O Antas remontou ante o Atlético Arousana para encadear a súa oitava vitoria, mentres o PM Friol conservou o liderado cun empate no campo do seu perseguidor inmediato. O Chantada tamén segue primeiro tras descansar e o filial friolés reforzou a súa candidatura aos postos altos. Na Terceira Futgal, o Monte Forte estreou a súa conta de puntos cunha goleada no derbi ante o Carballedo.

O PM Friol conserva a distancia no duelo de líderes

O PM Friol saíu do campo do Atlético Villalonga coa súa condición de líder e de invicto intactas. O primeiro e o segundo clasificados da Terceira Federación empataron sen goles nun encontro equilibrado, no que ningún conseguiu inclinar o marcador ao seu favor.

A igualdade mantívose ata o final e o reparto de puntos deixa as friolesas con vinte, un máis que o Villalonga, As Celtas B e o Lóstrego. Despois de seis vitorias e dous empates, o equipo de Geluco Villar continúa á fronte dunha clasificación cada vez máis apertada.

Á Milagrosa non lle chega con empatar dúas veces

A Milagrosa caeu por 2-4 ante o Pastoriza nun partido no que conseguiu repoñerse a dous resultados adversos, pero acabou pagando dous goles case consecutivos na segunda metade.

Maribel adiantou as visitantes no minuto 2. Leire Jauregi igualou no 39, aínda que Candela devolveu a vantaxe ao Pastoriza antes do descanso. As lucenses volveron responder por medio de Miriam no minuto 66, pero a alegría durou apenas un minuto: Maribel marcou o 2-3 no 67 e Antía García ampliou a diferenza no 70. A Mila continúa con dous puntos e sen estrear a súa conta de vitorias.

O Antas remonta para seguir perfecto

O Antas tivo que superar un inicio complicado para vencer por 1-2 o Atlético Arousana. As locais adiantáronse cun gol de Mirian no minuto 12 e dispuxeron de ocasións para ampliar a súa renda durante unha primeira metade esixente para as ulloás.

O empate chegou nun momento decisivo. Yani rematou un córner no minuto 45 e permitiu ao Antas regresar aos vestiarios coa igualdade recuperada. O equipo de Óscar Méndez mellorou tras o descanso e Goico aproveitou un roubo de balón para marcar o tanto da vitoria no 66.

O Antas suma vinte e catro puntos de vinte e catro posibles e queda a un triunfo de completar unha primeira volta perfecta.

Vane marca os catro goles do filial friolés

O PM Friol B impúxose por 2-4 ao Bandeira cunha actuación decisiva de Vane, autora dos catro tantos visitantes. A atacante abriu o marcador no minuto 3 e engadiu outros dous goles no 37 e no 43 para deixar o encontro encamiñado antes do descanso.

O Bandeira reaccionou na segunda metade. Un gol de Ana en propia portaría no minuto 55 e outro de Nerea no 62 reduciron a diferenza ao mínimo. Co partido de novo aberto, Vane apareceu no 88 para asegurar a vitoria.

O filial suma trece puntos en seis encontros e mantense terceiro, a dous do Curtis e a tres do Chantada, ambos cunha situación distinta de partidos disputados.

Ao San Lázaro vólveselle escapar a vantaxe

O San Lázaro empatou 2-2 ante o Victoria FC C despois de chegar ao descanso con dous goles de marxe. As lucenses asinaron unha boa primeira metade, premiada polos tantos de Lucía no minuto 17 e Mireia no 45.

O conxunto visitante elevou o ritmo tras a reanudación e recortou distancias por medio de Uxía no minuto 63. O San Lázaro conservou a súa vantaxe ata o tramo final, pero Andrea marcou no 90 e estableceu o empate definitivo. É a segunda xornada consecutiva na que ás lucenses se lles escapa unha renda de dous goles.

O Antas B paga un partido costa arriba

O Antas B perdeu por 0-4 ante o Rois nun encontro que se lle complicou desde a primeira metade. Un gol de Lidia en propia portaría no minuto 21 colocou por diante as visitantes, mentres as ulloás non conseguiron aproveitar as súas ocasións.

A expulsión directa de Elisa no minuto 69 agravou a situación. Nora transformou un penalti no 70 e volveu marcar no 86. Alicia pechou o resultado desde os once metros no minuto 90. Ao rematar o partido, Belén tamén foi expulsada con vermella directa.

Noe e a defensa sosteñen a Comercial

A Comercial conseguiu a súa segunda vitoria da tempada ao superar por 0-2 o Dodro. A solidez defensiva permitiu ás lucenses manter a portaría a cero e construír un triunfo resolto na segunda metade.

Noe abriu o marcador no minuto 57 e repetiu no 81 para asegurar os tres puntos. O dobrete, acompañado polo bo traballo colectivo atrás, sitúa a Comercial con seis puntos despois de catro xornadas.

O Monte Forte estrea os puntos cunha goleada no derbi

O Monte Forte impúxose por 11-2 ao Carballedo e celebrou a súa primeira vitoria da tempada. Pedemer abriu o marcador no minuto 9, Trenzas ampliouno no 12 e Pedemer repetiu no 19. Paula recortou distancias no 28, pero as monfortinas chegaron ao descanso cun contundente 6-1.

Jesi anotou o segundo tanto do Carballedo no minuto 48, sen alterar o dominio local. Pedemer rematou o encontro con cinco goles e Moji asinou un triplete. Trenzas, Cuba e Marián completaron a conta dun Monte Forte que abandona o último posto da clasificación.

O Chantada segue líder sen xogar

O Chantada descansou esta xornada e conservou o primeiro posto da Segunda Futgal. As xogadoras de Fornas suman dezaseis puntos en seis partidos e manteñen un de vantaxe sobre o Curtis, que disputou un encontro máis. O conxunto chantadino continúa invicto, con cinco vitorias e un empate.