O pasado domingo, na final da copa de Preferente e Primeira, rematou oficialmente a temporada. O Outeiro de Rei proclamouse campión logo de superar por 2-3 ao Chantada Atlético no campo da Medela «Canti», en Taboada.
A fin de semana do All Star 2022 puxo o broche de ouro a unha temporada atípica, aínda coa Covid rondando e con datas un tanto estranas, pero tamén a unha temporada moi ansiada por todos os que conformamos o fútbol lucense. Logo do bo ambiente vivido en Carballedo o sábado, a Medela vestiuse de gala o domingo, con dúas afeccións volcadas e moi numerosas.
Foi mellor o Outeiro na primeira metade, chegando con claridade á meta defendida por Iván. Unha das chegadas mesmo petou no longueiro. Os chantadinos, pola súa banda, pecaron de nerviosismo, algo que aproveitou o Outeiro para facer o 0-1 xusto antes do descanso.
Porén, o gol non sentou mal a un Chantada Atlético que saíu moito mellor no segundo tempo, na procura do empate. A mala sorte cebouse cos atléticos, pois un esbarón do seu gardamallas no 54′ traduciuse no 0-2 a prol dun Outeiro moi sólido durante toda esta edición da copa.
Non se renderon os «locais», que fixeron o 1-2 pouco despois. Pero o convencemento do Outeiro permitiulles aos chairegos facer o 1-3 no 83′ nunha bonita acción. Na recta final, o Chantada Atlético fixo o 2-3 e mesmo puido empatar no último suspiro... pero finalmente o título marchou para a Terra Chá logo dun duelo precioso entre dous equipos que buscan entretener co seu fútbol.
