e Cuadrado e Pedrosa para os visitantes.

A segunda metade seguiu un guión parecido á primeira, incluso o Rápido de Bouzas tiña menos profundidade que antes do intermedio. Pero nunha xogada con boa circulación de balón Adrián Rodríguez batiu a Javi Rumbo e anotou o gol do triunfo. Nos últimos intres o Racing Vilalbés volcouse na procura do empate. Jose Varela estrelou un balón no pao na que foi a ocasión máis clara. Javi Varela e Aitor tamén tiveron nas súas botas o tanto do empate, pero non estiveron acertados.

O burelao Julio Delgado, clave na derrota do Viveiro diante do Ourense C.F. (3-0).

Primeira derrota do Viveiro na fase de permanencia. Foi no Couto diante dun Ourense que soubo aproveitar as súas ocasións, mentras que os mariñáns non estiveron acertados e ven como os postos de descenso xa están a só tres puntos.

O encontro comezou de xeito esperanzador para os mariñáns, que aproveitaron as dúbidas dos locales nos primeiros intres do partido para chegar con perigo á portería local. Javi Rey e Álex Meitín tiveron ocasións para adiantarse no marcador, pero o gardameta Juanvi estivo acertado. O dominio dos de Chusky prolongouse durante boa parte da primeira metade, pero Julio Delgado aproveitou un desaxuste defensivo viveirense para adiantar ao cadro ourensán. A posición do de Burela era dubidosa.

Na segunda metade, as chegadas á área rival foron contadas e o Viveiro apenas contou con ocasións de gol. Julio Delgado puxo terra de por medio con case vinte minutos gastados cun bo lanzamento e pouco máis tarde Ebuka rematou un balón solto desde o interior da área para sentenciar.  Nos últimos intres os de Rubén Domínguez contaron con ocasións para que o marcador fora máis abultado.

O partido Fisioterapia Ronda . . . Santaballés – Residencia: a revolución dos modestos

O formato expréss da Preferente fai que este fin de semana de comezo a segunda volta de competición. E faino cun encontro entre dous dos conxuntos que, a priori, non estaban chamados a pelexar polo ascenso: Santaballés e Residencia. Ámbolos conxuntos mediranse o domingo ás 17:30 horas no campo de A Liga coa arbitraxe do colexiado santiagués Enríquez Pereiro.

O conxunto local é cuarto clasificado con seis puntos e convertiuse na besta negra dos conxuntos mariñáns. Os dous triunfos acadados polos chairegos foron diante do Ribadeo e do Foz. Os de Dani Moirón, recén ascendidos de Primeira Autonómica, afrontan esta curta temporada como un aprendizaxe de cara a seguinte e sen presión algunha en canto a resultados, pero o certo é que un triunfo diante da Residencia outorgaríalle ao Santaballés a licencia para soñar cunha das tres primeiras prazas.

A Residencia é a gran sorpresa da temporada no grupo lucense de Preferente. O conxunto adestrado por Álvaro Meilán, é segundo clasificado con dez puntos e tan só perdeu un encontro. Foi o xogado na Ribela diante da Sarriana, líder da categoría. Acostumado a pelexar pola salvación o cadro lucense, ao igual que o seu rival desta xornada, parte sen presión algunha, o que nunha competición tan breve pode resultar determinante ante outros conxuntos que, nun principio, estarían chamados a cotas maiores.

O último enfrontamento entre Santaballés e Residencia no campo da Liga data do 21 de outubro de 2018 e rematou con triunfo local por tres tantos a un. Seo, Álex Novás e Palomo anotaron para a Residencia mentres que Dani Galán fixo o gol dos lucenses.

Falamos do encontro con Castrín (Santaballés) e Álvaro (Residencia), dous dos fichaxes estrela de ámbolos conxuntos para esta temporada.

QUE OPINAN OS PROTAGONISTAS?

CASTRÍN (SANTABALLÉS)

Foto: Erica Currás

 – A primeira volta. “Foi moi positiva. Afrontamos a temporada sen nada que perder e sen presión ningunha. Para un equipo recén ascendido como é o noso, e nesta situación, o obxectivo era competir o mellor posible contra todos e penso que así o fixemos. Acabamos con seis puntos  e dous dous partidos que perdemos foi pola mínima”.

A Residencia. “Será un partido moi disputado, xa que os dous queremos gañar, eles para seguir loitando polos postos de ascenso e nós para esta máis preto do terceiro posto.  Eles son un equipo que propón un xogo combinativo e nós un fútbol máis directo. No noso campo é probable que non se sintan cómdos pola falta de espazos. Se facemos un partido defensivamente bo e concedendo pouco creo que os trs puntos poden quedar na casa, xa que a nivel ofensivo estamos mellorando e cada vez xeramos máis ocasións de gol”.

Un xogador de ataque. “Aínda teño a etiqueta de central ou lateral e a moita xente fáiselle estrano verme xogar arriba. Agardemos que nos próximos anos me poda consolidar como un xogador de ataque. Atópome moi cómodo nas tres posicións de arriba, sobre todo na banda dereita e en punta. Estou moi contento no equipo, tanto o vestiario como o corpo técnico é realmente bo. Noto bastante diferencia respeto ao ano pasado no Sporting Pontenova en tódolos ámbitos do xogo. O salto de categoría é grande e o nivel dos xogadores moito mellor. En liñas xerais creo que estou facendo unha boa temporada”.

ÁLVARO (RESIDENCIA)

 – Situación de privilexio. “Sinceramente cando fichei pensei que iamos estar pelexando polo terceiro posto, xa que a Sarriana era un equipo feito para ascender e dous bos clubs como son o Lemos e o Ribadeo tamén pretenderían o ascenso de categoría. Pero isto é o que teñen as ligas curtas que calquera cousa pode pasar. Aquí hai un grupo tremendo e temos algo bo que o resto non ten: non existe presión ningunha por conseguir resultados. E iso ao final pode marcar a diferencia”.

– O Santaballés. “Será un partido intenso que se pode decidir nunha xogada de estratexia. O de Santaballa sempre é un campo moi difícil de gañar e o Santaballés sabe perfectamente ao que xoga e teremos que adaptarmos. Será un encontro bonito”.

– O obxectivo. “Chegou xente nova que deu un salto de calidade e outros xa máis experimentados que tentamos axudar polo que, xa que estamos arriba intentaremos pelexar por entrar nos dous primeiros, pero o obxectivo segue a ser disfrutar como o estamos facendo despois dun ano duro sen fútbol. Nótase que a xente necesitaba da pelotiña.

O Viveiro camiña con paso firme cara a permanencia

A xornada dos tres representantes lucenses en Terceira saldouse con dous triunfos e unha derrota. O Viveiro gañou en Cantarrana ao Ribadumia e ampliou as diferencias cos seus perseguidores, mentres que o Polvorín sumou tres puntos diante do Alondras que o manteñen vivo na súa pelexa polo ascenso directo. O Racing Vilalbés caeu na última xogada do encontro diante do Estradense.

Dous goles de Morais danlle a vitoria ao Polvorín diante do Alondras (2-1).

O Anxo Carro foi o esceario do triunfo do filial albivermello. Nun estadio necesitado de triunfos, o Polvorín deulle unha alegría á afección lucense cunha vitoria fundamental para continuar con opcións de acadar o segundo posto, que outorga o ascenso directo á Segunda Federación.

Non comezou ben o Polvorín. Certo nerviosismo e precipitación nos xogadores de Álex Ortiz que provocaron que o Alondras fose o primeiro en xerar situacións de perigo mediante centros laterais. Co paso dos minutos, o conxunto local foi atopando o seu sitio no campo e a partir da media hora de encontro convertiuse en dominador do mesmo. A primeira ocasión clara tívoa Christian que errou un man a man diante de Martín Pastoriza. A falta de dez minutos para o descanso, un saque de falta de Iago Novo rematouno Morais coas costas no primeiro pao e colouse na portería visitante.

No segundo tempo, os pupilos de Xurxo Otero saíron a polo empate e o Polvorín optou pola profundidade dos laterais para xerar situacións de perigo. Pero foi de novo Morais quen ampliou as difrerencias no marcador logo dun bo pase de Iago Novo. Xa co tempo cumprido o veterán Yahvé anotou para o Alondras cun lanzamento desde a frontal que bateu nun defensor local e despistou a Ángel Fraga, que voltou a ocupar a portería do Polvorín.

Con este triunfo o filial albivermello é terceiro a cinco puntos da segunda posición.

O Racing Vilalbés cae na Madalena diante dun Estradense co que iguala na clasificación (0-1).

A falta de disputar o encontro adiado diante do Rápido de Bouzas o vindeiro mércores, o Racing Vilalbés dilapidou a vantaxe coa que partía ao comezo da segunda fase. Malia todo, os de Simón Lamas mantéñense no liderato do grupo, pero cos mesmos puntos que o Choco e o Estradense.

Encontro igualado na Madalena no que os visitantes foron lixeiramente superiores no cómputo global. Comezou mellor o Racing, pero os de Alberto Mariano non tardaron en xerar perigo ante a portería de Rumbo. Piñeiro tivo a mellor para os visitantes e Santi Gegunde e Marino protagonizaron as máis claras para os chairegos.

Na segunda metade, os de Simón Lamas entraron mellor no partido, aínda que sen xerar claras ocasións de gol. Co paso dos minutos o Estradense fíxose co dominio do encontro e tiveron opcións claras para adiantarse no marcador. O único tanto do partido non chegou ata o desconto. Sergio Mulero puxo un centro ao segundo pao e Óscar López rematou ante a oposición de Jose Varela. Cando xa parecía que non quedaba tempo pra maís, Muíña colgou un balón á área rival que peinou Cuadrado e un defensor visitantes a piques estivo de introducir o balón na súa propia portería.

O Viveiro achégase á permanencia logo do triunfo diante do Ribadumia (1-0).

Segunda vitoria consecutiva en Cantarrana na fase pola permanencia dun Viveiro que ampliou a cinco a marxe de puntos coa zona de descenso. O encontro resultou igualado, sobre todo nos primeiros corenta e cinco minutos. O xuvenil Xoel debutou no once titular de Chusky.

Costoulle ao Viveiro desfacer a liña defensiva do Ribadumia e apenas se viron ocasións de gol na primeira metade. A única rematou en gol, pero o colexiado sinalou fóra de xogo de Edgar no momento do remate. Na segunda os dous equipos saíron a polos tres puntos e foron os mariñáns que atoparon o premio na primeira chegada. Unha boa xogada entre Agus e Tichu rematou co pase deste a Álex Meitín e o capitán non errou diante de Roberto Pazos. Os visitantes quedaron tocados co gol e sucedéronse as ocasións para o Viveiro, que puido sentenciar. Javi Rey en dúas ocasións, e Tichu tiveron opcións para acadar o segundo, pero atopáronse coa boa resposta do porteiro do Ribadumia.

Non renunciaron os do Salnés ao empate. Estiveron preto de acadalo nos últimos minutos de encontro. Giráldez e Hugo Soto tiveron nas súas botas a igualada.

O partido Fisioterapia Ronda . . . Viveiro – Ribadumia: tres puntos vitais nun encontro con sabor a revancha

O grupo pola permanencia chega á súa terceira xornada e o Viveiro afronta unha cita crucial en Cantarrana. Será o domingo ás 17:30 horas diante do Ribadumia, coa arbitraxe do colexiado coruñés Méndez Castro. O encontro, con ámbolos conxuntos separados por tan só tres puntos, será unha reválida para os mariñáns logo da eliminación na fase previa da Copa do Rei diante do conxunto do Salnés.

O Viveiro encabeza, xunto co Arzúa, o grupo de equipos que buscan evitar o descenso a Preferente. De doce conxuntos, tan só catro lograrán o obxectivo. Un reto da máxima dificultade que os mariñáns foron quen de comezar con bo pé. Ao triunfo diante do Atios na casa seguiulle o empate da pasada xornada no Couto ante a UD Ourense. Un punto moi valioso, pero que soubo a pouco logo de adiantarse ata tres veces no marcador. Agora, de novo con Cantarrana como esceario, os pupilos de Chusky tentarán sumar unha nova vitoria que os distancia cada vez máis do temido quinto posto.

O Ribadumia non puido disputar o seu encontro da pasada xornada diante do Estudiantil por mor dun positivo no conxunto compostelán. Cun partido menos que os mariñáns e tres puntos por debaixo, os de Luis Carro non poden permitirse un tropezo diante do Viveiro que os distancie da zona de permanencia. O conxunto pontevedrés conta cun cadro de xogadores que mistura veteranía e xuventude. Aos xa curtidos en mil batallas como o heroe copeiro Roberto Pazos, Fran Fandiño, Miguel ou Hugo Soto únese a frescura de Carlos, Diego Abal, Javi Domingo, Giráldez ou Óscar Martínez, co que conforman un equipo que ben seguro porá en dificultades ao conxunto local.

O único enfrontamento entre ámbolos dous clubs foi na fase previa da Copa do Rei esta mesma temporada, na que o Ribadumia foi quen de derrotar ao Viveiro na tanda de penaltis. O tempo regulamentado rematou con empate a un tanto. Hugo Soto e Xaime foron os autores dos tantos.

Falamos do encontro cun dos xogadores máis en forma do Viveiro, o focense Asier.

QUE OPINAN OS PROTAGONISTAS?

ASIER (VIVEIRO C.F.)

 – Un punto no Couto. “Sabiamos que ía ser un partido difícil, como todos os desta fase, e que os erros se ían pagar caros, pero aínda así foi un bo resultado. Temos que facer bo o punto acadado en Ourense gañando este domingo na casa ao Ribadumia”.

– O rival. “Non lle atopo moitas similitudes ao este encontro co disputado na Copa do Rei. Aquel foi un partido raro, xa que apenas adestráramos calquera dos dous equipos e estabamos faltos de ritmo. Agora xa está todo moito máis igualado e temos que estar moi concentrados os noventa minutos para lograr un bo resultado. Eles son un bo equipo, que contan con xogadores moi veteráns e con moita experiencia, pero nós en Cantarrana temos que expoñer o noso xogo”.

A adaptación á categoría. “Foi unha temporada atípica e todo vai un pouco distinto, pero a día de hoxe atópome ben, temos un bo grupo e iso tamén axuda. O ritmo e a calidade que teñen tódolos equipos son as diferencias máis salientables coa Preferente”.

Resístese o triunfo lucense malia ser quen de marcar tres tantos fóra

Viveiro e Racing Vilalbés foron quen de anotar tres goles en campo contrario, pero este feito non foi sinónimo de vitoria. Foi meritorio o punto dos mariñáns no Couto diante da UD Ourense, aínda que logo de adiantarse tres veces no marcador ten un sabor agridoce. Os chairegos caeron no campo do Choco malia perforar en tres ocasións a porta dos redondeláns. Tampouco foi a xornada do Polvorín, que caeu pola mínima, e con polémica diante do Arenteiro na segunda xornada da segunda fase de Terceira.

O Polvorín cae diante do Arenteiro logo de oito xornadas invicto (1-0).

Un polémico penalti na primeira metade resultou decisivo para o marcador final no campo do Espiñedo. O Arenteiro, un dos grandes favoritos ao ascenso, deu un paso de xigante para acadar o obxectivo, mentres que o filial albivermello é terceiro na táboa a seis puntos do segundo posto.

Comezaron mellor os locales, pero non tardaron moito os de Álex Ortiz en facerse co seu sitio nun encontro que xa comezou cunha acción polémica. Julen arriscou nunha saída e derribou fóra da área a Sylla. O colexiado, no medio das protestas dos xogadores do Arenteiro, amosoulle cartón amarelo ao gardameta lucense. Nunha primeira metade na que non houbo moitas ocasións de gol, as mellores foron para o Polvorín. Antón Escobar obrigou a intervir a Diego García e Christian rematou desviado un testarazo logo dun centro de Martín. Moi preto de rematar o tempo reglamentario o balón chegou á área lucense logo dun despexe do gardameta local e o colexiado sinalou penalti ao interpretar que Dani Vidal derribara a Marquitos. A acción, moi discutida, rematou co lanzamento de Renan ante o que nada puido facer Julen.

O dominio na segunda metade foi do Polvorín, pero atopouse coa sobriedade da zaga do Arenteiro. Os de Fran Justo amosaron o seu bo facer defensivo e non concederon moitas ocasións ao filial do C.D. Lugo. As máis claras non chegaron ata os últimos compases do encontro. Manu Núñez, cun centro chut, e sobre todo Marcos cun potente disparo desde fóra da área puxeron en apretos a Diego García. O Arenteiro buscou a sentencia á contra coa velocidade de Sylla, que gozou dunha boa oportunidade.

Non puido o Racing Vilalbés puntuar no campo do Choco nun encontro no que foi a remolque (4-3).

Cun partido menos, o adiado a pasada xornada diante do Rápido de Bouzas, e coa derrota sufrida en Redondela, os de Simón Lamas seguen no máis alto do grupo intermedio, aínda que agora cun marxe de tres puntos.

O técnico chairego trocou o sistema de xogo e alineou en Santa Mariña unha liña de tres centrais formada por Vérez, Caballero e Muíña. Unha das grandes novidades no once foi o meirego Marino, que xogou no carril esquerdo. Non tardou o Choco en trastocar os plans do Racing. No primeiro acercamento, Iano batiu a Rumbo cun bo testarazo. Foron momentos de desconcerto dos vilalbeses e o cadro local gozou de ocasións para ampliar a diferencia por medio de Davo, Fran Monroy e do lucense Alberto Suárez. Pouco a pouco o Racing Vilalbés logrou entrar no encontro. Cuadrado asustou e escasos minutos despois Pedrosa igualou a contenda. O ribadense executou á perfección unha falta e o balón colouse na porta defendida por Kevin.

O comezo do segundo tempo foi moi similar ao primeiro. O Choco non tardou en poñerse de novo por diante cun tanto de Caloi. O Racing lanzouse na procura do empate e concedeu espazos ás costas da defensa. Os locales aproveitaron ese feito e Martín fixo o terceiro tanto. Nos últimos minutos chegaron maís goles. Bruno Caballero recurtou diferencias de cabeza, pero Fran Monroy non tardou en lograr o da sentencia. Xa co tempo cumprido, o xuvenil Rares aproveitou un bo balón para rematar dentro da área e facer o terceiro para o Racing.

O Viveiro adiantouse tres veces no Couto pero só puido sumar un punto (3-3).

Un punto importante para o conxunto mariñán na carreira por evitar o descenso a Preferente. Os de Chusky foron quen de adiantarse por tres veces no marcador, pero non mantiveron a vantaxe diante dunha UD Ourense que queda seis puntos por debaixo dun Viveiro que mantén un marxe de tres puntos sobre o quinto posto.

O comezo foi favorable para un Viveiro que non tardou en adiantarse no marcador cun golazo de Asier. O disparo do focense colouse pola escadra de Dani Sampayo. A UD Ourense reaccionou por medio do seu mellor xogador, Raúl Melo. Avisou a primeira vez cun disparo que marchou fora por pouco, pero á segunda acadou o empate tras superar a Manu Cedrón na saída. Non pasaron nin dous minutos e o Viveiro voltou a poñerse por diante. Xaime sacou unha falta lateral e Edgar rematou ante as dúbidas na saída do gardameta local. Aínda con máis de dez minutos para o intermedio, o Viveiro puido poñer terra de por medio con ocasións de Asier e Javi Rey.

Na segunda metade o cadro ourensán foi superior e aos poucos minutos Alfredo cun lanzamento desde fóra da área e De Dios preto estiveron de acadar o empate. Pero foi de novo Raúl Melo que fixo a igualada, cun testarazo a centro do ex do Polvorín Varo. Os de Fernando Currás non se conformaron co empate e lanzáronse a polos tres puntos, mentres que o Viveiro tentou sorprender á contra. Amín, ao pouco de entrar no terreo de xogo, obrigou a intervir con acerto a Manu Cedrón, pero os mariñáns xeraron perigo con transicións rápidas. Nunha delas o central Vieytes derribou na área a Javi Rey e Xaime voltou a adiantar aos mariñáns. E logo de poñerse por diante a terceira vez chegou o terceiro empate. Dani Montes fixo penalti sobre Amín e o propio atacante convertiu a pena máxima. Xa co tempo cumprido Manu Cedrón evitou a derrota cunha boa parada tras un remate espectacular de Cabanyes.

O Partido Fisioterapia Ronda . . . Foz – Ribadeo: unha final anticipada no derbi mariñán de Preferente

A Preferente afronta a súa cuarta xornada e a piques está xa de chegar ao ecuador desta liga exprés e nunha competición de tan curta duración as urxencias non tardan en chegar. É o caso do Foz e o Ribadeo, os dous conxuntos mariñáns que aínda non coñecen a vitoria, e que o domingo ás 17:30 horas no Martínez Otero enfrontaranse nun derbi con sabor a final anticipada. O encontro estará dirixido polo colexiado santiagués Calviño Pensado.

O C.D. Foz, ao igual que os veciños ribadenses, conta con un só punto na clasificación. Foi o sumado na segunda xornada diante da Residencia. Malia non ser quen de acadar un triunfo, os pupilos de Javi Chinchón ofreceron unha boa imaxe en tódolos encontros, caendo pola mínima no campo da Sarriana e o Lemos. Nunha temporada na que o obxectivo do cadro focense é consolidar un cadro de xogadores moi renovado para competir da mellor maneira posible a vindeira temporada, non é desexable quedar lonxe de calquer aspiración aínda na primeira volta do campionato. A chegada de Diego Chao, David Ben, Álex Esquerdeiro, Noceda ou Xesús revitalizaron unha plantilla na que os veteráns como Canario ou Kiko Mariño xunto co recuperado pra causa Dani Chinchón seguirán sendo parte importante do equipo.

Pola súa parte o Ribadeo F.C. afronta esta temporada con tan só sete xogadores que repiten da temporada anterior. A nova directiva encabezada por Pedro Posada voltou a darlle o timón a Rafa Casanova, xa un home da casa, e confeccionou unha plantilla moi competitiva coa chegada de futbolistas como Aitorín, Jairo, Luki ou Javi Fraga, así como do galáctico Berodia, que aínda non puido debutar. Xunto a eles os incombustibles Isma, Santi, Coki, Criss ou Cube. Ao igual que o Foz, as sensacións foron mellores que os resultados. Á derrota da xornada inagural na Pinguela hai que sumar a colleitada no Pepe Barrera diante do Santaballés e tan só foi quen de sumar diante da Sarriana, nun encontro no que quizais mereceu un mellor resultado.

Causará baixa o gardameta Rubén no C.D. Foz e Andrés Bustelo e Dani Chao con molestias é previsible que podan ser da partida. No cadro visitante Marcos Peña, Juanma e Criss non estarán dispoñibles, mentres que Aitorín será dúbida ata última hora.

O último enfrontamento entre os dous conxuntos no Martínez Otero tivo lugar o 10 de novembro de 2019 e rematou con triunfo ribadense por dous goles a catro. Álex Paz e Jesús Pablo anotaron para o Foz, mentres que Brais, Aitor, Criss e Luki marcaron os tantos da vitoria do Ribadeo.

Falamos do derbi mariñán con dous dos encargados da sala de máquinas do Foz e o Ribadeo: Dani Chao e Santi.

QUE OPINAN OS PROTAGONISTAS?

DANI CHAO (C.D. FOZ)

 – O comezo de temporada. “As sensacións son claramente mellores que os resultados nos tres partidos que levamos disputados. Tanto en Monforte como en Sarria puidemos rascar algún punto e contra a Residencia na casa incluso tivemos preto o triunfo. Temos ilusión vendo como competimos tódolos partidos e o gran grupo de xogadores e persoas que formamos no pouco tempo que levamos xuntos”.

O Ribadeo. “Agardo o típico derbi, moi duro pero entretido, con ocasións e creo que levará os tres puntos o equipo que máis acertado esté de cara a portería. Se saímos concentrados, intensos e con confianza co balón creo que podemos gañar. O Ribadeo conta con moi bos xogadores do medio cara adiante. Futbolistas como Jairo, Luki ou Javi Fraga pódenche facer un gol en calquera acción do partido”.

Unha final anticipada. “Está claro que nunha liga con tan poucas xornadas cada partido é unha final, pero a nós a clasificación non nos preocupa. Afrontamos a competición con gañas de aprender e mellorar de cara ao ano que vén, aínda que intentamos competir e gañar cada encontro e o derbi non vai ser diferente. Queremos medrar como equipo e quedar o máis arriba posible”.

SANTI (RIBADEO F.C.)

 – Un punto en tres encontros. “Creo que foron tres partidos ben diferentes. No primeiro algúns xogadores practicamente nin nos coñeciamos. Chegamos cun só amigable e poucos adestramentos. Aínda así competimos ben contra o líder da categoría e na segunda metade creo que fomos superiores. Contra a Sarriana fixemos un moi bo partido e penso que merecemos un mellor resultado. No último encontro diante do Santaballés penalizáronnos as baixas e o cansancio de xogar o xoves e non soubemos estar ao nivel dos dous encontros anteriores”.

O derbi. “Agardo un partido disputado, o típico de rivalidade, pechado, e no que teremos que mellorar se queremos gañar. O que máis me preocupa é que nós saiamos metidos no partido e a por todas. A experiencia díceme que de ser así podemos competir e gañar a calquera. En caso contrario, o máis normal é perder contra calquera”.

A urxencia da vitoria. “É unha liga moi curta e iso condiciónao todo. O equipo está en construcción e chegaron moitos xogadores novos, pero as gañas farán que superemos ese hándicap. Sairemos a disfrutar do fútbol e do derbi e se o logramos estaremos máis preto de gañar e seguir na pelexa”.

Foto de portada: Facebook C.D. Foz