O Racing Vilalbés golea en Noia e achégase á quinta praza

Tan só catro xornadas restan para a finalización da Terceira e o Polvorín mantén o liderado logo do seu triunfo diante do Estradense. O Racing Vilalbés gañou no campo do Noia e achégase aos postos de play off, mentres que o Viveiro empatou co Rápido de Bouzas e mantén sete puntos de vantaxe coa zona de perigo. Na Preferente, a Sarriana é líder do grupo de ascenso tras golear na Ribela ao Fisterra, mentres que o Lemos caeu pola mínima diante do Paiosaco. Na pelexa pola permanencia Residencia e Ribadeo igualaron na Cheda e o Santaballés goleou ao Escairón. O Foz descansou nesta xornada.

Luca´s Grill
Moreno´s Pizza

Tres goles en dez minutos do Polvorín diante do Estradense manteñen ao filial na primeira praza (3-0).

Encontro no que os de Álex Ortiz levaron o temón desde o comezo e gozaron de numerosas ocasións para poñerse por diante no marcador, pero o tanto tardou en chegar. Xurde, Leandro e Álex Ramos tiveron as máis claras para o Polvorín nun primeiro tempo no que o Estradense, que chegaba nunha boa racha de resultados, só se achegou á portería de Julen en dúas ocasións.

Deportes Élide

No comezo da segunda metade os visitantes comezaron mellor, pero pouco a pouco o Polvorín voltou a controlar o xogo. A falta de vinte minutos para o final nun rexeite do gardameta Coke, Leandro fixo o primeiro. A partir de aí todo foi máis sinxelo para o filial albivermello. En dez minutos o partido quedou sentenciado con dous tantos de Idrissa tras sendos centros laterais.

O triunfo do Racing Vilalbés en Noia achega aos chairegos á quinta praza (0-3).

Primeira parte de moita igualdade, aínda que o Racing Vilalbés foi lixeiramente superior. O Noia apenas xerou perigo en dous saques desde o curruncho, mentres que os chairegos chegaron con perigo por medio de Ángel e Javi Rey, mentres que Otero protagonizou a mellor ocasión dos primeiros corenta e cinco minutos.

Na segunda metade os de Simón Lamas foron moi superiores ao Noia, sobre todo logo da entrada no terreo de xogo de Pedrosa, Rares e Cuadrado, que lle deron ao Racing moita frescura en ataque. O primeiro tanto chegou no ecuador do periodo final. Un balón largo de López deixouno Otero de cara para que Pedrosa cun tiro cruzado colocara o esférico lonxe do alcance do gardameta. Cinco minutos máis tarde, a presión alta de Rares fixo que este lle roubase o balón a rivas e o xove atacante fixo o segundo. O terceiro tanto foi un golazo espectacular de Pedrosa, que tras recurtar a un zagueiro colocou o balón na escadra.

Nos últimos intres o encontro abriuse e o Noia xerou certo perigo, cun lanzamento de falta de Anxo que detivo ben Ángel Fraga.

O Viveiro empata co Rápido de Bouzas e suma a décima xornada sen perder (0-0).

O conxunto mariñán prolongou a súa boa xeira logo de empatar en Cantarrana diante do Rápido de Bouzas, un dos candidatos a xogar a vindeira temporada en Segunda RFEF. Décima xornada sen perder e cuarto empate consecutivo dun Viveiro que mantén oito puntos sobre os postos de descenso e sete sobre o Noia, que ocupa o posto de descenso condicionado.

O fútbol visto no campo viveirense non foi especialmente vistoso, especialmente na primeira metade. O cadro local estivo moi atinado en defensa, sen conceder practicamente ocasións ao seu rival. Preto do intermedio un bo centro de Asier a piques estivo de chegar ao remate Tichu, na mellor ocasión dos celestes. Na segunda metade o Viveiro chegou con máis perigo á portería rival e o gardameta Álex Vila convertiuse nun dos mellores xogadores do cadro vigués. Rolle e Dani gozaron das ocasións máis claras para os de David Páez.

A Sarriana golea na Ribela ao Fisterra e segue no máis alto na pelexa polo ascenso (5-2).

Triunfo claro e convincente da Sarriana diante dun dos firmes candidatos a pelexar polo ascenso. Os de Edu Rodríguez foron mellores ao longo de todo o encontro, malia que o Fisterra logrou igualar o marcador en dúas ocasións. Na primeira metade, o conxunto local tivo varias ocasións para marcar, pero quen o logrou foi Omar preto da media hora de encontro. Non tardou o Fisterra en lograr o empate cun bo lanzamento de falta de Cespón. A Sarriana non acusou a igualada e Jacobo voltou a adiantar a Sarriana antes do descanso cun golazo pola escadra.

Logo do paso por vestiarios non tardou en chegar o segundo tanto dos de Juan Porrúa, nun desaxuste defensivo local que aproveitou Estévez. Pero os sarriaos repoñíanse de cada golpe e na seguinte xogada Diego Torres fixo o terceiro. Ata o minuto 90 non chegou a sentencia con tantos de Gerardo e Álex Pérez, pero en ningún momento perigou o encontro para a Sarriana.

Un gol no comezo do encontro do Paiosaco frustra as esperanzas do Lemos na Pinguela (0-1).

Marcador xusto para o visto ao longo dos noventa minutos no feudo monfortino. O Lemos non entrou ben ao partido e o rival superouno en concentración e intensidade. O Paiosaco foi moi superior no centro do campo e Cristian e Álex Pérez convertíronse nun quebradeiro de cabeza para a zaga local. Aos catro minutos chegou o único tanto do encontro. Iván Amor asistiu e Cristian rematou ao fondo da portería. Os visitantes tiveron os mellores minutos e Pablo tivo nas súas botas o segundo. A ocasión máis clara chegou tras un penalti cometido por Ivo que lanzou Cristian pero detivo moi ben Losada. Sobrepasada a media hora de xogo, o cadro local trocou de sistema e controlou mellor o partido.

A segunda metade foi dominada polo Lemos desde o comezo. A entrada de Álvaro e Diego Arias déronlle outro aire ao equipo, pero a falta de acerto no remate truncou as esperanzas monfortinas.

O Ribadeo prolonga a súa boa xeira logo de empatar diante dun bo Residencia (1-1).

O derbi provincial entre a Residencia e o Ribadeo rematou en empate. Na primeira metade apenas se viron ocasións de gol. O conxunto local levou a iniciativa, pero os mariñáns ben situados en defensa apenas concederon ocasións, salvo unha de Yeray que rematou fóra desde dentro da área.

A segunda metade foi máis vistosa e ámbolos conxuntos buscaron o tanto do triunfo, aínda que as ocasións máis claras foron para os de Dani Galán. No minuto 66 un centro de López rematouno Sergio de cabeza na área pequena ante o que nada pode facer Dos Santos. Txiki puido sentenciar nun remate que saiu fóra por pouco. A falta de cinco minutos para o final nun erro na saída de balón da Residencia chegou o empate por medio de Diego Núñez. No desconto, o propio mediocentro ribadense puido culminar a remontada cun testarazo que detivo Diego Bravos.

O Santaballés gola ao Escairón e pon a primeira pedra para a permanencia (5-1).

O Santaballés comezou con bo pé a fase de permanencia, mentres que o Escairón colleitou a segunda derrota noutros tantos encontros e queda sen marxe de erro para os vindeiros encontros.

O partido comezou igualado, pero os locales non tardaron en adiantarse no marcador cun disparo de Palomo que desviou Yago ao fondo da portería. O Escairón buscou o empate e tivo unha boa ocasión que parou ben o gardameta Ivo. Os de Jorge Rodríguez perdoaron e os chairegos puxeron terra de por medio cun tanto de Miguel. O tanto deulle tranquilidade ao Santaballés que foi quen de controlar ben o encontro, sobre todo coa consecución do terceiro gol, o mellor da tarde, obra de Palomo.

A segunda metade comezou con dous tantos en menos de cinco minutos. Toto recurtou diferencias para o Escairón, pero tan só dous minutos máis tarde Dani San cun bo lanzamento fixo o cuarto. Os de Juan Rodríguez gozaron dos seus mellores minutos, nos que adecuaron o ritmo de encontro ás súas necesidades e mesmo gozaron de varias ocasións á contra. Na última xogada do encontro Hugo fixo o quinto e definitivo gol.

Imagen por defecto
Marcos Fernández

Apaixoado do fútbol, en especial do modesto, que aínda mantén os verdadeiros valores do deporte

Artículos: 499

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.