Santi Real

Diario dun mercado. Episodio 229

Chega un novo capítulo do máis variopinto. Con altas, baixas e equipos en cadro

Empezou agosto movido. E con novidades e situacións do máis variopinto. Con todos vós un novo capítulo deste Diario dun mercado.

Comezamos pola Preferente, onde o Santaballés confirmou dúas renovacións e outro par de regresos. O extremo Hugo e o lateral Chechu seguen un ano máis. Mentres que volven dous clásicos trala pandemia: o porteiro e indespensable Comor así como o goleador ‘Apache’ Vérez. Nesa mesma categoría, Cristian ‘Rodas’ renovou co Atlético Escairón.

A Primeira non cesa a súa actividade

O Monterroso vén de confirmar dúas fichaxes dunha tacada. Dous rapaces novos, en proxección e con moita fame. Rubén Rodríguez regresa ao noso fútbol despois de máis de dous anos de inactividade. O polivalente centrocampista agarda mostrar a súa mellor versión. A que o levou a facer unha pretemporada con Quique Setién sendo xuvenil e antes de pasar por equipos como o Pol ou o Atlético Escairón. Pola súa parte, o noso Santi Real chega a Cerdeiriños despois do seu paso polo filial do Compostela. O lateral a ambas bandas, moi completo, fixo pretemporada co primeiro equipo santiagués despois do seu paso pola canteira do Rácing Villalbés.

Rubén Rodríguez posa coa camisola do Monterroso

No entanto, o Friol atópase con escasos efectivos e tirará de xogadores do pobo e do filial para esta nova aventura na Primeira. Os de Abad sufren novas baixas importantes como as de Brais Burgo (motivos laborais), Álvaro (que apunta ao Outeiro de Rei) ou o defensa Víctor. Así mesmo o filial nutrirase de varios xuvenís, ao non facer esta campaña conxunto nesta idade previa ao fútbol afeccionado. Por último, o San Lázaro despediuse do seu campo de A Ponte. Desde esta campaña xogará nas Gándaras.

Na Segunda, Asi e Viña mantéñense no Palas. E o antigo central All Star Diego retírase do fútbol. Apuntaba a xogar nun Bóveda, no que existen moitas dúbidas de que saía a competir, pero finalmente colgará as botas.

Corpos técnicos de base neste Diario dun Mercado

Trashorras, con Pablo Vivero, nun Campus RCV

Hoxe coñecemos a estrutura de dous equipos de base da capital. O Sagrado Corazón contará con Brais Rozados, o antigo coordinador, no equipo xuvenil. O novo coordinador Adrián Vázquez levará o cadete. Mincha e Álex Rois ocuparanse do infantil.

Pola súa parte Antón Méndez repetirá no Lugo xuvenil de Honra. Roberto Trashorras estrearase no xuvenil B de Liga Nacional. O cadete de Honra será cousa de Yoni. No cadete B estará Fran Fernández, que regresa ao albivermello. Aínda que compaxinará estas cores coas da Residencia infantil de Liga Galega. Para rematar este Diario dun Mercado, o infantil A do Lugo será para Pita.

Imagen por defecto
Diego Díaz Martínez
Polivalente hiperactivo. Enfermo do "balompié". Só estás a un mal día de ser coma min.
Artículos: 755

Deja un comentario