Cómoda vitoria para as friolesas na casa das últimas clasificadas, o CD Romanón. Tres goles de Yoleidis e un de Potassa (0-4) sentenciaron un encontro no que a diferenza de tantos puido ser moito maior se as xogadoras amarelas tiveran un maior acerto de cara a porta.

En canto ao que o partido se refire, pouco hai que dicir. As locais – Romanón – pecháronse atrás para tentar recibir os menores goles posibles, xogando metidas na súa área e dando como resultado un partido aburrido, no que o total dominio do balón era do PM Friol e todo se baseaba en intentar tirar a porta por parte das friolesas e, das locais, que ese mesmo balón non entrara.

Sexa un partido para o gusto dos afeccionados e afeccionadas ou non, os tres puntos valen igual e, ao PM Friol, sérvenlle para acadar a 5ª praza na táboa, colocándose a seis puntos do Play-off de Ascenso, que agora marca o Sárdoma.

Aínda que o partido estivo igualado para ambos equipos, un erro das albibermellas na primeira parte que as xogadoras locais – Tordoia – souberon aproveitar condicionou o partido, cuxo marcador xa non se movería.

Foi un encontro con apenas ocasións para ningún dos dous conxuntos. Porén, o CD Lugo B atopou unha dificuldade engadida para poder desenvolver o seu estilo habitual, xa que o terreo de xogo, moi pequeno, impedíalles despregar o xogo combinativo que adoita caracterizar ás xogadoras adestradas por Iria.

En definitiva, un partido aburrido, sen apenas ocasións de gol na que un erro lugués definiu o partido, que finalmente caeu do lado das locais.

Unha SD Antas irrecoñecible nalgunhas fases do encontro e unha arbitraxe dun nivel «lamentable», segundo fontes da SD Antas, deixan ao equipo do Castro Seoane sen os tres puntos ante un rival directo, o AT Villalonga.

As xogadoras da SD Antas trataban de continuar coa súa boa xeira de vitorias, pero deuse un partido moi incómodo, con moitos erros individuais e ante un equipo, o Villalonga, moi traballado.

O partido comezou da mellor maneira posible, coas locais apretando arriba e tentando chegar rápido á área rival. Nuria, cun disparo dende dentro da área, faría intervir á porteira cunha boa parada.

Nun bo pase de novo de Nuria, Jenny fusilou a portería cun bo golpeo para abrir o marcador: 1-0.

Mais a falta de contundencia atrás e un saque de esquina das rivais libres de marca levounas a empatar o partido. Pero aí apareceu de novo Jenny, que adiantaría ás locais con outro golpeo dende a frontal da área.

Tralo paso polos vestiarios o partido volveuse tolo. A arbitraxe, que no primeiro tempo favorecera, probablemente de forma pouco xusta ás locais, mudou entón as tornas para favorecer no segundo lance ao Villalonga, pitándolles dous penaltis canto menos dubidosos.

O último chegou no minuto 90′ logo de pasar media hora cunha xogadora menos entre as filas da SD Antas. Dese xeito, remataría o partido co 2-3 final.

As friolesas comezaron a segunda volta loitando de ti a ti cunha UD Cee que na primeira volta non lles dera ningunha opción. O PM Friol fixo un partido moi serio a nivel defensivo, un equipo compacto.

O nivel do equipo friolés sube xornada tras xornada e iso nótase. Na primeira metade a UD Cee apenas tivo ocasións e, de feito, adiantáronse as friolesas con gol de Noelia no 22′, o cal as xogadoras visitantes non foron quen de empatar ata xa chegado o 57′.

O PM Friol tratou de buscar balóns en profundidade e a piques estivo de chegar o segundo gol das amarelas, pero o balón non quixo entrar. A sorte púxose totalmente na contra das friolesas que cando o empate parecía claro, e xusto, no minuto 94 unha xogada desafortunada acabou co gol da UD Cee para levar os tres puntos que, por sensacións, non lle pertencían.

Un 8-0 é un partido que só tivo unhas donas, e esas foron as locais, as xogadoras do CD Valladares que, con esta vitoria e despois do tropezo da SD Antas ante o Villalonga, colócanse como primeiras clasificadas.

Pola súa banda, a SD Chantada, que mellorou moito na segunda parte; suma con esta a súa 11ª derrota en 15 xornadas, o que as coloca 13ªs na táboa, en postos de descenso mais tan só a un punto do Lóstrego, rival que marca a salvación e que ten tan só un punto máis que as chantadesas.

Na seguinte xornada Chantada agarda a visita doutro dos equipos fortes da liga, a SD Antas.

As xogadoras de rosa saíron con todo ao campo e o gol non tardou en chegar. Xa no minuto 2, despois dunha gran xogada combinativa do equipo, Diana Picos encargouse de abrir o marcador ante a SD Negreira no Cepelo. Pero as gañas de máis eran latentes e o Carballedo seguiu xogando coa mesma intensidade, tocando o balón e dominando o partido no campo contrario.

Tampouco tardou en chegar o segundo gol, das botas dunha habitual nos tiros de falta, Ana Lamas, quen cunha das súas particulares xenialidades puxo o 0-2. Pero o Carballedo seguía con fame, saíndo con todo a atacar. Iso costoulles o gol do Negreira, que nunha contra conseguía anotar para recurtar distancias (1-2) no minuto 32 do encontro.

Mais de novo Ana Lamas sería a encargada de mandar o partido ao descanso cun colchón de 2 goles para o Carballedo, anotando o seu segundo tanto no partido, o terceiro do equipo, no minuto 41′ (1-3).

Á volta dos vestiarios o dominio seguía sendo das ‘guerreiras’ e o bo xogo despregado viuse premiado con dous goles de Ari, no minuto 73 e no 78 (1-5). As gañas de seguir anotando non baixaron nas filas do Carballedo e sería, de novo Ana Lamas, quen no minuto 85 poría o definitivo 1-6 para sentenciar o partido.

Cun xogo combinativo de calidade, boas triangulacións e unha presión intensa cando as rivais tiñan o balón encargándose de que o partido se xogara no campo rival, a Comercial impúxose con contundencia ante o Trazo.

Abriu o marcador para as locais (Comercial) Lara Carrera no minuto 10. No 38′, foi Aroa Puente a encargada de aumentar a vantaxe. Porén, tan só 3 minutos despois o Trazo recurtaba distancias (2-1) grazas ao tanto anotado por Antía Bello. Mais lonxe de servir para que as xogadoras da Comercial se puxeran nerviosas e as do Trazo se botaran arriba, o que ocorreu foi o contrario. O xogo da Comercial mellorou, cun equipo máis sólido, con máis gañas de ir a polo partido e amosar que os tres puntos deste encontro non se ían marcar do Rodríguez Lago.

Kathy, no 53′, devolvía a distancia de dous goles ao seu equipo anotando o 3-1. Dez minutos despois, Aroa voltou a marcar para pór o 4-1.

No 75′, o Trazo recurtou de novo distancias mediante un gol de Kelly (4-2) pero unha inspirada Kathy volvía deixar claro, poñendo o 5-2 tan só uns minutos despois, que a Comercial saíra ao campo para levar os tres puntos e ningunha outra opción era posíbel.

Aínda que o San Lázaro non saiu de todo ben ao partido, con falta de intensidade, mentres que as xogadoras do Órdenes si saíron metidas no partido, o San Lázaro puido manter a súa porta a 0 durante eses primeiros intres de dúbidas.

Pouco a pouco o San Lázaro foise metendo no partido e, no momento no que Anita abriu o marcador, o partido mudou. Xa co segundo gol do San Lázaro, de penalti, tamén tirado e anotado por Anita, o Órdenes baixou os brazos e por enriba delas pasou o San Lázaro como unha treboada total.

Anita firmou os 4 goles do seu equipo que remataría gañando 0-4 a domicilio para devolver ao equipo á senda da vitoria e colocarse na segunda posición da táboa.

As locais foron quen de dominar o partido e acabar con vitoria pese a xogar os últimos minutos con unha xogadora menos, trala expulsión por dobre cartón amarelo de Antía Penas.

O primeiro dos goles do partido chegou das botas de Irene García para adiantar á Milagrosa (1-0) no minuto 44. Á volta dos vestiarios, o Monte Forte empataba o partido grazas ao gol de penalti de Nerea Pereiro.

Mais Valeria encargaríase de volver a pór por diante ao seu equipo, a Milagrosa, cun gol no 52′. Xa no 70. ampliaría distancias Daniela Castro 3-1, mais no 80′, o partido volvía a abrirse co gol de Laura Correas para o Monte Forte (3-2) e a Milagrosa xogando cunha menos. Aínda así, o marcador non voltou moverse e, finalmente, os tres puntos quedaron no Luis Gorgoso para as locais.