Pouco máis de doce horas despois, o mercado volve «atacar» cunha morea de novidades. Onte anunciabamos a renovación de Diego Rey na Sarriana e, hoxe, non saímos da familia: o seu irmán Pablo Rey continuará un ano máis na Ribela neste ambicioso proxecto na Terceira RFEF.

Xa na Primeira Galicia, de norte a sur, o CD Foz recupera ao defensor Adam, que volve ao Martínez Otero logo dun ano na Liga Galega Xuvenil coa SD Ribadeo. Ademais, os focenses renovan ao gardamallas Tomy e aos mediocentros José, Chao, Pablo, Cristian e Óscar. Na Terra Chá, o Santaballés asina ao porteiro xuvenil Hermida, que procede do Racing Villalbés, e renova o compromiso do lateral Rubén ‘Serra’, que defenderá un ano máis as cores dos da Liga.

No Sangoñedo, o Chantada Atlético renova a un dos seus xogadores bandeira, Anxo Otero, e recupera a Miguel Fernández ‘Mico’ logo de estar parado por unha grave lesión. No mesmo enclave, a SD Chantada ‘B’ contará con Pisto, Antón, Martín, Iker e Mourenza para unha nova temporada na Segunda Galicia. Os chantadinos mediránse na competición a un Brollón que renova ao defensor Pablo Tourón e a un recén ascendido Quiroga, que segue contando con Campos e con Iván Coba.

Na zona norte, Mario Benavente segue no Xermade, mentres que Raúl López e Pablo ‘Bluski’ asinan polo Cospeito desde o Castro ‘B’. Ambos xogadores aportarán aínda máis xuventude ao equipo dirixido por Luis Romay. Pola súa banda, o Mondoñedo renova a Isra como primeiro adestrador logo de conseguir o ascenso. Estará acompañado no banco por Fabián Rodríguez, un dos capitáns do equipo, que colga as botas para ver o fútbol desde outro prisma.