O mercado non para. E tampouco a nosa redacción, porque temos que contarvos todas os movementos do noso fútbol. Hoxe, comezamos pola Preferente. Dani Renda e Esteban renovan na Residencia, sumándose así á renovación do corpo técnico que anunciabamos onte.

Na Primeira Galicia, pola súa banda, Manolo García «Teipa» será o novo técnico do Riotorto. O Outeiro de Rei vén de renovar ao seu adestrador actual, Aarón Sánchez, así como ao capitán Trigo e a Artai, diferencial no tramo final de temporada.

O groso das novidades de hoxe concéntrase na Segunda Autonómica. De norte a sur, o Cospeito continúa coa liña continuista dos últimos anos e Dani Prieto e Xoán seguirán na Fonte. No recén ascendido Castro ‘B’ Manolo e Champi son as únicas baixas, pois continúan a maioría de xogadores que acadaron o ascenso. O Friol anunciou dúas fichaxes estelares que poden ser diferenciais na competición: Santi e Lucky retornan á Reigosa. Precisamente un «ex do Friol», Antonio Abad, será o novo preparador do Corgo.

Outro club que continúa coa idea dos últimos anos é o Becerreá, que procurará de novo o ascenso da man de Antón Méndez. O técnico, ademais, traballará como director deportivo da entidade. Outro conxunto que buscará o salto de categoría será o Guntín, que vén de renovar a Álvaro Buján, Álex Estévez, Diego Neira, Kevin, Víctor e Tomás.