Rematou a primeira volta na Segunda Galicia e non se produciron cambios no liderato con respecto as últimas xornadas. O Guitiriz, xa campión de inverno antes do Nadal, e o Chantada B encabezan as clasificacións que si que teñen novidades nos outros postos de ascenso directo. Neste momento ocúpano o Cabreiros e o Friol, despois dos empates do Pol e do Chantada Atlético, respectivamente.
No grupo norte, o Guitiriz amplía a súa vantaxe, segue invicto logo de vencer con claridade ao Alfoz e mantense como o equipo menos goleado. Segundo é agora o Cabreiros que venceu a domicilio nun duelo directo ante o Cospeito. A un punto chega con moita forza o Folgueiro; venceu ao Meira e é o segundo equipo máis en forma do grupo con cinco vitorias consecutivas. Na pelexa tamén están, empatados a puntos, o Lourenzá que venceu nun dos grandes derbis do fútbol provincial e galego ao Mondoñedo; e o Pol a pesar de comezar o ano cun empate sen goles en San Miguel de Reinante diante do Iberia.
Tampouco perde comba o Burela, que gañou con claridade a un Ourol que dirixe provisionalmente dende o banco o directivo Luis García e que remata a primeira volta sen vitorias. Máis descolgado está o Roupar, no medio da táboa despois de empatar nun duelo de goles fronte ao Matela. Esteban e Torito marcaron cadanseu doblete. Pola súa banda, o máis beneficiado na parte de abaixo foi a Candelaria que venceu, nun enfrontamento directo pola permanencia, ao Abadín.
No grupo sur, o Chantada B amosou a súa condición de líder para golear ó Becerreá e proclamarse campión de inverno. Segundo é agora o Friol, despois de vencer no Anexo de Cerdeiriños ao filial dun Monterroso no que destacou a gran actuación o xuvenil Martín Blanco. Volveu ao conxunto da súa terra no mes de decembro despois de pasar polas categorías inferiores do CD Lugo. O Chantada Atlético perdeu o seu posto de ascenso directo ao non pasar do empate na súa visita a Veiga do Olmo diante do Castroverde. Na pelexa segue o Oural, aínda que só foi quen de igualar co San Lázaro.
Tamén se manteñen nesa parte alta o Palas, logo de vencer ao Brollón e o Santa Comba que gañou, nun choque directo e con goles (en concreto 3 de Jul para o seu equipo), ao Sporting Lucense. Pola zona baixa, destacaron dúas vitorias importantes en enfrontamentos directos. Unha a do Portomarín que venceu á Milagrosa nun regreso pola porta grande do dianteiro Óscar López cun hat-trick; tamén un gran papel do seu irmán Iván e o mediocentro Nel. O Rubián colleitou a segunda vitoria da temporada ao vencer por 3-0 ao Antas e apreta máis os últimos postos da táboa.
