Os máxicos da Primeira viviron unha xornada marcada polos longos desplazamentos, en particular os clubes da Mariña ou os que se tiveron que desprazar desde ela.
Taboada 0-2 Castro: un tempraneiro gol de Ivi puxo o choque de cara para os visitantes, que non pasaron apuros no primeiro tempo e conseguiron o 0-2 antes do descanso por medio do sobranceiro Rodolfo. O Taboada saíu ben tras o descanso e tivo opcións para recurtar diferenzas, pero os vermellos tiraron de oficio e deixaron a portería a cero.
Antas 1-2 Santaballés: partido de moita disputa no Castro Seoane. Os locais adiantáronse ao pouco do comezo e contiveron ben as ofensivas visitantes, pero un gran gol de falta de Palomo puxo o 1-1 no 44′. O segundo tempo foi máis aberto, pero foi o Santaballés o que puido celebrar tras o 1-2 de Álex Novás na recta final.
Lourenzá 1-2 Monterroso: tivo máis protagonismo o Monterroso no primeiro tempo, pero o Lourenzá puido anotar nun saque de esquina que sacou baixo paus o conxunto visitante. Ao descanso chegouse cun 0-0 que non duraría moito máis, pois David e Lorenzo puxeron o 0-2 en apenas cinco minutos. O ‘Atleti’ apretou na recta final, conseguindo o gol de Yago, pero non puido sacar puntos do seu feudo nesta ocasión.
Pastoricense 2-1 Chantada Atlético: primeira victoria da temporada para un Pastoricense que está demostrando que non baixan os brazos e se aferran a categoría. Os visitantes comezaron por diante, e co 0-1 chegouse ao descanso. Uns locais moi intensos empataron nada máis comezar o segundo tempo, e Diego puxo o 2-1 no 75′ para darlle a volta ao electrónico e dar aos da Pastoriza a primeira gran alegría da 22/23.
Sporting Pontenova 0-1 Outeiro de Rei: partido moi disputado na Mina. O Outeiro levou o peso de xogo e gozou dun penalti no primeiro tempo, que detivo o meta local. O segundo tempo foi máis trabado, pero un roubo visitante en saída de balón permitiu a Diego Redondo facer o 0-1 co que concluiría o choque pese aos esforzos locais por conseguir o empate.
SD Chantada 0-1 Pol: un bon gol de Gerardo nunha das primeiras accións do choque puxo de cara o partido para o Pol. Pese ao repliegue dos visitantes tras o 0-1, a SD Chantada mellorou no segundo tempo e gozou de ocasións para empatar o partido, pero o gol non entrou. Tamén puido sentenciar o conxunto visitante en saídas rápidas, pero o marcador non se moveu e o Chantada coñeceu a derrota logo de tres meses.
Burela 2-1 Foz: o accidentado derbi da Mariña cumpriu coas expectativas dos siareiros. O Burela cedeu o balón ao Foz e se defendeu ben ao longo do primeiro tempo, ata que Jairo Campo fixo o 1-0 tras un roubo e unha boa triangulación. Os visitantes saíron en tromba na segunda metade e conseguiu o empate cun golazo de Dani Chao. Tras o 1-1, o partido rompeuse e ambos equipos puideron anotar, pero sería Jairo Campo o que inclinase a balanza a prol dos locais tras un centro lateral no 93′.
Atlético Escairón 5-1 Xove Lago: dominio do Escairón, que xa mandaba por 1-0 no minuto 5′. Porén, o Xove repúxose ao gol local e tivo momentos de control ao longo da primeira metade, pero non logrou o empate. Un gol de Óscar tras unha boa xogada de Armesto ao comezo do segundo tempo puxo o 2-0 que afundiu aos visitantes e, a partir dese momento, os locais sentenciaron con tres goles máis. O Xove anotou o gol da honra logo dun saque de esquina.
San Ciprián 0-1 Riotorto: un gol a saída dun córner deu os tres puntos a un Riotorto que xogou as súas bazas na Veiga e tivo ocasións para poñer o 0-2 antes do descanso. Un Sanci máis intenso levou o peso do xogo no segundo tempo, incluso despois de quedar cun xogador menos, e puido anotar en varias ocasións na recta final, pero o balón non entrou e o resultado non se moveu.
