Lucas Pardo

Diario dun mercado. Episodio 238

Unha vez que a publicación da terceira edición da Guía de ‘Fútbol en Lugo’ xa é algo oficial, os equipos teñen un motivo máis para seguir confeccionando os seus cadros. Á espera de coñecer o calendario, os conxuntos de Preferente xa saben como será o formato de competición para esta temporada que comeza.

Un dos clubs lucenses da categoría é a Sarriana que aspirará a estar nos postos altos da táboa. O grupo da Ribela anunciou como será a súa preparación de cara ao próximo curso. Este sábado xogará un amigable na casa ante o Ourense CF. O último sábado de agosto participará nun triangular coa UD Ourense e a SD Chantada. Logo o primeiro domingo de setembro desprazarase para xogar co Taboada. Á semana seguinte, segundo amigable na casa ante o Barbadás. Pechará pretemporada o domingo 19 fóra da casa ante o Outeiro de Rei.

Na Primeira Nacional feminina, o PM Friol anunciou tres novas fichaxes. A valenciana Alicia Martínez chega para reforzar a dianteira do cadro friolés. A xogadora de 21 anos formouse na canteira do Valencia CF. No cadro ché tamén se formou a defensa alicantina Ana Vallés ‘Peque’. Aterra na provincia de Lugo procedente do FF La Solana de Ciudad Real. E do mesmo cadro manchego vén Raquel Martín. A mediocentro de 18 anos foi a última incorporación en ser anunciada.

Iván Castro, Bruno Gómez e Adrián conformarán o corpo técnico do Xove Lago na temporada que comezará, se nada se torce, en outubro. Foto: UD Xove Lago

Volvendo ao fútbol masculino, na Primeira Rexional a UD Xove Lago confimou o corpo técnico de cara a próxima campaña. Como xa adiantara Futbolinlugo, Bruno Gómez continúa como primeiro adestrador. Ao seu lado seguirá Adrián como segundo preparador. A novidade chega coa fichaxe do ex adestrador do Celeiro, Iván Castro que tamén se incorpora ao corpo técnico.

No concello de Chantada os dous clubs da categoría tamén presentan novidades. O Chantada Atlético comunicou a renovación de Lucas Pardo. O dianteiro cumprirá a súa segunda temporada logo de recalar no Sangoñedo procedente da SD Monterroso. Tamén continúa o capitán Miguel. Por outra parte, a SD Chantada fixo pública a continuidade dos centrocampistas Álex Delgado, Povis, David e Pedro. O conxunto chantadino comeza este martes os adestramentos.

Imagen por defecto
Iván Calaza
Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.
Artículos: 467

Deja un comentario