Os datos das once primeiras xornadas en ‘O Noso 11 A Chaira’: 

Jonny e Carlos entraron nos locais no segundo tempo. Activaron máis o xogo por dentro e tentaron buscar o gol. Nunha acción a balón parado chegou o único tanto do encontro. 

O Abadín queda na zona media baixa da táboa con once puntos. Ten dous de marxe sobre o descenso directo e tres equipos polo medio. Este domingo vivirá un duelo de proximidade ante un rival directo. Xoga ás 16h no Municipal precisamente co club que marca a zona de descenso, o Muimenta. 

O Pastoricense venceu ao Folgueiro nun dos partidos da xornada. O cadro da Pastoriza amplía diferenzas cun rival directo. Nove puntos de diferenza entre o 2º (26) e o 5º (17). A pesar da derrota, o Folgueiro mantense en zona de promoción (igualado a puntos co Sporting Pontenova que é 6º). 

O encontro xogouse en campo artificial, no anexo do Municipal de Xove. Non se adaptou no primeiro tempo o cadro que exercía como visitante. O Folgueiro non creou perigo excesivo, pero si tiña máis controlado o partido. 

Con todo, un disparo dende fóra da área de Borja permitiulle ao Pastoricense poñerse por diante. Ao pouco, o Folgueiro logrou empatar. Logo do descanso, Kanuto marcou o segundo noutro tiro dende fóra da área. Despois houbo ocasións para ambos, pero o marcador non se moveu.

O ‘rei do empate’ perxudica ao Racing Villalbés B

O duelo chairego entre o Xermade e o Racing B era outro dos encontros da xornada. Rematou en empate. O sétimo do Xermade que queda a un punto da zona de promoción. Queda a sete do filial racinguista que agora é 3º. O Racing B era o líder dende a primeira xornada. Agora está a dous puntos. 

No primeiro acto tivo máis control de balón o filial. O Xermade puido marcar nun tiro de Andy dentro da área. Pero foi o Racing B quen se puxo por diante. Un tiro dende fóra da área, petou en dous defensas e entrou na portería. 

Apertaron os locais na segunda parte. Andy igualou de falta. Tivo as súas oportunidades o Racing B para volver mandar no marcador pero Ángel Prieto estivo ben baixo paus.

O San Ciprián é 4º

O Sanci volveu ao camiño da vitoria no Pichón. Superou ao Muimenta e está na zona de privilexio. Un punto de vantaxe con respecto ao 6º (Sporting Pontenova). E a 8 puntos da cabeza da clasificación. O Muimenta acumula seis derrotas seguidas. Entra en descenso directo, a un punto da salvación. 

Púxose o partido de cara para os visitantes. Adiantáronse no marcador ao cuarto de hora por medio dun penalti. Ao pouco de iniciar o segundo tempo, Antón marcou o segundo. O Muimenta quedouse con dez e semellaba que o partido estaba decantado. 

Con todo, o cadro celeste logrou apertar ao rival. Marcaron un gol e tiveron algún achegamento máis. O empuxe durou ata que Borja Mella marcou o terceiro e Xoel sentenciou co cuarto. 

O Sporting Pontenova volve estar preto do play off

A segunda vitoria seguida volve situar ao Sporting Pontenova preto da zona de promoción. De feito, ten os mesmos puntos (16) que o 5º (o Folgueiro). Derrotou a un rival directo por eses postos, o Cospeito. Logo do triunfo do derbi na fin de semana anterior, os pupilos preparados por Luis Romay quedan a dous puntos da zona de fase de ascenso. 

Os erros en área propia custáronlle caro ao Cospeito. O Sporting Pontenova comezou gañando por medio dun penalti. Os visitantes lograron empatar. Pero en cinco minutos, dous erros en defensa posibilitaron dous goles rivais. 

Seguiuno intentando o Cospeito que recurtou diferenzas nun partido máis aberto. Os locais botaron man da contra e noutro erro visitante, chegaría o cuarto. 

O Alfoz escapa da zona baixa

O Alfoz suma o terceiro triunfo nos últimos catro partidos. Superou a un rival directo como o Cabreiros. Queda na zona media da táboa, a dous puntos da zona de privilexio. O Cabreiros continúa 13º, un punto por riba do descenso directo. 

Foi un encontro con varias interrupcións no xogo. Dos golpes saíu mellor parado o Alfoz. Púxose por diante no primeiro tempo. No segundo acto, o Cabreiros quedou cun futbolista menos por segunda semana consecutiva. Expulsaron a Pani (foi sancionado con tres encontros) e os locais anotaron o segundo. 

Tentou o Cabreiros a igualada, pero non deu chegado. Cazás foi o único que estivo atinado coa portería rival. 

O Mondoñedo sorrí un mes despois

O Mondoñedo saíu da zona de descenso directo. Volveu gañar logo de catro xornadas sen facelo. Logrou os tres puntos ante a Comercial. O cadro mindoniense queda dous puntos por riba da zona de perigo directo. A Comercial é 10ª e marca a zona media. Está a catro puntos do play off e a catro da zona de descenso. 

A Comercial sobrepúxose a comezar perdendo, pero continúa coa dinámica de perder puntos nos últimos minutos dun partido. Aos locais saíulles o corazón de xogar no Viñas da Veiga e remontaron un encontro. Tres puntos moi importantes. 

A boa nova para a Comercial estivo no regreso de Botana. O central levaba varias semanas de ausencia por lesión. 

O Roupar gaña por primeira vez no curso

Despois de dez xornadas, o Roupar logrou desafogarse ao sumar de tres por primeira vez. Fíxoo ademais ante a Candelaria, un rival directo nestes momentos. 

O cadro preparado por Diego Dopico foi capaz de deixar a portería a cero. Colócase a seis puntos da salvación, que precisamente marca a Candelaria. 

Non foi un encontro moi vistoso. Pero ao Roupar tamén lle acompañou a sorte que lle fallara xornadas atrás. Lograron marcar dous goles e manter a seguridade defensiva. 

O Cabreiros é 13º con dez puntos. A Candelaria ocupa a antepenúltima posición con dez puntos. En descenso directo están o Muimenta (9 pts.) e o Roupar (4 pts.).

Sexta vitoria seguida do Oural

O Oural continúa a un ritmo extraordinario. Sumou o noveno triunfo do curso e acumula 28 puntos. Segue tendo seis de marxe sobre o Friol (2º) e e once sobre o Brollón (6º – un partido menos). 

Unha vez máis a pegada do cadro do Luis Pallín foi decisiva. O Oural superou ao San Lázaro con tres goles no segundo tempo. E iso que quedou cun xogador menos pola expulsión de Abreu. Volveu marcar Mario. Anotou un dobrete e alcanza xa os 15 goles. Tamén marcou o ‘9’ local, Diego Díaz. 

O Friol volve á segunda posición

O cadro friolés volveu ao camiño da vitoria. Derrotou na Reigosa ao Carballedo. Na casa só o Becerreá lle quitou os puntos en xogo. Queda a seis puntos do líder. Cinco por riba da sexta posición. O Carballedo segue na parte media-baixa da táboa con tres puntos de marxe sobre o descenso directo. 

Ao Friol custoulle poñerse por diante. Tivo que ser de penalti. A partir de aí anotou dous goles máis. Con todo, o Carballedo tamén tivo algunha ocasión para meterse no partido. 

O Ferreira, gran vitorioso da xornada na promoción

A terceira posición está ocupada polo Becerreá. Suma vinte puntos (e un partido menos). Vinte tamén ten o Antas (4º) e dezanove o Ferreira (5º e único que gañou dos tres). 

O Becerreá empatou ante a SD Chantada B. É o sexto empate da tempada do filial que non logrou sumar de tres. Os locais puideron poñerse por diante nada máis comezar. Non estiveron atinados. Logo o partido foi máis trabado. O filial aguantou ben as ocasións rivais. 

No partido xa non estivo presente Perry. O técnico deixou de dirixir ao filial chantadés. 

Nun dos partidos da xornada, o Ferreira superou ao Antas. Foi un encontro igualado. O Antas púxose por diante. O Ferreira avisara a balón parado. No segundo tempo dominuou o Ferreira e remontou o partido. Golazo de falta de Fagín nos últimos minutos. 

O Brollón queda a dous puntos da fase

O equipo dos Medos empatou ante o Lemos B. Un partido moi igualado e cunha gran cantidade de espectadores. Non falla a afección local. Se houbera un premio a maior asistencia na categoría, probablemente o levase sen rival. 

Os locais comezaron gañando cedo cun gol de Isma. Aos poucos minutos, Yeray empatou. Non tivo sorte na xogada e o propio goleador lesionouse. A igualdade imperou. Pero xusto antes do descanso, Isma volveu marcar. 

No segundo acto, ninguén tivo o control. Partido de ida e volta. Xa no último tramo, igualou o filial a balón parado. 

O Quiroga suma un punto máis na zona media

O Quiroga mantense na metade da táboa con trece puntos. Está a seis da zona de promoción e a seis do descenso directo. Empatou ante un Sporting Lucense que queda a tres da salvación. Terceiro empate dos capitalinos nos últimos catro partidos. 

Saíu mellor o Lucense na primeira parte. Antes do descanso marcaron o primeiro gol. Bo centro de Yaguito e remate de Kevin.  No segundo tempo o Lucense marcou o segundo nunha acción a balón parado por medio de Sergio. Pero ao pouco, Sergio ‘Pacho’ igualou o resultado con dous goles. 

O Lucense sufriu a lesión de Sergio que se tivo que retirar do partido. Estará como mínimo, unhas tres semas de baixa. Súmase a lesión de cruzado de David Fernández. Ademais de Camiño que, tras a súa lesión no curso anterior, continúa sen recuperarse. No club deuselle a carta de liberdade a Mejuto que fichou no Corgo. 

Importantes triunfos do Incio e do Paradela

O Incio e o Paradela lograron gañar na zona baixa e acumulan dez puntos. Tres de diferenza con respecto ao descenso directo. O cadro amarelo volveu gañar tras catro derrotas seguidas. O equipo do Cascabeiro superou a un San Roque que está na mala xeira con tres partidos perdidos de xeito consecutivo. 

Un Incio máis serio levou os tres puntos. Marcou o central Manu Campo tras un córner. Cepeda sentenciou cun gol a contra a pase de Weimar. 

O Paradela enlazou o segundo triunfo seguido. Foi o primeiro equipo en marcarlle dous goles ao Palas no que vai de temporada. Non puido contar o equipo con Romy, que comezou a súa recuperación tras romper a tibia.

Na primeira parte foi moi superior o Paradela. Púxose cedo 2-0 e co control. Na segunda metade, o Palas pasou a xogar con 3-5-2 e xerou tres ocasións moi claras. O Paradela acabou pedindo a hora pero termou. 

O Carballedo é 13º con dez puntos. O Paradela ocupa a antepenúltima posición con dez puntos. En descenso directo están o Sporting Lucense (7 pts.) e o Chantada B (6 pts.).