O Polvorín vence e recupera o primeiro posto de Terceira

O triunfo do Polvorín diante do Arnoia e a derrota do Somozas diante do Ourense fixeron que o filial albivermello volva ao primeiro posto de Terceira. O Racing Vilalbés continúa na sexta praza logo de empatar sen goles co Rápido de Bouzas e o Viveiro sumou outro punto en Cantarrana diante do Silva. Na Preferente, o Ribadeo non puido clasificarse para a fase de ascenso ao empatar sen goles diante do Betanzos. Non tería opción debido ao triunfo do Mugardos na Pinguela diante do Lemos. A Sarriana gañou na Ribela ao Victoria e a Residencia empatou na Cheda co As Pontes e o Santaballés na Grela diante do Montañeros. O Foz caeu goleado no campo do San Tirso.

Luca´s Grill
Moreno´s Pizza

O Polvorín recupera o liderado de Terceira logo de derrotar ao Atlético Arnoia (2-0).

Encontro difícil para o Polvorín diante dun Arnoia que defendeu coas liñas moi xuntas que dificultaba o xogo combinativo do filial lucense. Os visitantes buscaron xerar perigo en rápidas saídas á contra e tamén en xogadas a balón parado.

Deportes Élide

Ata a segunda metade non se viron goles no Municipal de Pol. Un bo centro de Expo rematouno Idrissa de cabeza superando ao gardameta ourensán. Co marcador a favor o encontro abriuse e os de Álex Ortiz atoparon máis espazos para chegar con perigo á área rival. Moi preto do final chegou a sentencia cun pase atrás de Leandro que rematou Rojo ao fondo da portería.

Co triunfo lucense e a derrota do Somozas no Couto, o filial albivermello recupera o primeiro posto de Terceira.

O Racing Vilalbés igualou sen goles diante do Rápido de Bouzas, rival directo na pelexa pola quinta praza (0-0).

O conxunto chairego non puido superar ao Rápido de Bouzas na Madalena nun encontro moi parello e pechado no que o xogo non resultou fluido. Na primeira metade o Racing só chegou nunha ocasión con perigo á portería contraria nun remate de Otero que despexou Álex Vila a córner. O cadro vigués gozou de dúas ocasións moi claras. Adrián e Álex Rey atopáronse con dúas intervencións de mérito de Ángel Fraga.

Na segunda metade os dous equipos trataron de non cometer erros para non perder o encontro, pero foron os de Simón Lamas quen gozaron das ocasións máis claras, sobre todo despois da entrada no rectángulo de xogo de Rares. O canteirán con dous disparos preto do pao estivo a piques de desnivelar o marcador.

O Viveiro suma un punto diante do Silva e pon outra pedra para acadar a permanencia (1-1).

Sexta xornada consecutiva sen perder para un Viveiro que punto a punto ten a permanencia máis preto. Non comezou ben o encontro para o Viveiro. Aos cinco minutos adiantouse o Silva cun gol de Álvaro Rey. Poucas ocasións se viron nunha primeira metada na que o conxunto coruñés impuxo a súa solidez defensiva. Tan só Tichu foi quen de rachar a ordeada zaga dos de Bardanca cun lanzamento que se estrelou no longueiro.

Na segunda metade David Páez moveu o banquiño coa entrada de Asier, Pablo Rey e Rolle e o equipo mellorou e volcouse na procura do empate. Berrocal contou cunha boa ocasión, pero houbo que esperar ao minuto 85 para que os celestes igualaran o choque cun bo tanto de Dani Fernández.

A Sarriana venceu na Ribela a un combativo Victoria (3-1).

A primeira metade tivo clara cor visitante. O conxunto coruñés saiu moito máis metido no encontro que a Sarriana e contou con varias ocasións claras para marcar ante as que respostou ben Parapar, que volveu á titularidade do conxunto sarriao. Malia todo os primeiros corenta e cinco minutos remataron sen goles.

Logo do paso por vestiarios os de Edu Rodríguez melloraron, sobre todo en actitude e en dez minutos encarrilou o encontro con goles do xuvenil Hamza e Omar. O Victoria non se rendiu e recurtou diferencias cun golazo de falta de Raña. Xa co tempo cumprido outro xuvenil Rubén Mourelo, que debutaba co primeiro equipo, sentenciou o encontro.

As baixas pasaron factura ao Lemos que cedeu na Pinguela diante do Mugardos (2-3).

Con dez baixas afrontou o cadro monfortino o último encontro da primeira fase. Sen nada en xogo clasificatoriamente falando, os de Alberto López foron superiores na primeira metade a un Mugardos que poñía en xogo o seu pase á fase de ascenso. Aos vinte minutos de xogo, Mauro, o mellor dos locales, fixo o primeiro e xusto antes do intermedio a piques estivo de poñer terra de por medio.

Na segunda metade o técnico visitante moveu o banquiño e os de ferrolterra melloraron de xeito considerable e antes dos dez minutos de xogo remontaron o choque con goles de Sergio e Quique. O Lemos foi quen de volver a meterse no partido e logrou o empate por medio de Sidibé que tería que abandonar o encontro con molestias pouco despois. Nun erro de concentración da zaga monfortina Permuy logrou o terceiro gol que clasificou ao Mugardos para a fase de ascenso.

O Ribadeo empatou sen goles co Betanzos e xogará a fase de permanencia (0-0).

Once xornadas sen coñecer a derrota e catro sen encaixar un gol non foron dabondo para que o Ribadeo lograra a permanencia pola vía rápida. Era obrigado o triunfo diante do Betanzos e que o Mugardos pinchara na Pinguela. Nin unha cousa nin outra e os de Dani Moirón, con 37 puntos terán que pelexar por manter a categoría na compricadísima fase de permanencia.

A primeira parte foi de completo dominio local. Nada máis comezar o encontro Santi inventou un pase maxistral para Matelo que regateou ao porteiro pero a rapidez do zagueiro impediu o remate do ribadense cando tiña a portería para él. Pouco despois invertíronse os papeles e o centro de Matelo rematouno de cabeza Santi preto do pao. O propio Matelo disparou preto da escadra logo dun rexeite da defensa visitante e pouco despois os ribadenses reclamaron penalti sobre Santi que o colexiado non sinalou. O Betanzos apenas inquedou a portería defendida por Dos Santos.

Na segunda metade o Ribadeo acusou a precipitación e estivo moito máis impreciso co balón e ata os últimos compases apenas creou situacións de gol. O cadro visitante mellorou cos trocos e aínda que non tivo ocasións para adiantarse no marcador, a entrada de Óscar Martínez deulle moita máis presencia en área rival. Nos últimos intres, coa entrada do xuvenil Diego o Ribadeo buscou o tanto do triunfo. A ocasión máis clara tívoa Iván, pero o seu disparo despexouno Antón nunha boa intervención.

O bo encontro da Residencia rematou en empate diante do As Pontes (2-2).

Gran actuación do cadro adestardo por Dani Galán para rematar a primeira fase. Aos vinte minutos do partido Yeray aproveitou un bo centro de Iván e cun bo testarazo inaugurou o marcador. Co marcador a favor chegaron os peores minutos do conxunt lucenses. Dous erros defensivos da Resi castigounos Lucky con dous tantos cos que o As Pontes se marchou ao descanso con vantaxe no marcador.

Na segunda metade o conxunto local gozou de numerosas ocasións de gol. Unha vaselina de Borja Rasilla que sacou un defensa preto da liña foi a primeira e o xuvenil Javi Calderón, no día do seu debut, tivo tres claras ocasións que non foi quen de aproveitar. O empate chegou no minuto 68 nun balón ao espazo de Dani Renda que Borja Rasilla controlou e definiu ben diante do gardameta visitante.

O Santaballés sobreponse ás innumerables baixas e empate no campo do Montañeros (2-2).

O conxunto coruñés tivo o dominio do balón durante a primeira metade, pero sen xerarlle perigo a un conxunto chairego que logrou adiantarse preto da media hora de xogo nun lanzamento de falta de Palomo. Puido facer o segundo Miguel, pero o seu tiro rematou no longueiro. O Montañeros logrou o empate na última xogada do primeiro tempo cun golazo de Rubén Rivera.

A segunda metade comezou da mellor maneira para os de Juan Rodríguez. De novo Palomo viu porta logo de superar ao gardameta cunha vaselina. Ata os últimos quince minutos o encontro seguiu o mesmo guión. O conxunto local tiña o balón, pero sen inquietar a área chairega. Sen embargo no tramo final, o Montañeros aproveitou o baixón físico dun Santaballés no que as incontables baixas fixeron que o gardameta suplente Adrián tivera que entrar como xogador de campo en sustitución de Soto. No minuto 85 André igualou cun certeiro testarazo ante o que Ivo nada puido facer.

O Foz caeu goleado diante dun San Tirso con máis en xogo (4-1).

O cadro mariñán non puido sacar nada positivo da súa visita a O Monte. O San Tirso, aínda con opcións de evitar a fase de permanencia, amosou que tiña máis en xogo que un Foz que voltou a amosar a súa falta de pegada. Na primeira metade tan só se viu un gol, o anotado por Xian desde fóra da área que se colou pola escadra de Rubén.

Na segunda metade Segade anotou o segundo ao sorprender á zaga focense e Denis, ex do Racing Vilalbés e Polvorín sentenciou o encontro aínda con vinte minutos por diante. A falta de cinco minutos para o final o veterán César fixo o cuarto. Co tempo cumprido Diego Vicente aproveitou a relaxación local para anotar o tanto da honra.

Imagen por defecto
Marcos Fernández

Apaixoado do fútbol, en especial do modesto, que aínda mantén os verdadeiros valores do deporte

Artículos: 499

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.