Redactor - Marcos Fernández
O último Trío de Ases da primeira volta déixanos dous empates na Terceira. O do Racing Vilalbés na Estrada e o do Polvorín na Cheda co Paiosaco. Na Preferente, o Viveiro sufriu para gañar en Laracha, o Ribadeo empatou co Mugardos e a Residencia fixo o propio no campo do Montañeros. E tres derrotas, a da Sarriana na Ribela co Noia, o Lemos caeu na Pinguela co Sofán e o Foz prolongou a súa mala xeira no campo do Xallas.
O Racing Vilalbés sumou un bo punto na súa visita ao Estradense (1-1). Non foi o mellor encontro dos chairegos, pero sacaron rédito da súa visita á Estrada. Tivo máis e mellores ocasións o cadro local. Javicho e Juanín gozaron da máis claras, pero a falta de puntería ou o acerto de Javi Pita desbaratáronas. Pasado o primeiro cuarto de hora chegou o tanto do Estradense, pero a expulsión de Iago Neira ao pouco de comezar a primera metade foi clave. O Racing colleu o timón do partido e cun gran Sandá xerou perigo. O propio atacante dos de Simón Lamas provocou o penalti do empate, que transformou Jose Varela. Sito e Sandá tiveron ocasións para darlle a volta ao encontro.
Empate sen goles do Polvorín na Cheda ante o Paiosaco (0-0). Encontro moi igualado e sen moitas ocasións. O filial albivermello levou o peso do partido, pero un Paiosaco moi ordenado e intenso frenou as acometidas do cadro local. Chiqui, que tería que saír lesionado preto do descanso, viu como o colexiado lle anulaba un tanto aos vinte minutos de partido por fóra de xogo. Os visitantes, que chegaban a este encontro no último posto da táboa, só deron sensación de perigo a balón parado. Na segunda metade, o Polvorín voltou levar a iniciativa, pero sen crear perigo ante a porta de Rama.
Xaime decidiu para o Viveiro un trabado encontro ante o Laracha (0-1). Non foi doado o encontro para o líder. O conxunto local demostrou ser un mellor equipo que reflicte a clasificación e malia que os viveirenses non sufriron en defensa, apenas gozaron de ocasión claras de gol en igualdade numérica. Tan só un disparo de Marino obrigou a intervir ao gardameta Pablo. A falta de dez minutos para o descanso, o Laracha quedou con dez e o Viveiro intensificou a seu dominio. Tichu e Iván gozaron de claras ocasións para marcar. O colexiado deixou con nove aos locales e foi cando Xaime sacou a relucir a súa calidade para decidilo encontro cun preciso lanzamento de falta.
O Ribadeo igualou ante o Mugardos no Martínez Otero (1-1). Empate entre dous conxuntos igualados na clasificación, e que disputaron un intenso encontro. O ex viveirense Nes gozou de dúas ocasións claras para os visitantes, mentres que Criss puido adiantar ao Ribadeo a falta de dez minutos para o descanso. Na segunda metade chegaron os goles. Unha indecisión defensiva dos mariñáns foi aproveitada por Artai, que anotou a porta vacía. Co marcador en contra, os de Rafa Casanova foron superiores e Luki, a piques estivo de acadala igualada, pero o gardameta do Mugardos enviou a córner. Tan só un minuto despois, Dani Moreno fixo penalti sobre Vizoso e Brais non errou desde os once metros. Tentou a remontada o Ribadeo ata o final, pero o marcador non se moveu.
A Sarriana non puido cun Noia en racha (1-2). Primeira derrota da era Peón. O encontro entre dous dos aspirantes ao ascenso rematou do lado visitante. Os de Iván Carril suman sete xornadas sen perder. Adiantouse o Noia desde o punto de penalti por medio de Nando e antes do descanso Quintairos puxo terra de por medio cun bo disparo desde dentro da área. A Sarriana non lle perdeu a cara ao partido e Mauro recurtou diferencias logo de superar a Pajarillo nun man a man. Tentárono os sarriaos ata o final, pero non chegaron ocasións claras. Xa co tempo cumprido, Héctor deixou aos seus en inferioridade logo de ver o segundo cartón amarelo.
O Lemos caeu ante o Sofán na Pinguela e complica a súa clasificación (0-1). Encontro trabado entre dous conxuntos que querían fuxir dos postos de perigo. Os de Edu Rodríguez avisaron aos poucos minutos, pero o gardameta visitante estivo acertado para evitalo remate de Denis. O partido entrou nunha dinámica de mediocampismo e imprecisións que provocou que escasearan as ocasións de gol. Adrián Díaz tivo a máis clara para o Lemos. Nos últimos intres da primeira metade, Carro protagonizou a única opción para os de Carballo. O marcador non se moveu ata o minuto 79. Un bo pase de Eibe superou a adiantada defensa monfortina e atopou a Alexandre, que de tiro cruzado batiu ao hoxe titular Arturo.
Un tanto de Veloso salva un punto para a Residencia ante o Montañeros (1-1). Os de Álvaro Meilán acadaron un punto moi positivo ante un rival directo pola permanencia, que ademáis se atopa nun bo momento de xogo e resultados. Kevin adiantou aos coruñeses aos dez minutos de partido, pero a Residencia non lle perdeu a cara ao encontro en ningún momento. Malia non ter demasiadas ocasións claras, o tanto do empate chegou a media hora para o final. Un córner sacado por Sergio rematouno Veloso no segundo pao.
Nova derrota do Foz ante un Xallas que xa o iguala na clasificación (2-0). Continúa a mala racha dos de Gayol, que ven como lles iguala na clasificación o cadro de Santa Comba. Encontro igualado no que xa na primeira metade ámbolos conxuntos gozaron de ocasións suficientes para abrilo marcador. Pero o gol non chegou ata os últimos minutos. Carlos aproveitou unha contra para deixar o encontro case que decidido. Os focenses non se rendiron malia o pouco tempo co que contaban, pero este factor aproveitouno o Xallas para sentenciar.
TERCEIRA DIVISIÓN
– Polvorín – U.D. Paiosaco (Sábado ás 16 horas na Cheda): Logo de dúas derrotas consecutivas, o filial albivermello buscará un triunfo que o afaste do perigo ante un vello rival da Preferente. O Paiosaco chega a este encontro como pechacancelas e non é quen de gañar desde o mes de outubro.
PREFERENTE NORTE
– Ribadeo F.C. – Galicia Mugardos (Domingo ás 12 horas no Martínez Otero): ámbolos conxuntos chegan a este encontro separados por tan só un punto na clasificación a favor dos de ferrolterra. Malia ser un recén ascendido, o Mugardos conta con futbolistas de gran experiencia na categoría e será un duro rival para os de Rafa Casanova, que seguirán contando coa baixa do mancado Poratti.
– Club Lemos – S.D. Sofán (Domingo ás 16 horas na Pinguela): choque entre conxuntos co mesmo obxectivo: a permanencia. Os de Edu Rodríguez, logo da mala imaxe ofrecida no derbi coa Residencia, buscarán un triunfo diante da súa afección co que superarían na clasificación a un Sofán que chega logo de dous triunfos consecutivos.
– S.D. Sarriana – Noia C.F. (Domingo ás 16:15 horas na Ribela): dous candidatos ao ascenso fronte a fronte, pero que non comezaron a temporada do mellor xeito, pero que xa opositan aos postos altos. Ámbolos dous chegan nun gran momento. O cadro local non perde desde a chegada ao banco de Xoan Peón, mentres que os visitantes non coñecen a derrotan desde que caeran ante o Ribadeo o 1 de novembro.
PRIMEIRA AUTONÓMICA
– Taboada C.F. – S.D. Chantada (Domingo ás 16 horas na Medela): derbi entre conxuntos con aspiracións distintas. O cadro local, logo de cinco xornadas sen gañar, precisa dos tres puntos para afastarse da zona de perigo, pero os de Juan Rodríguez tentarán retornar con eles no peto para achegarse a uns postos de ascenso que polo momento se lles resisten.
– S.D. Santaballés – Atlético Escairón (Domingo ás 16 horas na Liga): segundo contra primeiro. Os dous equipos máis en forma da categoría fronte a fronte. Os de Dani Moirón buscarán consolidala segunda praza no seu feudo, de onde só marchou un empate nesta temporada diante do Friol. Pero o Escairón deféndese á perfección lonxe do Municipal e tentará dar un golpe enriba da mesa ante un rival directo.
SEGUNDA AUTONÓMICA
– C.D. San Ciprián – A.C.D. Xermade (Domingo ás 16 horas na Veiga): o líder invicto, que non deixou fuxir ata o de agora un só punto da Veiga, recibe a outro dos candidatos ao ascenso. O cadro xermadino, que non atopa a regularidade lonxe do seu feudo, tentará recurtar puntos co Alfoz, segundo clasificado.
– C.F. Portomarín – S.D. Paradela (Sábado ás 16 horas no Chao da Poza): empatados a puntos, ámbolos conxuntos aspiran a achegarse ao segundo posto ocupado polo Ferreira, que os aventaxa en catro puntos. Os de Fernandito tentarán mellorar as prestacións no seu campo, sendo ata o de agora o seu punto débil. Debutarán as últimas fichaxes: Barki no cadro local e Samos nos visitantes.
TERCEIRA AUTONÓMICA
– S.D. Viveiro – Celeiro (Sábado ás 17:15 horas no Municipal Marcos Gómez): derbi viveirense no que os locales buscarán un triunfo que os afiance nos postos de ascenso ou incluso os sitúe no liderato. Enfronte o conxunto de Martín tentará dar a sorpresa para achegarse á ansiada promoción.
– S.C.D. Milagrosa – S.D. Antas (Domingo ás 16:30 horas no Luis Gorgoso): os capitalinos tentarán darlle continuidade á boa racha na casa, onde contan os seus encontros por vitorias, para seguir mantendo cando menos seis puntos de marxe co terceiro clasificado. Enfronte o equipo adestrado por Melendo, logo de dous encontros sen gañar, buscarán os tres puntos para seguir optando ao ascenso directo.
PRIMEIRA DIVISIÓN GALEGA FEMININA
– Peluquería Mixta Friol B – S.D. Villestro (Domingo ás 16:30 horas na Reigosa): difícil convite para as de Covi, xa que reciben a un conxunto que marcha empatado a puntos cun Friol que buscará darlle continuidade á sua racha de cinco encontros sen coñecela derrota.
SEGUNDA DIVISIÓN FEMININA
– Carballedo C.F. – S.G. Comercial (Domingo ás 12 horas no Catro Ventos): derbi provincial no que as locales tentarán desquitarse da derrota no último encontro de rivalidade ante o Chantada. O Comercial, quinto clasificado, tentará acadalos tres puntos cos que podería escalar varios postos na táboa.
– C.D. Lugo – Once Caballeros C.F. (Domingo ás 18:30 horas no Luis Gorgoso): encontro importante para as lucenses, que non poden ceder se queren darlle caza ao líder, o Sporting Cambre. Enfronte o conxunto do Temple, situado na zona morna da clasificación, chega tras gañar os dous últimos encontros.
LIGA FEMININA FÚTBOL 7
– S.D. Burela – Relámpago de Elviña (Sábado ás 17 horas no Anexo á Marosa): as burelás farán o seu debut nesta segunda fase logo de descansar na xornada inagural, co obxectivo de lograla primeira vitoria. Non o terán doado ante un conxunto coruñés que foi quen de golear ao Atlético San Pedro.
Xa pasou moito tempo desde o último enfrontamento, tanto que incluso moitos dos seareiros de ámbolos clubes nin se lembran do último. Máis de oito anos sen que o Iberia e o Celta Barreiros se vexan as caras nun encontro ligueiro, pero este sábado ás 16:15 horas enfrontaranse de novo coas Valgas como esceario. O bautizado como o ‘derbi das praias‘ movilizou, como non podía ser doutro xeito, ás dúas afeccións así como aos clubes que volcan os seus esforzos nas redes sociais para que o ambiente sexa o das grandes citas.
O Iberia afronta o encontro desde a penúltima praza da clasificación, empatado a puntos co pechacancelas Abadín, e tan só foi quen de gañar un encontro desde o comezo de liga, no mes de outubro no campo do Roupar. As baixas respecto á temporada anterior de Sergio, Vijande ou Perotti, entre outros, debilitou a un equipo que partiu xa co obxectivo de manter a categoría. A aposta, a mesma dos últimos anos: os xogadores da casa, liderados polo de sempre, Marcos. Con eles, incluído un histórico como Javi Castrillón, que voltou aos campos varios anos despois, xunto con varias incorporacións tentarán manter a categoría. Aínda que a clasificación reflicte a delicada situación do equipo de José Manuel, os de San Miguel amosaron en moitos encontros que son capaces de competir ante os conxunto máis fortes da categoría, acadando meritorios empates ante San Ciprián e Cabreiros.
Se isto non fose un derbi, o cadro visitante sería o gran favorito. O Celta Barreiros, logo de moitos anos na Terceira Autonómica, foi quen de recuperala categoría e fíxoo pola porta grande. O equipo adestrado por Fran Vázquez comezou a temporada con galóns de veterán en Segunda e a día de hoxe conta con dez puntos de vantaxe sobre o Iberia. Seis xornadas sen perder situaron ao cadro celeste na zona alta da categoría, pero un mes de novembro aciago colocou aos barreirenses na zona morna da clasificación. O último triunfo no campo da Cea fixo que fosen ao parón con mellor sabor de boca. A boa xeira do Celta non é casual. Xogadores como Jorge, Dani Chin, Álvaro, Hugo ou Adrián Rivas, todos eles curtidos no C.D. Foz, dan mostra do potencial dos do Cascabeiro.
Así se presenta un ‘derbi das praias‘ que non poderán disputar no Iberia Jordane, Lavilson e Álex por motivos laborais, Joao por asuntos persoais e Perancho e Pisco por sanción , mentres que no Celta Barreiros serán baixa Álvaro por sanción e Insua por motivos persoais.
O último enfrontamento entre Iberia e Celta Barreiros no campo das Valgas data do 13 de novembro do 2011 e rematou con triunfo local por tres goles a un. Os goles foron obra de Diego Rego en dúas ocasións, hoxe adestrador do Lourenzá e de David para o Iberia, mentras que Iván Arnau anotou para o Celta.
Falamos do derbi con Carlos Devesa, segundo adestrador do Iberia e con Fran Vázquez, técnico do Celta Barreiros.
QUE OPINAN OS PROTAGONISTAS?
CARLOS DEVESA (IBERIA C.F.)
Carlos Devesa na súa etapa como futbolista, formou parte do Iberia.
– O derbi como estímulo. «Como non xogamos desde a ponte de decembro, aproveitamos para facer unha pequena pretemporada, adestrando a tope e con tódolos xogadores moi motivados. Afrontamos a segunda volta como se fora un ‘Torneo Clausura’ e iremos a tope polo obxectivo da permanencia. Como moitos dos integrantes da plantilla son de San Miguel, o derbi é un encontro moi especial, polo que agardamos sumar os tres puntos«.
– O rival. «Decir que sete ou oito xogadores xa competiron nalgún momento en Preferente xa amosa o potencial que teñen para a Segunda Autonómica. As categorías están para algo, e agora independentemente de varios factores a calidade esta ahí. David Celeiro pasou polas categorías inferiores do Lugo, Dani Chin non precisa presentación, Xian, Hugo, etc. Son un moi bo equipo adestrado por Fran, un rapaz novo pero que se adaptou moi ben á categoría. De seguro que nos plantexarán un encontro complexo«.
– O ambiente. «Logo de tantos anos sen que houbera derbi decidimos que se xogase o sábado precisamente para conseguir que a xente dos concellos limítrofes se poda achegar ás Valgas e disfrutar dun encontro bonito. Ademáis, as previsións son de bo tempo e os taberneiros das Valgas son dos mellores da Mariña. José Manuel e eu xogamos varios anos neste equipo e moitos dos xogadores son da casa, polo que as gañas de que chegue o derbi son grandes«.
– A permanencia. «Son optimista, tanto no fútbol como na vida. Tivemos moitos contratempos, varios fichaxes que se tiveron que marchar por motivos laborais, lesionáronse os dous porteiros e incluso tivo que xogar Balbón baixo paos algún encontro. Aínda que sone a tópico, cando estás na zona baixa multiplícanse as desgrazas, un sinfín de balóns ao pao, goles nos últimos intres, etc, pero o equipo traballa moi ben e deixa todo en cada partido ou adestramento, polo que confío en manter a categoría«.
FRAN VÁZQUEZ (CELTA BARREIROS)
Fran Vázquez conversando con Álvaro intres antes do encontro do Celta Barreiros ante o Sanci
– O derbi. «Afrontamos o partido como outro máis da temporada, coas mesmas gañas de acadalos tres puntos e seguir mellorando como equipo. Pero non cabe dúbida que este é un encontro máis especial polo feito de ser dous equipos veciños do mesmo concello. Nun derbi coma este estar por diante na clasificación é de menos, xa que tódolos equipos compiten ben«.
– O Iberia. «Son un bo equipo, con experiencia na categoría e sempre dan moita guerra. Ben seguro que co paso das xornadas irán a máis, pero nós confiamos moito no noso traballo do día a día e na piña que formamos dentro e fóra do vestiario, que é o máis importante nesta categoría, para acadala vitoria«.
– As Valgas. «Ben seguro que se achegará moita xente e haberá un bo ambiente de fútbol. Agardemos poder disfrutar tanto os de dentro como os de fóra. Somos conscientes de que alí nos van apretar desde o minuto un, iso seguro«.
– O obxectivo para a segunda volta. «O mesmo que desde o primeiro día, a permanencia. Traballamos duro desde o comezo para chegar ás últimas xornadas cos deberes feitos e non correr perigo. E canto máis sumemos agora moito mellor«.
O primeiro Trío de Ases do 2020 déixanos na Terceira a vitoria do Racing Vilalbés diante da UD Ourense e a derrota do Polvorín na súa visita a Arzúa. Na Preferente, o Viveiro gañoulle ao San Tirse e a Residencia ao Lemos no derbi. A Sarriana arrancou un punto do campo do Arteixo, mentres que o Ribadeo caeu en Fisterra e o Foz no Martínez Otero ante o Montañeros e ocupa posto de descenso.
Terceiro triunfo consecutivo para o Racing Vilalbés, desta volta diante da UD Ourense (3-1). Queda demostrado que aos de Simón Lamas gústalles xogar contra os conxuntos máis fortes da Terceira. Logo de derrotar ao Fabril e ao Rápido, aínda que non estivera no seu mellor momento, desta volta tocoulle o turno á UD Ourense, outro conxunto chamado a estar na pelexa polo ascenso. Foi mellor un Racing que se adiantou antes do primeir cuarto de hora cun tanto de Ángel e tan só tres minutos despois o killer Cuadrado acudiu á súa cita co gol e fixo o segundo. O cadro ourensanista deu un paso adiante e fíxose co balón no última tramo da primeira metade, pero sen xerar demasiado perigo sobre a portería de Javi Pita. Logo do paso por vestiarios, chegou o tanto visitante. Foi obra dun histórico, Rubén Durán, desde o punto de penalti. Tamén foi así a sentencia chairega. Unha man dun defensor ourensanista foi sinalada polo colexiado e Jose Varela non errou. Nos últimos compases, o seu irmán Javi Varela foi expulsado por dobre cartón amarelo.
O Polvorín caeu en Arzúa logo de igualar un encontro que tiña moi costa arriba (3-2). O filial lucense queda dous puntos por enriba dos postos de descenso logo de sumar a segunda derrota consecutiva. No primeiro minuto de encontro, Varo cun remate desde a área pequena puido adiantar ao Polvorín, pero o gardameta arzuán respostou cun paradón. Ao cuarto de hora de encontro, Unai Marino cometeu penalti e o pichichi Íker Hurtado non errou desde os once metros. Co marcador en contra, os de José Durán cun xogo vertical buscaron o empate e rozárono nunha triple ocasión de Morais, Marcos e Varo, pero voltou aparecer Israel, que estivo providencial na portería. Logo do descanso a entrada de Rayco e Chiqui trocaron o encontro e os lucenses chegaron con máis perigo. Malia todo, o Arzúa fixo o segundo, nun centro que Quindimil introduciu na súa propia porta. Álex Rey recurtou diferencias logo dunha boa xogada combinativa e só tres minutos despois un gran testarazo de Morais estableceu a igualada. Logo de facer o máis complexo, o Polvorín viu como un erro de concentración provocou o tanto da vitoria dos de Alberto López, obra de Brais.
O Viveiro segue intratable en Cantarrana e golea ao San Tirso (3-0). Tan só un punto cedeu o conxunto mariñán no seu feudo nesta temporada. Os de Abegondo complicáronlle as cousas aos de Chusky na primeira metade. Aínda que prácticamente non inquietaron a portería de Rubén, titular por primeira vez en liga, non deixaron que o Viveiro desenrolase o fútbol que acostuma. Logo dun gol anulado a Tichu, tivo que ser o pichichi Gerardo quen abrise o marcador sobrepasada a media hora de encontro, logo dunha gran xogada de Agus. Na segunda metade, o Viveiro estivo máis cómodo, pero o tanto da tranquilidade non chegou ata o minuto 70, cando Tichu conectou unha volea imposible para o gardameta visitante. Xa preto do final, Xaime de falta directa sentenciou o choque.
Derrota en Fisterra dun Ribadeo que acusou en exceso as baixas (2-0). Os de Rafa Casanova non puideron co conxunto revelación da Preferente. As ausencias de Poratti, Erni ou Santi entre outros condicionaron aos mariñáns que puideron sair do Ara Solis cunha derrota máis ampla se non fora pola boa actuación do gardamallas Hugo. Os goles dos fisterráns chegaron en momentos decisivos, ao final da primeira metade e ao comezo da segunda, obra de Capelo e Santi Taboada, que xunto con Herbert son xogadores diferenciais. Ata o tanto inicial do conxunto local, os ribadenses defenderon con orde, pero non inquietaron a portería rival. Nos últimos intres de encontro, Martín Traba no día que se enfrontou ao equipo do seu pobo, foi expulsado.
A Sarriana consegue un empate sen goles no campo do Arteixo (0-0). Encontro marcado polo susto que protagonizou Javi Fraga, que se desvaneceu á media hora de partido e tivo que ser trasladado ao hospital. Afortunadamente todo quedou nun susto. A Sarriana foi lixeiramente superior, aínda que non xerou demasiadas ocasións de perigo. A máis clara preto do final, pero o gardameta local estivo acertado ante o lanzamento de Mauro. O Arteixo xogou o último tramo do encontro en inferioridade, pero soubo defender o marcador.
A Residencia golea nun gran encontro a un fráxil Lemos (4-0). O mellor encontro dos de Álvaro Meilán no que vai de temporada, no que tódolos xogadores raiaron a gran nivel. Pola contra, un Lemos desdibuxado non foi quen de facerlle fronte ao cadro local e apenas xerou perigo e volveu a verse penalizado pola súa fraxilidade defensiva. Nos primeiros compases, Dani López anotou desde dentro da área logo de que a zaga monfortina non acertase a despexar. A falta de dez minutos para o descanso, Veloso aproveitou un bo pase de Moha para batir non un contra un a Ramón e tan só dous minutos despois Iago, que gañou un balón á espalda da defensa, sentenciou o encontro. Na segunda metade, Veloso fixo o segundo tanto na súa conta particular logo doutra boa xogada de Moha.
O Foz cae a postos de descenso tras caer ante o Montañeros (1-2). Oito encontros sen gañar sitúan aos focenses na antepenúltima praza da clasificación. Non foron quen de superar a un rival directo, que logo do troco de adestrador encadean cinco xornadas sen perder. Encontro tenso no que os de Gayol puideron adiantarse no marcador por medio de Xenxo, que volvía á titularidade, pero atopouse coa boa resposta do gardameta coruñés. Preto do descanso, Quique Cubas anotou para o Montañeros e xa na segunda metade un disparo de longa distancia sorprendeu a Manu Pardo. Co encontro moi costa arriba o Foz tirou de orgullo e unha boa combinación entre Álex Paz e Miguel rematou co tanto do burelao. Nos últimos dez minutos de partido, tres expulsados. Asier e Dani Chao non remataron o encontro nos mariñáns e Cardelle nos visitantes.
Comeza o ano e como apertivo ao día de Reis, varias categorías do noso fútbol xa se poñen a andar. Aquí unha pequena escolma dos encontros máis destacados:
TERCEIRA DIVISIÓN
– Racing Vilalbés – U.D. Ourense (Domingo ás 16 horas na Madalena): o conxunto chairego, aínda co derbi ante o Polvorín por disputar, suma dous triunfos consecutivos e atópase nun bo momento de xogo. Recibe a outro conxunto en forma. Os ourensáns suman catro vitorias seguidas e achéganse á zona alta da clasificación logo dun mal comezo de campionato.
PREFERENTE NORTE
– Viveiro C.F. – S.D. San Tirso (Sábado ás 16 horas en Cantarrana): logo de empatar co Ribadeo en liga e perder na Copa Deputación, o cadro viveirense tentará reencontrarse coa vitoria diante da súa afección para manter así as diferencias cos seus perseguidores. Non o terá doado ante un San Tirso que está a ser unha das revelacións da categoría.
– C.D. Foz – At. Coruña Montañeros (Domingo ás 12 horas no Martínez Otero): encontro clave para os de Gayol. Reciben a un Montañeros que marca o descenso con tres puntos e un partido menos que os focenses, pero que con Moisés Pereiro no banco experimentou unha notable melloría. Os mariñáns, que non gañan desde o 27 de outubro, precisan dunha vitoria para fuxir do descenso directo.
PRIMEIRA AUTONÓMICA
– S.D. Pol – C.D. Guntín (Domingo ás 12 horas no Manuel Luna): o cadro local buscará resarcirse da última derrota no Acebreiro con tres puntos que os sigan situando na zona de privilexio. Enfronte un Guntín que xa foi quen de gañar nos campos do Riotorto ou Outeiro de Rei.
– E.D. Lourenzá – S.D. Santaballés (Domingo ás 16 horas en Santa Cruz): choque de rachas contrapostas. Os de Diego Rego suman once xornadas sen gañar e ocupan o último lugar. Os chairegos once xornadas sen perder e son segundos. Pero o cadro laurentino non se rinde e cada xornada ofrece unha mellor imaxe, polo que os de Dani Moirón non o terán doado.
– C.D. Castro – S.D. Outeiro de Rei (Domingo ás 16 horas no Arturo Pereiro): dous equipos que non atravesan o seu mellor momento. Os de Vitín, logo de catro xornadas sen gañar, precisan os tres puntos para non meterse na zona de perigo, mentres que os visitantes no caso de non acadar un triunfo verán de lonxe os postos de ascenso.
O 2020 comeza forte na Preferente. Faino cun derbi provincial entre a Residencia e o Lemos, os dous conxuntos que a pasada temporada acadaron o ascenso desde a Primeira Autonómica e esta campaña pelexan por manterse nela. Será o domingo ás 12 horas na Cheda. Tres puntos que ámbolos conxuntos agardan como un regalo adiantado de Reis.
O cadro local atópase na decimosexta posición na táboa con dezaseis puntos, catro por enriba dos postos de descenso directo, pero en serio perigo de perdela categoría de rematar así a temporada por mor dos arrastres. Iso si, cun encontro aínda por disputar no campo do Boiro, suspendido polo temporal. A Residencia, co claro obxectivo de acadala permanencia e darlle continuidade ao proxecto de Álvaro Meilán en Preferente, está a acusar a falta de gol. Logo de dezaseis partidos, soamente suma catorce goles a favor, non sendo capaz de marcar en sete encontros. Malia todo, na Cheda xa caeron rivais directos como o Sigüeiro, Xallas ou Sofán e foi quen de sumar ante Foz, Laracha ou conxuntos da zona alta como o Ribadeo a domicilio.
Pola súa banda, o Lemos conta con vinte puntos, catro máis que o seu rival desta xornada e é decimoterceiro na clasificación. O cadro de Edu Rodríguez non tivo descanso neste Nadal ao disputar xornada de Copa Deputación ante a Sarriana, encontro no que dixo adeus á competición tras caer 2-1 na Ribela. Se a Residencia non marca, os monfortinos son aos que máis lle marcan do grupo norte da Preferente, mantendo a portería a cero tan só en dous encontros. A última vitoria do 2019, ante un rival directo como o Foz, deulle folgos a un Lemos que puxo terra de por medio co descenso directo. Este mes de xaneiro, con enfrontamentos ante rivais directos, medirá as posibilidades dos monfortinos nesta campaña.
O último enfrontamento entre ámbolos conxuntos en Preferente remóntase ao 25 de agosto de 2013, na que fora a primeira xornada desa temporada, e rematou con marcador claramente favorable á Residencia por catro goles a cero. Dani Galán, cun hat-trick e Omar, hoxe na Sarriana, foron os autores dos tantos. A pasada campaña, en Primeira Autonómica, o encontro na Cheda rematou con empate a un tanto. Txiki marcou para os lucenses e Adrián Castañer para os monfortinos.
Falamos do encontro con Veloso (Residencia) e Borja Castro (Lemos).
QUE OPINAN OS PROTAGONISTAS?
VELOSO (S.D. RESIDENCIA)
– A volta á competición. «Creo que o parón foi positivo para nós, xa que estabamos a pasar unha mala racha tanto a nivel de resultados, xogo e lesións de moitos compañeiros, polo que creo que volvemos con moitas máis forza e ganas que antes e desexando demostrar do que somos capaces«.
– O Lemos. «A verdade é que agardo un partido moi complicado e disputado. Somos dous equipos que acabamos de ascender de categoría e que necesitamos os puntos para poder seguir pelexando e non quedarnos atrás. Contamos co punto a favor de xogar na Cheda, polo que temos que facernos fortes na casa. Vexo ao Lemos un equipo moi completo e forte tanto fóra como na casa, polo que teremos que traballar moito para facernos cos tres puntos«.
– A pelexa pola permanencia. «Considero que a Preferente é unha liga de moito nivel, onde todos e cada un dos equipos son capaces de loitar tódolos partidos, sexa contra o rival que sexa. Vexo á Residencia moi capaz de asegurarse un posto o vindeiro ano nesta categoría, pero debemos traballar e volver ao noso nivel. Xogando tódolos partidos ao máximo estou seguro de que seremos capaces de conseguilo«.
BORJA CASTRO (CLUB LEMOS)
– A Residencia. «A Residencia é un equipo moi compacto e difícil de superar no seu campo, pero intentarmos voltar para Monforte cos tres puntos. Vimos de gañarlle na última xornada ao Foz, no que foi un triunfo moi importante, sobre todo no aspecto anímico de todo o grupo, xa que nos vai dar confianza de cara aos seguintes partidos«.
– A defensa. «Temos que ser mellores nas dúas áreas, sen dúbida. O que está claro é que se melloramos no aspecto defensivo, que neso estamos traballando, iremos cara arriba«.
– O obxectivo. «Queremos seguir como sexa o vindeiro ano en Preferente. O malo desta categoría é que para estar seguro da permanencia debes de quedar como mínimo decimoterceiro, polo tema dos arrastres. Pero imos facer todo o posible para conseguilo. Agardo que tódolos equipos lucenses sexan capaces de acadar a permanencia«.
Fotos: S9 Fotografía
Aínda que a competición regular detense nestas datas, o fútbol non para na nosa provincia. A Copa Deputación colle o protagonismo e chega con encontros máis que interesantes. Ademáis, varios partidos disputaranse na nosa xeografía cun fin solidario.
COPA DEPUTACIÓN PREFERENTE E PRIMEIRA AUTONÓMICA – OITAVOS DE FINAL
– Ribadeo F.C. – Viveiro C.F. (Sábado ás 16 horas nas Valgas): tan só unha semana despois do último enfrontamento ligueiro que rematou con reparto de puntos, ámbolos conxuntos voltan a verse as caras de novo nas Valgas. Desta volta co obxectivo da Copa, un novo derbi que se prevé emocionante ao igual que os anteriores.
– S.D. Chantada – C.D. Guntín (Sábado ás 16:15 horas no Sangoñedo): os de Juan Rodríguez tentarán facer valer o factor campo e avanzar na competición copeira ante un Guntín que está a realizar unha gran temporada no ano do seu ascenso a Primeira.
– S.D. Sarriana – Club Lemos (Domingo ás 16 horas na Ribela): os dous equipos chegan logo de gañar na competición regular. O conxunto local, con Xoan Peón á fronte, mira con optimismo o futuro, ao igual que os monfortinos, que logo do triunfo ante o Foz puxeron terra de por medio co descenso.
– S.D. Santaballés – C.D. Foz (Domingo ás 16 horas na Liga): os chairegos, un dos conxuntos máis en forma do fútbol lucense, situados en postos de ascenso a Preferente, reciben a un Foz sumido nunha crise de resultados. Os de Gayol buscarán reencontrarse coa vitoria e recuperar sensacións para os vindeiros encontros ligueiros.
– U.D. Pastoricense – Taboada F.C. (Domingo ás 16 horas no Acebreiro): logo de rachala xeira negativa no seu feudo cun triunfo ante o Pol, os de Fran Veiga tentarán darlle continuidade e avanzar na Copa. Enfronte un Taboada que chega logo de catro xornadas sen gañar en liga.
ENCONTROS SOLIDARIOS OU AMIGABLES
– III XORNADA DE FRATERNIDADE ‘XOSE DA FLOR‘ (Sábado ás 12 horas na Lomba). Encontro homenaxe a Xose da Flor, organizado pola Asociación M de Meira, que enfrontará aos moitos dos seus amigos, uns nas filas do Crecente (integrado por moitos ex xogadores do Pastoricense) e outros nas do Meira. Ao rematar haberá un xantar na Casa Cazoleiro.
– XII EDICIÓN DO TORNEO NACIONAL DE FÚTBOL 7 PARA ÁRBITROS (Sábado a partir das 9 da mañá na Polvereira): Unha nova edición organizada pola Peña de Árbitros 9,15 que contará cos nosos colexiados, pero desta volta como os grandes protagonistas. Participarán árbitros de toda a xeografía galega, así como de Castela e León.
– II TORNEO DE NADAL. CARBALLEDO – CHANTADA B (SÁBADO ÁS 16:15 HORAS NO CATRO VENTOS).
– BECERREÁ DÉCADA DOS 80 – BECERREÁ DÉCADA DOS 90 (Sábado ás 18 horas no Municipal de Becerreá): Encontro entre vellas glorias do conxunto da montaña. Ben seguro que rematará cunha cea de confraternidade.
– V PARTIDO BENÉFICO PRO AXUDA NADAL SOLIDARIO: S.D. BROLLÓN – VETERÁNS DO BROLLÓN (Domingo ás 16 horas nos Medos): Tódolos asistentes poden colaborar aportando alimentos non perecedoiros.
– II TORNEO DE NADA DE FÚTBOL FEMININO PELUQUERÍA MIXTA FRIOL. (Domingo 29 de decembro ás 16:30 horas). Triangular benéfico con recollida de xoguetes para os nenos hospitalizados no HULA. . Ás 16:30 o P.M. Friol mídese á S.D. Ponferradina. Ás 17:30 o cadro berciano enfrontarase ao filial do Friol, para rematar ás 18:30 horas con enfrontamento entre os dous conxuntos locales.
O último Trío de Ases do 2019 chega incompleto. O forte temporal deixounos sen unha boa ración de fútbol. O derbi provincial de Terceira entre Polvorín e Racing Vilalbés foi suspendido, ao igual que o encontro que tiña que disputar a Residencia en Boiro. Quen si xogaron foi o Viveiro e o Ribadeo, nun intenso derbi mariñán que rematou en táboas. O Lemos superou ao Foz e colle aire na clasificación, mentres que a Sarriana goleou ao Xallas en Santa Comba.
O Ribadeo empatou nos últimos intres ante o Viveiro nun apaixoante derbi mariñán (2-2). Comezou trepidante o encontro, nun campo das Valgas que resistiu as fortes choivas dos últimos días. Na primeira xogada, Aitor conectou con Luki e o de Friol non errou ante Manu Cedrón. Co marcador favorable, o Ribadeo fíxose co mando do partido durante o primeiro tempo. O propio Luki puido poñer terra de por medio, pero desta volta o gardameta viveirense estivo máis acertado. O Viveiro non era quen de trenzar o xogo ao que está acostumado e os xogadores de ataque non recibían balóns en condicións. Tan só Álex Meitín foi quen de disparar entre os tres paos na primera metade. Logo do paso por vestiarios o encontro trocou de decoración. Os de Chusky foron mellores e Gerardo amosou a súa condición de pichichi. A primeira que tivo, rematou en gol. O ex ribadense Tichu recolleu un balón na área e inventou unha chilena que sorprendeu a Carrera no que foi o tanto da remontada visitante. Cando parecía que o terceiro tanto do Viveiro estaba máis preto, os de Rafa Casanova tiraron de orgullo e un Luki en estado de gracia empatou o encontro co tempo cumprido logo dun bo pase de Poratti. Aínda houbo tempo para outra ocasión, e Luki a piques estivo de facelo terceiro, pero atopouse coa boa intervención de Rubén, que sustituíra ao mancado Manu Cedrón.
O Lemos da un chimpo na clasificación logo de vencer ao Foz (2-1). O cadro monfortino venceu na Pinguela nun encontro no que foi lixeiramente superior. Armesto foi o xogador máis incisivo dos de Edu Rodríguez na primeira metade e gozou de dúas ocasións claras, pero o gardameta Manu Pardo estivo acertado. Preto do final da primeira metade, Álex Paz fixo o tanto dos focenses desde o punto de penalti. Aos catro minutos da reanudación, Armesto logrou a igualada e sobrepasado o cuarto de hora, Varela anotou o segundo. Nos instantes finais, o debutante Asier puido sentenciar un encontro que deixa tocados aos de Gayol, que non gañan desde o 27 de outubro.
A Sarriana acadou o primeiro triunfo da ‘era Peón’ tras golear ao Xallas (0-4). Vitoria cómoda dos sarriaos en Santa Comba ante conxunto local que non inquedou a meta de Peti ao longo dos noventa minutos de partido. Abriu a lata cedo o equipo lucense cun tanto de Keko logo dun centro lateral, e Omar ampliou diferencias tras un penalti cometido por Mauro. Os de Xoan Peón tiveron ocasións de tódalas cores. Desde fóra da área, de máis preto, de remate de cabeza, de falta….as máis claras nas botas de Omar, Mauro e Keko, pero non tiveron a puntería suficiente. Ás beiras do descanso, o cadro local quedou en inferioridade por expulsión do defensor Jacobo. Na segunda metade, o Xallas tivo unha leve melloría, pero sen ser suficiente para inquedar a área rival. De tódolos xeitos, a Sarriana non sentenciou ata os últimos dez minutos. Omar fixo o seu segundo tanto da tarde e Álvaro completou a goleada.
O forte temporal fixo que quedara suspendida a xornada do sábado, pero o domingo teremos interesantes encontros nesta última xornada antes do Nadal.
PREFERENTE NORTE
– Club Lemos – C.D. Foz (Domingo ás 16 horas na Pinguela): encontro clave na loita pola permanencia. O conxunto local suma catro xornadas sen gañar e precisa do triunfo para escapar da queima. Os mariñáns acumulan seis partidos sen coñecela vitoria e teñen dous puntos menos que os de Edu Rodríguez.
PRIMEIRA AUTONÓMICA
– Atlético Escairón – E.D. Lourenzá (Domingo ás 16:15 horas no Municipal do Saviñao): o cadro local, líder destacado da categoría, recibe ao pechacancelas. Os de Diego Rego, malia estar nunha situación comprometida están a ser un equipo moi competititvo. Os de Montoto buscarán ampliar diferencias cos seus perseguidores.
– U.D. Pastoricense – S.D. Pol (Domingo ás 16 horas no Acebreiro): encontro de proximidade, no que os de Fran Veiga buscarán o primeiro triunfo da temporada no seu feudo e así abandonar a zona de descenso. Enfronte un Pol en racha. Logrou 13 dos últimos 15 puntos en xogo e ten os postos de ascenso a tan só tres puntos.
– S.D. Burela – Friol C.F. (Domingo ás 16 horas na Marosa): con tan só unha derrota en toda a temporada, o conxunto mariñán camiña con paso firme cara os postos de ascenso. Buscará un triunfo nunha Marosa ata o de agora infranqueable ante un Friol que ten o descenso directo moi preto.
Copa Deputación Segunda e Terceira Autonómica
– S.D. Viveiro – C.D. Goiriz (Domingo ás 17:30 horas no Municipal Marcos Gómez): o único supervivinte do grupo norte da Terceira Autonómica tentará seguir o seu camiño na Copa. Recibe a un Goiriz que pelexa por fuxir dos postos de perigo en Segunda.
– C.D. Sober – S.D.C. San Lázaro (Domingo ás 16 horas en Centeás): o conxunto local, que ocupa postos de promoción de ascenso a Segunda, buscará dar a sorpresa ante un San Lázaro intratable na liga.
Chega o derbi mariñán máis repetido nos últimos anos en Preferente. O Ribadeo e o Viveiro veranse as caras este domingo ás 16 horas nas Valgas (San Miguel de Reinante), un dos campos máis utilizados polo conxunto ribadense mentres dura a posta a punto do Pepe Barrera.
Desde a temporada 2013/2014, temporada na que o Ribadeo rematou ascendendo a Terceira División, ámbolos conxuntos nunca se voltaran a enfrentar nunha situación clasificatoria tan privilexiada. Fora precisamente un 22 de decembro, a mesma data que a deste domingo cando no Pepe Barrera, o equipo daquela adestrado por Manolo Vilachá ocupaba o segundo posto por detrás do Bergantiños, recibía a un Viveiro situado na cuarta praza. Os tres puntos foran para os viveirenses que venceran por un contundente 0-3, con dous goles do hoxe ribadense Erni e outro de Rego.
Na actual temporada, o Ribadeo ocupa a cuarta praza con vinteoito puntos, a cinco do Boiro, segundo clasificado. O conxunto de Rafa Casanova, logo dun comezo irregular, foi quen de encadear oito encontros sen perder, o que propiciou que se achegase á zona de privilexio. A derrota diante do Dubra, conxunto situado na zona baixa da clasificación, foi rapidamente esquecida cun solvente triunfo no sempre difícil campo do Puebla. Aínda que o Viveiro se amosa practicamente intratable, o conxunto local tentará facer das Valgas, o seu feudo nesta primeira volta un fortín, onde só perdeu un encontro no que vai de temporada, fronte ao San Tirso.
O Viveiro chega ao derbi na primeira posición, posto que ocupa desde a primeira xornada de competición na que goleara en Cantarrana ao Boimorto. Non deixou o liderato o cadro adestrado por Chusky, que se mantén invicto como local, sendo soamente capaz o Noia de arrancar un punto do campo viveirense. E como visitante, o rendimento do Viveiro é moi semellante. Un empate na Ponte dos Brozos ante o Arteixo, e a única derrota do curso, a que lle infrinxiu a Sarriana na sexta xornada ligueira. Nun derbi non hai favoritos, pero non poñerlle a etiqueta a este Viveiro semella imposible.
O último enfrontamente entre os dous conxuntos tivo lugar o 7 de abril deste mesmo ano e rematou con empate a dous tantos. Fernando, hoxe nas filas da Sarriana, anotou os dous tantos do Ribadeo, mentres que Arturo fixo o propio para o Viveiro.
O vindeiro fin de semana, Ribadeo e Viveiro volverán a enfrontarse, desta volta na eliminatoria de oitavos de final da Copa Deputación.
Falamos con dous dos protagonistas do encontro. Dous xogadores que vestiron as camisetas de ámbolos dous equipos: Erni (Ribadeo F.C.) e Tichu (Viveiro C.F.)
QUE OPINAN OS PROTAGONISTAS?
ERNI (RIBADEO F.C.)
– O equipo que o viu medrar. «Será un encontro especial, xa que o Viveiro é o equipo no que me formei e no que pasei a maioría da miña carreira deportiva. Non vou negar que cando saiu o calendario o primeiro que mirei foi a data do derbi. Serei dúbida para o partido por lesión, e fastidiaríame bastante no poder disputalo. Téñolle un cariño e respecto especial ao Viveiro e sempre lle desexarei todo o mellor, excepto os dous partidos nos que nos imos enfrontar».
– O derbi. «Son partido distintos nos que é difícil saber o que vai suceder. Os xogadores estamos máis motivados e hai moita intensidade, así que creo que os detalles nas dúas áreas marcarán a diferencia. O Viveiro é un equipo moi rápido, que controla moi ben as transicións e con xogadores moi desequilibrantes, polo que teremos que estar moi atentos e concentrados se queremos lograr a vitoria«.
– A boa clasificación do Ribadeo. «É inevitable non mirar a clasificación. Vémola domingo tras domingo e sempre queres estar o máis arriba posible. Pretendemos seguir nesta liña para non baixar dos postos altos, competindo tódolos partidos. Cando cheguemos ao último tramo de competición veremos se temos a sorte de loitar por algo bonito, pero de momento queda moita liga e debemos ir partido a partido«.
– A porra. «Váleme calquera resultado que sexa un triunfo do Ribadeo, pero voume mollar e apostar por un 2-1 ao noso favor«.
TICHU (VIVEIRO C.F.)
– Sen relaxación no liderato. «Afrontamos o partido como contra o resto de rivais da liga, con moitas gañas e coa ambición de ir a polos tres puntos, ao igual que en tódolos encontros. Ademáis un derbi sempre se vive ao máximo, independentemente da situación de cada un. Quizais chegamos no mellor momento das últimas temporadas, pero non podemos caer na relaxación, xa que o que nos levou ao liderato foi o traballo e a intensidade de tódolos días«.
– O derbi. «Agardo un partido complicado como tódolos derbis, con moita intensidade e moita disputa por parte dos dous equipos. Encima as condicións climatolóxicas seguro que levan a un encontro con moitas interrupcións e posiblemente a un xogo máis directo e máis bronco do habitual. Chegamos os dous equipos nun bo momento de forma, e creo que será un partido igualado e agardo que o disfrute o espectador. O Ribadeo destaca polo seu bloque. É un equipo ao que custa bastante crearlle ocasións porque deixa poucos espacios e teñen perigo a balón parado. Ademáis teñen xogadores moi rápidos para saír á contra como Luki ou Aitor e logo a Poratti, que todos coñecemos a súa calidade, e Criss que é un goleador«.
– Encontro especial. «Un sempre deixa boas amizades nos equipos nos que xoga e no Ribadeo hai xente dunha calidade humana espectacular, de feito sigo falando coa maioría dos seus xogadores. Sempre é bonito xogar contra os amigos«.
– A porra. «Non me vou mollar. Esperemos que a vitoria sexa para o Viveiro e que non se manque ninguén no partido«
O Trío de Ases déixanos o gran triunfo do Racing Vilalbés na Madalena ante o Rápido de Bouzas e a derrota pola mínima do Polvorín na Coruña ante o Silva en Terceira. Na Preferente, o Viveiro sufriu para gañarlle ao Sigüeiro, mentres que o Ribadeo venceu no campo do Puebla. A Sarriana non pasou do empate na Ribela ante o Montañeros e o Lemos caeu na sempre difícil visita a Noia. Residencia e Foz non puideron sumar no seu campo e caeron ante o Boimorto e o Boiro, respectivamente.
O Racing Vilalbés derrotou ao Rápido de Bouzas con Cuadrado como protagonista (3-0). Segundo triunfo consecutivo para os chairegos, que se colocan novenos e deixan ao seu rival como pechacancelas. Foron mellores os de Simón Lamas, con Cuadrado como estrela da tarde. Abriu a lata cedo, aos cinco minutos, logo de aproveitar un rexeite do gardameta visitante. E antes do descanso cun zapatazo desde a frontal fixo o segundo. Na segunda metade o dianteiro lucense redondeou a súa actuación cun tiro cruzado ante o que nada puido facer Lorenzo. O Rápido tentou reducir diferencias e estrelou un balón no longueiro e Pita interviu con éxito nun remate de Pablo Carnero, pero o marcador non se moveu.
Un erro condena ao Polvorín nun igualado encontro ante o Silva (1-0). Nun partido sen grandes ocasións, unha perda na saída de balón dos lucenses aproveitouna Marcos Gómez para facer o único gol do partido. Os de José Durán impuxeron o seu xogo e buscaron a porta contaria pero sen crear moito perigo. Na segunda metade, o filial do CD Lugo embotellou ao Silva. Rayco, Juan Brunet e Álex Rey, moi participativos preto da área rival tentárono, pero non chegaron as ocasións. Tan só o Silva, co Polvorín volcado polo empate, puido sentenciar, pero o balón estrelouse no pao.
O Viveiro gañou ante o Sigüeiro cun solitario tanto de Uriol (1-0). O líder púxose o uniforme de traballo ante un correoso Sigüeiro. A ausencia do pichichi Gerardo por sanción fixo que Chusky remodelase o seu ataque e na primeira metade non lle deu o froito agardado. Tichu tivo única ocasión clara dos primeiros corenta e cinco minutos nos que non houbo apenas xogadas de perigo e o conxunto visitante sentiuse cómodo. Cambiaron as tornas logo do pase por vestiarios e os mariñáns asediaron a portería dun inspirado José. Álex Pérez tivo a máis clara cun testarazo que detivo de xeito espectacular o gardameta visitante. A falta de seis minutos para o final, o central Uriol anotou un tanto que lle serve ao Viveiro para poñer outro chanzo no seu camiño cara Terceira.
O triunfo do Ribadeo no campo do Puebla achega aos mariñáns á zona alta (0-2). Encontro moi práctico dos de Rafa Casanova, que foron superiores ao seu rival nunha tarde de forte vento no campo da Alta. Dous erros defensivos do cadro local servíronlle ao Ribadeo para sentencialo encontro. Criss aproveitouse da mala conexión do porteiro coa defensa e roubou o balón e Luki marcou. Pouco despois, un balón solto na área recolleuno Luki para anotar o segundo. Na segunda metade, Poratti marcou o ritmo e o Puebla non inquedou a Carrera ata o desconto.
A estrea de Xoan Peón no banco da Ribela non trouxo a vitoria para a Sarriana (1-1). Non se cumpliu o dito e Peón non puido estrearse cun triunfo. O Montañeros deu sinais de ser mellor equipo que o que indica a clasificación e foi quen de adiantarse cun tanto de Miguel Real aos cinco minutos de partido. Tentárono os sarriaos, que realizaron un bo partido, sobre todo nunha segunda metade de superioridade local. Keko logrou a igualada no ecuador do periodo final.
O Lemos acusou a súa fraxilidade defensiva e caeu ante o Noia (4-2). Non foi un mal encontro dos monfortinos, que se adiantaron no marcador cun soberbio tanto de Armesto. Non escatimaron forzas ámbolos conxuntos en ataque e sucedéronse as ocasións de gol. Nando e Quintairos puxeron a proba a Ramón e Adrián Castañer tivo nas súas botas o 0-2. Pero o Noia deulle a volta ao marcador en dous minutos. Anxo de cabeza e Nando logo de roubarlle o balón a un defensor lemista remontaron. Pero os de Edu Rodríguez empataron antes de descanso cun tanto de Adrián Díaz, que aproveitou o rexeite logo dun tiro de falta de Denis. Na reanudación, César anotou para o Lemos, pero o colexiado anulou o tanto por fóra de xogo. Pasado o cuarto de hora, Nando fixo o terceiro e Hugo sentenciou a falta de dez minutos para o final.
O Foz caeu no Martínez Otero ante un Boiro enrachado (1-2). A inercia dos resultados fixo que o marcador caese do lado visitante. Bo encontro dun Foz penalizado en exceso polos erros defensivos. Adiantouse o Boiro por medio de Saviola, ao aproveitar un rexeite e ampliou diferencias Paco desde o punto de penalti. Álex Paz devolveu a esperanza aos mariñáns tras rematar unha falta botada por Canario. A expulsión por dobre cartón de Jesús Pablo na segunda metade enterrou as ilusións dun Foz que non lle perdeu a cara ao encontro.
A Residencia perdonou ante o Boimorto e rematou pagándoo (0-2). A falla de gol condenou aos de Álvaro Meilán, que gozaron de claras ocasións de gol. Dani Galán en dúas ocasións, Iago, Roberto e Lucas tiveron as máis claras. Pero o Boimorto chegou dúas veces e marcou dous tantos, ambos obra de Sergio. O primeiro á saída dun córner e o segundo logo de rematar un balón colgado ao segundo pao. Na segunda metade, os visitantes pecháronse e mantiveron a portería a cero.
Este fin de semana retornan á competición tódalas categorías, a excepción da Terceira Autonómica, e temos encontros para tódolos gustos. Ademáis, o derbi provincial do fútbol feminino.
Terceira División
– Racing Vilalbés – Rápido de Bouzas (Domingo ás 16 horas na Madalena): coa moral reforzada logo do triunfo en Abegondo ante o Fabril, os de Simón Lamas tentarán escalar postos na clasificación diante dun Rápido de Bouzas, que coa chegada de Milo Abilleira, quere abandoar canto antes os postos de descenso.
Preferente Norte
– S.D. Sarriana – At. Coruña Montañeros (Domingo ás 16:15 horas na Ribela): Xoan Peón fará o seu debut no banco sarriao logo da destitución de Dani Fernández. Faino co obxectivo de achegalo equipo aos postos de ascenso. O primeiro obstáculo no camiño será un conxunto en apuros: un Montañeros que mellorou notablemente con Moisés Pereiro no banquiño.
– C.D. Foz – C.D. Boiro (Domingo ás 16 horas no Martínez Otero): chega un histórico á Mariña. O Boiro, igualado co Fisterra na segunda posición, non perde desde a terceira xornada de liga e é un firme candidato ao ascenso. Pero os focenses precisan un triunfo, que se lle resiste nas últimas xornadas, para afastarse dos postos de descenso.
– S.D. Residencia – Boimorto C.F. (Domingo ás 16:30 horas na Cheda): os de Álvaro Meilán reciben a un conxunto incómodo, pero que baixa o seu rendemento lonxe do Carballal, factor que deben aproveitar os lucenses. Un triufo colocaría á Residencia preto da zona media da clasificación.
– Viveiro C.F. – Sigüeiro C.F. (Domingo ás 12 horas en Cantarrana): co obxectivo de facer do seu campo un fortín, o conxunto adestrado por Chusky buscará tres novos puntos que lles permita seguir cun amplo marxe no liderato. Enfronte un recén ascendido, debutante na categoría, pero que está a raiar a un gran nivel.
Primeira Autonómica
– Chantada Atlético – S.D. Chantada (Domingo ás 16:30 horas no Sangoñedo): derbi chantadino no que o conxunto local, tan só un punto por enriba dos postos de descenso directo, tentará revertila súa situación ante unha SD que chega a este encontro logo de golear ao Monterroso e con opcións de situarse en postos de ascenso directo.
– S.D. Monterroso – S.D. Outeiro de Rei (Domingo ás 16 horas en Cerdeiriños): malia a derrota ante o Chantada, os de Óscar Méndez seguen segundos e defenderán ese posto ante outro dos firmes candidatos ao ascenso de categoría. O conxunto adestrado por Josito Jul acumula tres xornadas sen gañar, pero conta con tan só dous puntos menos que os monterrosinos.
Segunda Autonómica
– C.D. Alfoz – S.D. Candelaria (Sábado ás 16 horas no Municipal de Alfoz): o conxunto local, invicto no seu campo e sen coñecela derrota desde a primeira xornada ligueira, recibe no derbi mariñán ao Candelaria. Os cervenses xa foron quen de empatar diante do San Ciprián ou do Xermade.
– C.D. Palas – S.D.C. San Lázaro (Sábado ás 16 horas nos Chacotes): malia traxectoria irregular desta temporada, o Palas aspira acercarse aos postos de cabeza e manter a boa xeira no seu campo. Non o terá doado ante un dos conxuntos máis en forma do fútbol lucense. Os de Diego Rey son líderes e non perden desde a segunda xornada de liga.
Reto Iberdrola
– Peluquería Mixta Friol – Secció Esportiva AEM (Domingo ás 12 horas na Reigosa): logo da destitución de Dani Guerrero, as rapazas do Friol adestradas temporalmente por Geluco Villar buscarán dar a sorpresa ante un conxunto da zona alta.
Segunda División Galega Feminina
– S.D. Chantada – Carballedo C.F. (Domingo ás 13 horas no Sangoñedo): outro derbi en terras chantadinas. O cadro local tentará acadar un triunfo que as acerque a un Carballedo en racha.
– S.G. Comercial – C.D. Lugo (Domingo ás 17 horas no Rodríguez Lago 2): os dous equipos da capital da provincis mídense nun encontro con favoritismo visitante.
Liga Feminina Fútbol 7
– S.C.D. Milagrosa – Orillamar S.D. (Domingo ás 11:15 horas no Luis Gorgoso): primeiro encontro da segunda fase da liga de fútbol 7. As lucenses buscarán un triunfo para comezar este novo reto con bo pé.
Chega unha data sinalada para o fútbol feminino lucense. O domingo ás 19 horas, a Reigosa será o esceario do derbi provincial da Primeira División Galega Feminna entre o Peluquería Mixta Friol B e o Antas. Os dous representantes da nosa xeografía mídense nun encontro ao que chegan en situacións ben distintas.
O filial friolista afronta o derbi na quinta posición da táboa clasificatoria con vintecinco puntos. O conxunto adestrado por Covi experimentou unha gran melloría de xogo e resultados nas últimas xornadas, nas que obtivo seis triunfos nos sete últimos partidos. Malia que no comezo ligueiro, pesou a falta de experiencia na categoría, actualmente o PM Friol B é un dos conxuntos máis en forma da categoría.
Covi adestra ao filial e segue formando parte do cadro de xogadoras do primeiro equipo, este ano en Reto Iberdrola
A Sociedade Deportiva Antas, pola contra, atravesa unha mala xeira. Undécimo clasificado con quince puntos, o equipo adestrado por Víctor Rodríguez e Carlos García tan só gañou un dos últimos nove encontros. Logo dun bo comezo de campionato, esta racha negativa fixo que se achegase aos postos de perigo. De tódolos xeitos, a temporada do conxunto da Ulloa é significantivante mellor que a pasada campaña a estas alturas, o que fai que no Antas se respire optimismo respecto do obxectivo marcado: manter a categoría.
O Antas tentará seguir unha temporada máis en Primeira
Falamos do derbi cos máximos responsables técnicos de ámbolos equipos: Covadonga Regueiro ‘Covi‘ (PM Friol B) e Carlos García (SD Antas).
QUE OPINAN OS PROTAGONISTAS?
COVI (PELUQUERÍA MIXTA FRIOL B)
– O derbi. «Agardo un encontro difícil para nós. Malia que este ano non vin xogar ao Antas, se mantén a idea de anos anteriores é un equipo contundente atrás e con xogadoras moi físicas e con experiencia que saben aproveitar moi ben os erros do rival e con moito perigo a balón parado«.
– Estilos opostos. » Cóstanos xogar contra un equipo do estilo do Antas. Nós expoñemos moito e intentamos levar a iniciativa do xogo a través do dominio do balón, e ás veces cando non estamos acertadas nas vixianciase nas transicións defensivas concedemos demasiadas ocasións ao rival«.
– O teito do equipo. «Para nós a clasificación é anecdótica. Buscamos competir partido a partido e que as xogadoras cumplan os seus obxectivos individuais. Somos un equipo filial e formamos futbolistas que podan chegar ao primeiro equipo. Para iso é importante estar en Primeira, pois notamos un gran cambio con respeto á Segunda. O ano pasado competiamos tres ou catro encontros ao ano, e esta temporada tódolos rivais che esixen dar o máximo. Isto fixo que nos costara adaptarnos á categoría ao comezo, pero tamén que a maioría das xogadores evolucionaran máis nestes catro meses que en todo o último ano«.
CARLOS GARCÍA (S.D. ANTAS)
– O Friol. «Será un partido complicado nun campo moi grande. É un equipo ao que Covi lle implantou unha filosofía de toque e posesión, e xornada a xornada van medrando. Contan con xogadoras con experincia como a porteira Jessica ou Yanire que xogaron en Segunda Nacional, ou María, Carla, Denise . . . teñen un gran equipo«.
– A racha negativa. «Somos un equipo pequeno. Temos poucas rapazas e moitas delas comparten o Antas co fútbol sala. Neste momento contamos cun cadro de xogadoras bastante curto e iso nótase moito á hora de competir e tamén de adestrar».
– O obxectivo. «O balance a estas alturas de temporada, e tendo en conta as nosas circunstancias, é positivo. O ano pasado a estas alturas só tiñamos sete puntos e esta campaña xa levamos quince, o cal mellora o feito notablemente. Pero seguro que nos tocará sufrir nesta categoría tan igualada«.
Poucos anos atrás, o Lemos viviu unha das situacións máis críticas da súa historia, tanto a nivel deportivo como económico. Cun enorme traballo da nova xunta directiva e tamén do corpo técnico, o conxunto monfortino trocou a súa filosofía e tras voltar á Preferente, afronta unha temporada ilusionante co gran obxectivo de manterse na categoría.
Un dos buques insignia do proxecto do Club Lemos é Adrián Armesto. O atacante está a ser un dos máis destacados do equipo adestrado por Edu Rodríguez. Falamos con él.
FUTBOLINLUGO: Como ves este primeiro tercio de temporada do Lemos?
ARMESTO: Comezamos a pretemporada con sensacións moi boas. Fomos quen de competirlle a equipos de Terceira División e acadamos un gran nivel de xogo. Na primeira xornada sacamos os tres puntos nun campo moi difícil como é o do Dubra, e despois entramos nesa racha negativa de varias derrotas consecutivas da que nos costou saír, pero estabamos seguros que o lograriamos. Ata o de agora estamos competindo ben e firmamos un aprobado no que vai de liga.
‘Se logramos mellorar en defensa teremos moito camiño andado para acadala permanencia’
FIL: Bastantes xogadores debutaron este ano en Preferente, polo que a falta de experiencia puido ser un dos factores polo que vos costou arrancar.
A: Non o creo. É certo que para moitos integrantes da plantilla este é o seu primeiro ano en Preferente, pero todos eles están a dar o nivel que esta categoría esixe, polo que non creo que influíse moito este aspecto.
FIL: Sodes o segundo equipo que máis goles encaixa da categoría. A permanencia pasa por mellorar en defensa?
A: Todos, desde o cadro de xogadores ata o corpo técnico, somos conscientes do que supón iso supón. E estamos traballando para tentar correxilo, comezando desde a liña de ataque ata o porteiro, xa que sabemos que a permanencia pasa principalmente por encaixar poucos goles. En ataque temos un gran potencial, polo que se logramos mellorar neste aspecto teremos moito andado.
‘A aposta pola xente da casa creo que é a liña a seguir’
FIL: Cada ano a permanencia en Preferente é unha batalla sen tregua. Cres que este ano será igual?
A: Tódolos anos recordo unha Preferente moi axustada. Lembro o meu último ano nesta categoría co Lemos na cal marcamos o descenso e logramos salvarnos con 54 puntos, e iso xa o di todo… Creo que este ano, pra non variar, estarán as cousas de novo moi reñidas.
FIL: O voso míster apostou por un modelo de equipo formado por xogadores da comarca. Á vista está que podedes competir en Preferente. Cal é o teito deste equipo?
A: Si, salvo dous ou tres xogadores todos somos da casa creo que esa é a liña a seguir para que o Lemos se faga forte nesta categoría. Co tempo poderemos aspirar a metas máis ambiciosas, xa que, na nosa comarca hai xogadores dun gran nivel , que algúns están sen xogar por motivos laborais e outros están noutros equipos, pero co tempo creo que rematarán xogando no Lemos.
‘Cada temporada hai mellores xogadores e equipos na Preferente’
FIL: A afección da Pinguela volveu ilusionarse co equipo logo duns anos difíciles e é un dos campos cun mellor ambiente cada xornada. Imaxino que será o seu apoio será fundamental de cara ao obxectivo da permanencia.
A: É un auténtico pracer xogar os domingos na Pinguela con case todo o estadio cheo, chegando ás veces aos 800 afeccionados. A xente está moi ilusionada co equipo e acuden ver aos seus veciños, amigos, compañeiros de traballo, etc. Ao final coñecémonos todos no pobo e este é un dos principais motivos polos que se rexistran estas boas entradas. Agardemos responderlles con bo xogo e coa permanencia.
FIL: A nivel persoal, como te atopas nesta temporada do teu retorno á Preferente?
A: A verdade é que me atopo nun dos meus mellores momentos desde que xogo ao fútbol, non só polo meu estado a nivel deportivo, senón tamén polo meu estado anímico co equipo. Síntome moi querido polos compañeiros e polos afeccionados. Somos unha auténtica familia e hoxe en día iso é moi difícil de atopar nun vestiario. Non só nos xuntamos para adestrar e xogar, facemos vida entre nós como se fosemos irmans, ceamos moitas veces xuntos, facemos actividades, ímonos de vacacións, moitas cousas . . . Creo que iso é o máis fermoso que che pode dar este deporte.
FIL: Como ves a categoría a nivel global? Que foi o que máis te sorprendeu nesta temporada?
A: É unha categoría que che esixe estar sempre ao teu mellor nivel, xa que o marxe de erro é moi pequeno e non te podes despistar nin un só intre. Os niveis de adestramentos, partidos, intensidade de xogo son moi altos e iso gústame. Xa non é o meu primeiro ano na Preferente, pero o que máis me sorprende a medida que pasan os anos é o nivel dos xogadores. Case tódolos equipos ano tras ano forman mellores planteis e moitos xogadores con moita experiencia e gran nivel xogan nesta liga.
Malia que nesta ponte festiva, o noso fútbol colle un descanso, a pelota non deixa de rodar por completo. A Primeira Autonómica e o fútbol feminino disputan unha nova xornada, á que se suma a Copa Deputación.
PRIMEIRA AUTONÓMICA
– Riotorto C.F. – Atlético Escairón (Domingo ás 12 horas na Veiga): o conxunto local, no seu mellor momento da temporada logo de catro triunfos consecutivos, recibe ao líder. O cadro adestrado por Javier Montoto mantén catro puntos de marxe sobre o segundo, malia non conseguir gañar nos dous últimos encontros.
– S.D. Outeiro de Rei – S.D. Pol (Domingo ás 16 horas na Fonte): os de Josito Jul precisan dun triunfo, logo de encadear dúas xornadas sen gañar, para que non afastarse dos postos altos. Os visitantes cun triunfo petarían á porta da zona cabeceira.
– U.D. Pastoricense – C.D. Guntín (Domingo ás 16 horas no Acebreiro): coa intención de lograr a primeira vitoria da temporada no seu feudo, o conxunto da Pastoriza medirase a un Guntín que está a realizar unha gran temporada. Con dezaoito puntos, acumula cinco xornadas sen perder.
SEGUNDA DIVISIÓN GALEGA FEMININA
– C.D. Lugo – Carballedo C.F. (Domingo ás 17 horas no Luis Gorgoso): o cadro capitalino buscará un triunfo no derbi provincial para achegarse ao liderato. Malia ser favorito, non o terá doado ante un Carballedo que suma tres triunfos consecutivos e está comodamente situado na metade da táboa.
– S.D. Chantada – Xuventude de Crendes (Domingo ás 16 horas no Sangoñedo): as chantadinas precisan un triunfo para verse que as manteña con opcións de escalar postos na táboa. Reciben a un conxunto que baixa considerablemente o seu rendemento fóra da casa.
COPA DEPUTACIÓN – SEGUNDA E TERCEIRA AUTONÓMICA
– S.D. Viveiro – Meira C.F. (Domingo ás 17:30 horas no Municipal Marcos Gómez): na temporada do seu debut, o filial viveirense, tentará seguir na Copa a boa xeira da competición regular. Non o terá doado ante un Meira asentado na zona noble de Segunda.
– S.D. Guitiriz – Mondoñedo C.F. (Domingo ás 16 horas no Suso Cruz): co obxectivo de recuperar sensacións de cara á competición ligueira, o conxunto local recibe ao conxunto de Julio Castro, que logo dun difícil comezo de temporada, foi quen de gañar os tres últimos encontros.
– O Incio Terra Brava – S.D.C. San Lázaro (Domingo ás 16 horas no Carboeiro): encontro entre dous dos conxuntos máis en forma do grupo sur de Segunda. Os locales, terceiros na clasificación tentarán avanzar na competición copeira ante o cadro adestrado por Diego Rey, intratable líder.
– Ferreira C.F. – C.D. Corgo (Domingo ás 16 horas no Baliño): logo de caer no campo do Oural e perdelo liderato, o conxunto local tentará facer valer o ‘efecto Baliño’ onde está invicto esta campaña, ante un Corgo que non perdeu desde o troco no banquiño.
Neste fin de semana de ponte festiva, no que xa se atisba moi de preto o Nadal, a Primeira Autonómica non descansa, e é a única categoría do noso fútbol masculino que disputa unha nova xornada ligueira. Un dos encontros máis sobranceiros da decimocuarta xornada é o que enfrontará a Chantada e Monterroso no Sangoñedo, o venres ás 16:15 horas.
O Chantada é quinto clasificado, cinco puntos por debaixo do Monterroso, segundo na táboa en posto de ascenso a Preferente. Os chantadinos contan por triunfos os seus encontros no Sangoñedo. No seu feudo ninguén foi quen de puntuar nesta temporada, pero lonxe del os de Juan Rodríguez empeoran notablemente os seus resultados. Con tan só un triunfo a domicilio, o acadado na segunda xornada na Veiga ante o Riotorto e algún empate meritorio na Marosa ou no Municipal de Outeiro, a S.D. Chantada non foi quen, polo momento, de acadar a regularidade necesaria para optar a unha, cada vez máis competida, praza de ascenso.
Os xogadores da casa son a aposta, unha temporada máis, do adestrador do Chantada, Juan Rodríguez
Pola súa banda o Monterroso xa deixou de ser a revelación da temporada para ser un firme candidato a pelexar polos postos de privilexio da categoría. O cadro adestrado por Óscar Méndez reforzouse de xeito inmellorable logo dunha última temporada complicada e ocupa a segunda posición dunha Primeira Autonómica na que cada ano a pelexa polo ascenso é unha loita sen cuartel. O cadro monterrosino é o único conxunto da categoría que se mantén invicto lonxe de Cerdeiriños, polo que o encontro ante un conxunto que non cede na súa casa, como é o Chantada, preséntase apaixoante.
Antas foi un dos principais reforzos do Monterroso para esta temporada
O último enfrontamento entre ámbolos conxuntos no Sangoñedo tivo lugar o 18 de novembro de 2019 e rematou con triunfo local por tres tantos a dous. Traste, en dúas ocasións, e Manu anotaron os tantos do Chantada, mentres que Lucas, este ano nas filas do Chantada Atlético fixo os dos tantos do Monterroso.
Falamos con dous dos máximos goleadores da categoría: Javi Ramos (Chantada) e Lorenzo (Monterroso).
QUE OPINAN OS PROTAGONISTAS?
JAVI RAMOS (S.D. CHANTADA)
– O Monterroso. «Agardamos un partido moi duro e disputado, o típico dun derbi. Anos anteriores o Monterroso foi un rival moi incómodo no Sangoñedo. Este ano levan unha traxectoria moi boa, o que xa nos anticipa a dificultado do encontro«.
– Falta de regularidade. «Non logramos unha continuidade nos resultados e iso fai que fóra da casa teñamos fases nos partidos que nos custen un pouco máis. Esa falta de confianza e de acerto, nalgunha ocasión en momentos chave, fixo que se nos marcharan puntos que nos permitirían estar un chanzo máis arriba. Certo é que na casa están saíndonos mellor as cousas, pero penso que aínda podemos mellorar o noso rendimento, tanto fóra como no Sangoñedo«.
– O proxecto. «É o máis valioso que temos e debemos darlle continuidade. Por iso algúns xogadores seguimos aquí despois de tantos anos. Se podemos loitar polo ascenso ou non verémolo máis adiante, pero agora estamos en disposición de competirlle a liga a calquera. Se temos ese acerto e un chisco de sorte seguro que poderemos estar loitando ata o final. Aínda que o Escairón ten unha pequena vantaxe de puntos, seis ou sete equipos poden estar aí arriba, ogallá sexamos un deles«.
LORENZO (S.D. MONTERROSO)
– O Chantada. «Tendo en conta que o encontro se disputa no Sangoñedo e o nivel do rival, son consciente que levar os tres puntos non será doado. O que máis me preocupa é que dos partidos xogados na casa non deixaron fuxir ningún punto. Aínda así, estamos preparados para afrontar un derbi coma este, e non me cabe dúbida que nos podemos facer coa vitoria«.
– A clave da boa temporada. «Houbo cambios e renovacións no equipo, que fixo que o grupo fose moi cohesionado e implicado e os resultados están ahí. Ademáis, o corpo técnico xoga un papel importante tamén no bo funcionamento do equipo esta temporada«.
– A pelexa polo ascenso. «Afrontamos cada partido con moitas ganas e tal como o facemos ata o de agora manterémonos ata o final. É certo que non podemos despistarnos, hai equipos que irán mellorando co transcurso da competición, pero sei que podemos e que temos opcións de manternos na zona alta ata o final«.
O Trío de Ases da decimoquinta xornada déixanos un doble triunfo dos equipos lucenses de Terceira. O Polvorín goleou ao As Pontes e o Racing Vilalbés gañou en Abegondo ao Fabril. Na Preferente o derbi provincial entre Lemos e Sarriana rematou en tablas. O Viveiro gañou en Mugardos e amplia diferencias no liderato. Foz e Residencia empataron no campo do Boimorto e Laracha, respectivamente, mentres que o Ribadeo caeu en Malates ante o Dubra.
O Polvorín fíxolle un set en branco ao As Pontes (6-0). Cuarto triunfo en cinco encontros para o filial lucense, que se está acostumando a gañar de goleada. Dous hat-tricks de Rayco e Morais sentenciaron un encontro moi cómodo para os de José Durán. Logo do primeiro tanto de Rayco, que aproveitou un regalo da zaga visitante, chegou a expulsión do gardameta do As Pontes Paco, que derrubou a Antón Escobar fóra da área. O atacante o Polvorín sufriu unha rotura de clavícula que o terá afastado dos campos preto de tres meses. Sentiuse cómodo no campo o filial do C.D. Lugo e chegaron os goles.
Vitoria importante e de prestixio do Racing Vilalbés ante o Fabril (0-1). Un tanto de Jose Varela á saída cun córner, pasado o primeiro cuarto de hora de partido, foi suficiente para que os chairegos voltaran á senda da vitoria catro xornadas despois. Os chairegos non condederon ocasións ao cadro deportivista na primeira metade, salvo un disparo do ex racinguista Villares, pero Javi Pita interviú con éxito. Logo do descanso, máis do mesmo. O Fabril levou a iniciativa pero sen crearlle excesivo perigo aos de Simón Lamas. Incluso Cuadrado puido sentenciar preto do final, pero lanzou alto.
O Viveiro remontou en Mugardos e amplía diferencias no liderato (2-3). Novo triunfo do conxunto de Chusky, desta volta con remontada incluída e aumenta a oito puntos a diferencia co segundo e terceiro clasificado. Comezou mandando o cadro local cun gol de Moi antes dos dez minutos de partido. Igualou Gerardo, que aproveitou unha indecisión da defensa mugardesa. O paso por vestiarios sentoulle ben ao Viveiro e en tres minutos marcou dous tantos. Primeiro foi Arturo cun lanzamento axustado ao pao e despois Tichu logo dunha xenialidade de Gerardo, que cunha rabona deixoulle o balón franco ao xogador de Outeiro. Álex Permuy recurtou diferencias desde o punto de penalti, pero os tres puntos non perigaron para os mariñáns.
O Ribadeo caeu dous meses despois e revive ao Dubra (0-3). Posiblemente o peor encontro da temporada dos de Rafa Casanova, que acusaron as baixas de xogadores importantes. Saiu mellor o cadro visitante e gozou de varias ocasións claras de gol, unha delas ao pao, sen embargo ao descanso chegouse co marcador inicial. Pero o Dubra marcou na primeira xogada do segundo tempo, logo de que un rexeite fixese que Roi introducirá o balón na súa propia portería. Poucos minutos despois, Miguel aproveitou un bo pase de Ferreiro e puxo terra de por medio. O Ribadeo tentouno sobre todo a balón parado, pero sen xerar ocasións claras de gol. Xa preto do final, Martín anotou o terceiro. Os mariñáns son quintos, a cinco puntos do ascenso directo.
O derbi entre Lemos e Sarriana rematou con reparto de puntos (2-2). Primeira metade con pouco fútbol na Pinguela. Tan só Adrián Díaz, para o cadro local, e Mauro os visitantes, gozaron de ocasións de gol. Na segunda metade, máis intensidade, máis fútbol e tamén máis goles. Adiantouse a Sarriana cun tanto de Álvaro e Armesto puido empatar pero enviou o balón ao pao. A falta dun cuarto de hora para o final, o propio Armesto foi derribdo na área e Adri Díaz superou a Lisboa desde os once metros. Xa preto do final, un saque desde o curruncho foi rematado por Borja Castro poñendo o marcador favorable para o Lemos. Pero no desconto, un golazo de Álvaro de lanzamento de falta desde a frontal igualou definitivamente o encontro.
Remontada do Foz en Boimorto pero cedeu o empate no último suspiro (3-3). Final de infarto no Carballal. Nun encontro marcado polo mal estado do céspede, ámbolos conxuntos optaron polo fútbol directo. Saiu beneficiado o cadro local e Neto adiantou aos de Susú Cores antes do primeiro cuarto de hora. Non xeraba perigo o Foz, e o marcador non se moveu ata mediada a segunda metade. O cadro local anotou o segundo por medio de Lucas. Os mariñáns reaccionaron e o Boimorto confiouse. Unha man na área foi sancionado como penalti e Asier non errou. Andrés Bustelo cun tiro cruzado conseguiu empatar e outra pena máxima, desta volta por un derribo certificou a remontada. Asier fixo o seu segundo tanto do encontro. Pero o conxunto local, ferido no seu orgullo logrou empatar cun testarazo de Gonzalo.
Empate da Residencia no campo do Laracha, rival directo (0-0). Punto positivo para o conxunto lucense, que ve como non lle recurta diferencias un equipo que ocupa praza de descenso. Poucas ocasións de gol, nun partido no que os de Álvaro Meilán mantiveron unha gran firmeza defensiva ante un Laracha con poucas ideas en ataque. A ocasión máis clara tívoa o ex ribadense Dapo, que estrelou un testarazo no longueiro. Na segunda metade, o cadro local abusou dos balóns colgados e a Resi non pasou excesivos apuros. Incluso Lucas tivo, á contra, unha boa ocasión de gol.
