Os bancos do Acebreiro xa teñen donos de cara ao VI All Star Futbolinlugo. Pastoriza acollerá a gran festa do fútbol afeccionado provincial que organiza Futbolinlugo, en colaboración co concello de Pastoriza, a Xunta de Galicia e a Deputación de Lugo. Dos oito adestradores que se escolleron para levar os equipos, catro foron elixidos por votación popular e os outros catro elixiunos a organización do evento.

Os adestradores do encontro feminino do VI All Star Futbolinlugo

O All Star sempre arrinca co tradicional partido feminino entre as seleccións de Lugo Norte e Lugo Sur. O mesmo facemos co nomeamento dos adestradores. A votación popular elixiu a Héctor Expósito da Milagrosa como un dos adestradores despois dunha campaña excepcional do conxunto lucense. Logo de regresar á Segunda Futgal este curso, as capitalinas atópanse na final da promoción de ascenso á Primeira Futgal.

O outro adestrador é un debutante no encontro feminino, pero que xa estivo no All Star. O técnico do Antas, Óscar Méndez, foi elixido entre os lectores de Futbolinlugo para dirixir na festa do fútbol lucense. Todo grazas a unha tempada de volta á categoría na que o Antas estivo a piques de desputar un play off e na que foron a gran revelación da campaña. Cabe destacar como curiosidade que ambos adestradores elixidos na votación serán os dos equipos que se enfronten na final da Copa Deputación.

A organización elixiu a dúas referentes do fútbol feminino. A repetidora da clase é Pili Neira, toda unha figura dos bancos do fútbol galego e que voltará a estar presente no evento máis grande do deporte da nosa provincia. Xunta a ela estará unha das pioneiras da nova era do fútbol feminino galego como é Ana Buceta, no que será o seu debut como adestradora. Milita no Real Oviedo e tamén estivo en equipos como o Málaga ou o Levante. Unha peza chave na historia do fútbol galego que chegou a debutar na Primeira División.

Os adestradores do encontro masculino do VI All Star Futbolinlugo

O público tamén puxo os seus votos para elixir aos técnicos que dirixirán o encontro masculino. Para o equipo que integrarán os xogadores da Preferente e da Terceira Futgal, o técnico será o campión do Grupo Sur Abel Rochela, do Corgo. A tempada do seu equipo foi digna dun equipo para a historia. Non só acadaron un ascenso que pretendían desde hai varios anos, senón que o fixeron marcando o ritmo desde o primeiro día da campaña.

Pola parte do equipo da Primeira e Segunda Futgal, o público elixiu a Traste, técnico do Chantada, para ser quen estea a cargo da selección. A tempada dos chantadeses foi prácticamente perfecta, o que lles fixo voltar á Preferente como campión de grupo e sendo unha auténtica apisonadora. A marcha non baixou durante a campaña e conseguiron un marxe espectacular que lles fixo ser o primeiro campión da Primeira Futgal en conquistar o seu grupo.

Nos elixidos pola organización, dúas grandes figuras do fútbol provincial terán a súa presenza na festa do fútbol lucense. O primeiro pasou por equipos como Sarriana, Racing Villalbés ou Arzúa entre outros e este ano acadou unha permanencia de moito mérito co Viveiro. Alberto López será un dos encargados de dirixir a un dos equipos. No outro banco estará un home que, como segundo adestrador, persigue o soño de facer que o Compostela regrese á Segunda RFEF. Fiz Rodríguez será o segundo técnico elixido que ocupará o banco do Acebreiro.

O menú da gran festa do fútbol lucense

A xornada contará cos tradicionais partidos masculino e feminino así como diversos concursos. Abriremos a tarde ás 16.30 horas co enfrontamento feminino entre Lugo Norte e Lugo Sur. Acto seguido, ás 18.30 horas terán lugar os concursos, a súa inscrición xa está aberta para todos os que queiran participar. Por último, ás 19.45 horas, veremos quen se erixe como gañador do partido masculino entre os combinados de Preferente-Terceira Galicia e o de Primeira-Segunda Galicia.

Entre medias, haberá espazo para as nosas xa tradicionais e emotivas homenaxes, sorteos, sorpresas.