Non da tregua o mercado do fútbol provincial. O Viveiro perde dous efectivos importantes de cara a vindeira temporada. Un deles, o pontés Dani Fernández pecha a súa segunda etapa no conxunto celeste. O outro, Tichu. O de Outeiro de Rei deixa o Viveiro e xogará o próximo ano no equipo do seu pobo.

Na Preferente, Asier foi presentado de forma oficial como novo xogaodor do Ribadeo, tal e como adiantou este medio. O focense, que chega desde o Viveiro, será un dos baluartes na parcela atacante dos de Dani Moirón. Jorge Méndez deixa de pertencer ao Lemos e regresa a finais deste mes de xullo aos Estados Unidos. Moitas novidades na Residencia. Dani Galán renova unha temporada máis á fronte do cadro lucense, e faino xunto ao todo o seu corpo técnico. Antonio e Nando serán os axudantes, Raposo como delegado e Iñaki adestrador de porteiros. Incorpórase como preparador físico o ribadense Lillo. Seguirán tamén no cadro da Cheda os catro capitáns: Róber, Txiki, Diego Bravos e Adrián Rasilla.

Varios lucenses son tamén protagonistas na Preferente fóra da nosa provincia. Rafa Casanova seguirá no banquiño do As Pontes logo de acadar a permanencia no seu primeiro ano no Poboado. David López, centrocampista lucense ata o de agora nas filas do Betanzos será novo xogador do Galicia Mugardos. Formado nas categorías inferiores da EF Polvorín, xa chegou a debutar en Terceira co Racing Vilalbés.

O Cospeito aposta pola continuidade logo da súa gran temporada en Segunda Autonómica. Luis Romay vivirá a súa terceira temporada como técnico e canda él seguirán os seguintes xogadores: Tito, Diego, Cancio, Xesús, Congui, Paredes, Jesús, Rui, Alberto, Fran Fernández, Ferreiro e Permuy.