Redactor - Diego Díaz Martínez

O partido en imaxes: Racing Villalbés-RC Deportivo (0-3)

0 Racing Villalbés: Pita; Diego López, Vérez, Bruno Caballero, David Buyo; José Varela, Javi Varela, Make, Ángel; Santi Gegunde e Pedrosa. Tamén xogaron Rumbo, Marino, David, Muiña, Javi Sandá, Aitor, Cuadrado, Rares e Anxo.

3 RC Deportivo: Carlos Abad; Valín, Álex Bergantiños, Juan Rodríguez, Héctor Hernández; Nacho González, Queijeiro, Sanmartín, Gandoy; Rui Costa e Adri Castro. Tamén xogaron Alberto Sánchez, Mujaid, Borja Granero, Salva Ruiz, Bóveda, Celso Borges, Keko Gontán, Lara e Miku.

Árbitro: Jesu López (Lugo). Non tirou de cartóns.

Goles: 0-1 Lara (min. 61). 0-2 Adri Castro (min. 66). 0-3 Celso Borges (min. 77).

A Magdalena. 300 espectadores.

Hai clásicos cos que nin a pandemia pode acabar. Como a visita do Deportivo á Magdalena en pretemporada. Co correspondente resultado favorable para os herculinos. Iso si cada curso ten a súa historia.

A deste 2020, ano oficial da máscara, foi a dun duelo de contrastes. Dunha primeira metade de cor chairega para dar paso á superioridade manifesta visitante na reanudación. Unha segunda parte na que chegaron todos os goles do encontro.

O primeiro acto foi o da clásica película de Hollywood, na que o alumno avantaxado supera ao seu mestre. ‘O Profesor’ Fernando Vázquez sufrindo ante o local Simón Lamas. Ambos non foron quen de poñerse de acordo. O técnico de Castrofeito apostou de inicio polas promesas de Abegondo, escoltadas polo liderazgo de Bergantiños no centro da zaga e un inoperante Rui Costa na punta de lanza. E o Racing saiu con case todo, con ampla maioría dos supostos titulares.

O resultado: táboas ao descanso e moitas conclusións para extraer. Dende que a estancia do Deportivo na Segunda B non vai ser un camiño de rosas ata a confirmación da solidez do bloque verde e vermello. O alumno Simón Lamas cedeulle o protagonismo da película ao suposto actor principal. Pero as escenas de verdade foron para o secundario de luxo. O perigo en ataque sempre correspondeu aos da Magdalena, que avisaron nalgún intento de Pedrosa ou José Varela. E deixaron novos rexistros co fútbol de Santi. Recordando ao do vello Justino. Liberdade e unha calidade moi por enriba do que mostrou calquera dos supostos ases a seguir na matinal do sábado. En chave, branquiazul pouco que destacar máis alá do poderío fisico de Valín ou as boas maneiras de Nacho. A tea de araña local sorprendeu ao gran candidato ao ascenso na división de bronce nacional. Ao nivel de ver aos coruñeses protestando polo aire dos balóns ou os típicos saques de banda dubidosos. Evidencias da incomodidade herculina.

Cambiou o conto tralo paso pola zona de vestiarios. A segunda unidade vilalbesa claudicou ante os Keko Gontán, Mujaid, Borja Granero, Lara ou o debutante Miku. Demasiados argumentos en contra para o humilde e equipo traballador lucense. Os goles eran só unha cuestión de tempo. Lara abriu a lata nun mal despexe local dentro da área. Adri Castro fixo o segundo á saída dun córner. E o último e definitivo, obra do ‘tico’ Celso Borges. Un triunfo tan agardado como sufrido para todo un Deportivo. Un club emblemático e referente no que moitos botaron de menos a presenza dun veciño: Diego Villares, o neno de Samarugo. Velo na súa Magdalena coa branca e azul ás costas tivese sido de xustiza.

O regreso en imaxes: Viveiro-Rácing Villalbés (2-1)

Fotógrafo: Diego Díaz

O regreso: Viveiro-Rácing Villalbés (2-1)

2 Viveiro: Cedrón; Agus, Édgar, Uriol, Pablo Louzao; Iván, Xaime; Aitor Moreda, Tichu, Rolle; e Arturo. Tamén xogaron Dani Montes, Asier e Jacob.

1 Rácing Villalbés: Javi Pita; José Varela, López, Bruno Caballero, Anxo; Aitor; Javi Varela, Sandá, Ángel; Rares e Cuadrado. Tamén xogaron Javi Rumbo, Muiña, Vérez, Buyo, Cadra, Make, David, Marino, Pedrosa e Santi.

Árbitro: Méndez López (Lugo). Asistido por Pereira Ferreiro y Abel Bruzos.

Goles: 0-1 José Varela (min. 68). 1-1 Xaime, de falta directa (min. 82). 2-1 Gerardo (min. 90).

Incidencias: Primeiro partido da ‘nova normalidade’ na provincia de Lugo. Cantarrana. 250 espectadores.

 

Choiva, máscaras e acción. Así comezou a nova normalidade en Cantarrana, co guion previsto. As imprecisións impuxéronse nunha primeira metade na que os visitantes non se atoparon cómodos ante un Viveiro que chegaba a ráfagas, cun Moreda excelso ante o seu exequipo. Tichu chegaba con perigo dende segunda liña. E Javi Pita, veciño en bando contrario, deixaba a parada da tarde nunha das incorporacións do dez dos mariñáns. O mediocentro chairego coquetou co gol de novo pero a ausencia de V(B)AR impediu comprobar unha posible gol pantasma. Nin co plasma de turno nin co poder do carajillo con esto das cantinas pechadas… Tampouco se protestou moito. O debutante Jorge Méndez levou o encontro sen maiores problemas.

Algunha amarela que outra amosou ao seu debido tempo e todo baixo control. Incluso co aumento de decibelios na segunda metade, con algunha que outra entrada a destempo. Tamén aumentaron as ocasións de Tichu. Esta vez cun gol anulado por claro fóra de xogo. Nunha das escasas aproximacións dos de Simón Lamas, José Varela aproveitou un balón dentro da área para perforar a meta de Cedrón. Lonxe de virse abaixo, os de Chusky mantiveron o tipo. O novo comandante Asier buscaba a súa a perna cambiada. O antigo comandante, Marino, recuperaba pouco a pouco sensacións na súa volta ao lateral. E ao Villalbés que o viu crecer. Non ían ser eles os protagonistas. Ese papel correspondeulle aos de case sempre. Ao capitán Xaime, cunha nova marabilla a pelota detida. Así como a Gerardo, que lle bastou algo menos de media hora para gozar coas súas travesuras. ‘Pillerías’ á gatada, rabona para o Youtube e un disparo cruzado á rede para firmar a remonta xusto antes do pitido final. Un deses xogadores polos que paga a pena mercar unha entrada. Dos que che cola a súa bachata neste maldito baile de máscaras.

Tensa presentación do plan competicional

Comezamos a redacción deste artigo preto das doce da noite, hora á que prácticamente rematou a reunión da Real Federación Galega de Fútbol cos clubs de Lugo. Moitos temas sobre a mesa, que trataremos de resumir o mellor posible. Entre eles, o plan competicional das diversas categorías, que explicaremos coas diapositivas empregadas pola propia RFGF. Antes de comentar os principais puntos, debemos sinalar que varios equipos abandonaron a reunión antes do seu remate, considerando que a día de hoxe é imposible xogar. Incluso ata que dispoñamos dunha vacuna. Estes son varios dos puntos a destacar:

-Quedamos todos pendientes da reunión de Sanidade coas diversas federacións hoxe ás 13:00 horas.

-Agárdase que cando haxa protocolo sexa tanto para sénior como para base. As competicións de base serán similares ás de afeccionados.

-Se se ten que suspender un partido por un positivo xogaríase cando non haxa positivos e se non se puidera xogar finalmente daríase por perdido aos dous equipos.

-As instalacións deportivas teñen que presentar un protocolo propio. Non se xogará un partido tras outro sen un tempo entre os mesmos para limpar e desinfectar. Ademais os afeccionados e equipos entrarán, de xeito recomendado, de forma escalonada ao campo.

-Non se sabe aínda que tipo de proba COVID-19 se vai facer e cando. Depende do protocolo futuro da Xunta. Estase buscando a cofinanciación das probas serolóxicas a través do CSD, a RFEF e o propio club.

-Os equipos manifestan o medo a contaxiarse. RFGF contesta que co protocolo non debera haber.

-Se un equipo renuncia a xogar, baixaría á última categoría.

-Todas as competicións con subgrupos, máis descensos e menos ascensos. Xogaranse diversas fases, sendo moi importantes todas e mesmo arrastrando resultados entre elas.

-Os nosos campos contarán cun 75% de aforo ata 1000 persoas, con cantinas abertas.

-Se non se completase o 50% da liga a disputar, darase por nula.

-Se se suspende a competición con máis do 50% disputado, a clasificación queda tal cal no momento da suspensión.

-En caso de empate entre equipos de distintos grupos, quedará por diante o que mellor se atope en deportividade.

-Se non dese tempo a xogar a dúas voltas a primeira fase explicada nas diapositivas, xogaríase a unha volta.

-Prorrógase prazo de renovación de licenzas. A mutualidade rebaixase polos remanentes da pasada temporada ao non xogarse toda. De 135 a 116 euros.

-Os equipos poderán ter dorsais fixos por motivos de hixiene.

O sábado volve o fútbol con público á provincia

Un derbi entre o Polvorín e o Rácing Villalbés

Facía tempo que non nos aledábamos tanto por dar unha noticia. Nin nos atopábamos tan emocionados ante un amigable. Pero despois de máis de seis meses sen fútbol na provincia, volve a rodar o balón sobre o verde. Cos afeccionados desfrutando del dende as bancadas.

O Viveiro regresa este curso á Terceira

Os primeiros en inaugurar a nova normalidade futbolística en terras luguesas serán o Rácing Villalbés e o Viveiro. Enfrontaranse en Cantarrana este próximo sábado a partires das 18.30 horas ante un máximo de 1000 seguidores, o tope permitido polo protocolo do Consello Superior de Deportes (CSD). Os futbolistas de ambos equipos superaron os Test COVID-19 onte satisfactoriamente. E soamente un positivo hoxe nos xogadores que restan por facelo no Viveiro ou unha negativa da Xunta de Galicia ao escrito enviado polos celestes; podería tirar por terra a nosa ilusión de ver fútbol en directo. Por certo, Futbolinlugo sorteará dúas entradas dobres entre os nosos seguidores de Twitter e Instagram (nas nosas contas, as condicións para participar).

Pola súa banda, o Polvorín barallaría disputar un partido de adestramento ante o Xuvenil A de División de Honra do club albivermello. Iso si, sen público. Segundo poidemos saber, tamén existiría a posibilidade de xogar un amigable nas vindeiras semanas ante o propio Rácing Villalbés. E os chairegos tamén terían en mente ao Compostela para estrear a Magdalena. Este encontro apuntaba a ser o primeiro da ‘nova normalidade’ con público pero os traballos de mantemento do céspede vilalbés impedírono.

Así anunciamos a noticia no segundo programa da temporada do Ser Deportivos Lugo, que contará unha campaña máis coa presenza de Futbolinlugo para analizar a xornada (luns) e anticipar o máis sinalado de cada data (venres).

Futbolinlugo Ser Deportivos Lugo 15/09/2020

O anecdotario: O medo no corpo, por Cuadrado

A verdade é que o mundo do fútbol é un lugar do que se poden sacar miles de anécdotas. Algunhas que se poden contar, outras non (jeje). Teño a sorte de presenciar grandes anécdotas en diferentes campos de fútbol pero quizais unha das que máis me marcou, debido á miña curta idade, foi na tempada 2009-2010 (infantil de 2º ano). Xogaba eu na S. G.Comercial.
Foi unha tempada moi satisfactoria. Viñamos de ascender coa Comercial de Liga Local a Galega. E na primeira volta da competición atopabámonos no máis alto da táboa. Ao comezo da segunda volta recibiamos no campo das Gándaras ao Deportivo (o segundo clasificado). Como de costume, todo ía normal. Ao finalizar a primeira metade iamos gañando 1-0 e ao entrar no vestiario todos empezamos a comentar o partido. Ao cabo dun minuto entrou ao vestiario o noso adestrador: o gran Xabarda. Mandounos calar a todos.

Ata aí todo normal pero o máis inesperado foi que ao calarnos todos, escoitábase ao adestrador do Deportivo gritar no vestiario (o cal estaba parede con parede co noso) aos seus xogadores coma se perdesen unha final da Champions. Xabarda, con toda a tranquilidade do mundo; mirounos, sorriu e díxonos: «Están cagados». Acto seguido foise do vestiario e non volveu aparecer ata que saímos ao campo para xogar a segunda parte. Acabamos perdendo 1-4 pero esa “charla de descanso” non a esquecerei na miña vida.
Fernando Cuadrado Lombardero. Dianteiro do Rácing Villalbés, da escola de Guidetti.

Paso adiante, o inicio das competicións máis preto

A Real Federación Galega de Fútbol (RFGF) camiña con paso firme cara o inicio do curso futbolístico máis incerto da historia. Hoxe vén de anunciar un aumento na reducción das cotas da mutualidade (do 10,5% inicial a un 15%). Onte comezou unha rolda de reunións cos diferentes clubs galegos. E que chegará a Lugo mañá, cos equipos da Preferente. E a vindeira semana, co resto de clubs do noso balompé afeccionado.

Dende Futbolinlugo quixemos indagar no contido desas reunións, para facervos o primeiro adianto. Así que volvemos falar coa nosa persoa de referencia, sempre disposta e receptiva con esta casa. O vicepresidente Carlos Negrín respondeu a todas as nosas preguntas.

PROTOCOLOS

«Toca esperar. Contamos co protocolo do Consello Superior de Deportes (CSD) o 14 de setembro para os clubs de Segunda División B e Terceira. Agora mesmo se queren adestrar con contacto, teñen que facer un test serolóxico cada quince días, algo moi complicado a nivel económico».

PLANS COMPETICIONAIS

«Serán presentados aos clubs nesta semana e na que vén. Queremos, temos a intención de empezar a competición neste 2020. Quizais novembro. Pero dependemos de moitas cousas. A pandemia, principalmente. Iso si, deixaremos 5-6 semanas para a posta a punto e os amigables».

FÚTBOL BASE

«Os colexios van ser os termómetros. Así o dixo a propia Xunta de Galicia. A partir de aí miraremos. O tema das instalacións é outro moi importante».

COPA DEPUTACIÓN 2019-2020

«Xogaríase antes de que comezase a propia competición. Somos a provincia máis afectada por este tema, queremos que os clubs teñan eses ingresos nestes tempos. Quedamos en valorar o formato. A idea é seguir a folla de ruta marcada pero se nos vemos apurados e non dispoñemos de datas poderían entrar en xogo o partido e sede única«.

O anecdotario: O apagón dun hat trick histórico, por Óscar Méndez

25 abril de 2015. Xa pasaron máis de cinco anos e aínda recordo aquel día. Semellaba unha semana normal, un domingo normal. Pero todos os astros se alinearon naquela tarde ante o Xallas de Santa Comba.

A acta do famoso partido ante o Xallas

Quizais debera darlle máis importancia ao que decidín compartir aquel día en Twitter. A famosa canción de Gol. Feito premonitorio do que estaba por vir. Pitido inicial no Sangoñedo. Un gol, dous goles, tres goles. Todos meus e demasiado tempraneiros. Despois do terceiro, pregunteille ao colexiado canto tempo ía de xogo. Pensaba que sobre uns dez minutos pero trascurriran exactamente tres minutos e corenta e cinco segundos. Toma xa!

Todas esas xogadas de centro-remate que traballabamos durante a semana e que nunca salían, ese día si. Quizais é aínda máis satisfactorio cando un é adestrador-xogador. O problema foi que precisamente esa faceta miña non mo fixo desfrutar como debera. Acabou o encontro e xa estaba pensando no seguinte cos tres puntos no peto. Manías e teimas dos adestradores. Quizais o tivese desfrutado máis se vise os goles horas despois do partido. Como adoitabamos facer, xa que sempre se gravaban os encontros da casa (para traballar sobre eles e darlles unha volta co corpo técnico). Pois a miña sorpresa chegou cando o filme caseiro empezaba no minuto 4. Sen os tres primeiros goles. Sería interesante preguntar á xente de por alí que pasou e a razón para non estar gravados, sigo sin entendelo…

A actuación estelar de Óscar Méndez ata saíu no Marca

Polo menos funme percatando da importancia do conseguido con toda a repercusión que tivo este hat trick. Con todas as entrevistas que me fixeron de medios, incluso nacionais. E incluso, debo admitir que estes días, revisando todo o que hai pola casa, para facer este textiño; me facía máis gracia. Tamén, e xa en frío, recoñezo que foi máis doado meter os tres goles que todas as temporadas que estiven de adestrador-xogador. Tarefa complicada…
Antes de despedirme, quero admitir que tentei ver se podía facerme co Récord Guinness ao hat trick máis rápido. Pero sen o dichoso vídeo… Enviei o tema pero pedían non sei que cousas. E pasei do tema. Eso si, o recordo está aí.
Óscar Méndez Sandiánez. Clásico do fútbol provincial. Ex-xogador e adestrador de sona no sur de Lugo

Diario dun mercado. Episodio 192

Marino regresa a Vilalba

Volven as novidades ao noso fútbol. E moitas delas na Terceira galega, onde o Viveiro e o Racing Villalbés comezaron onte os seus adestramentos. Os chairegos fixérono cunha nova cara máis. A dun vello coñecido. Marino regresa ao lugar onde se formou despois dun exitoso paso de dous anos por Viveiro. Un home desa vila mariñana cambia de destino. O talentoso Aldán Naval xogará no Somozas, según adiantou La Voz de Galicia, despois do seu paso pola canteira do Celta. Así mesmo, un antigo internacional español en categorías inferiores está a proba co Polvorín. Castrín pode volver vestir de branquivermello tras un final de temporada espectacular coa súa Pontenova. Ademais, Rayco cambia o filial do Lugo polo do Deportivo.

Xa no fútbol máis afeccionado o Antas anunciou as incorporacións de Martín e Anxo. Tamén a continuidade de Miguel, Félix e Óskar. Pola súa parte, o Castroverde repesca a Manu López; que xogou no Corgo a última campaña. E para rematar unha fichaxe tan importante como exótica. Unha camerunesa pola Reigosa. O PM Friol incorporou a Agnes Marie Claire Nkada, xogadora con facilidade para o gol. Como así o demostrou na UD Extremadura, equipo do que procede.

Charly: «Non volverei coller un equipo coa temporada xa comezada»

Celebración dun gol na Ribela. S9 FOTOGRAFÍA

Volver ao noso fútbol sempre é un reto importante. Facelo na túa propia casa e en tempos do COVID xa adquire unha dimensión maiúscula. Carlos Alberto Díaz Reboiro ‘Charly’ (Sarria, 1978) asume o mando da Sarriana despois de varias experiencias truncadas. Faino cunha ilusión que quizais, quen sabe, o leve a marcar unha época como xa ocurriu co seu Rácing Villalbés.

FUTBOLINLUGO: Boas Charly. De novo pola Ribela. Como foi ese regreso a casa?

CHARLY: Boas! A verdade e que xa me chamaran o ano pasado ao comezo e en decembro. Por motivos persoais e falta de tempo e motivación para adestrar nunha categoría esixente, dixen que non. Este ano vinme con esas ganas e motivación necesarias.

Fixemos un bo grupo e con fame

FIL: Que facía falta para motivarte?

CHA: Sobre todo, o feito de coller o equipo desde o principio. Nas últimas experiencias -Castro e Atlético Escairón- collín os equipos xa iniciada a temporada… Dixen que iso non o ía volver facer. En Escairón, sobre todo, quedoume mal sabor de boca. Era un proxecto xa empezado e vin un equipo non acorde ao perfil de xogadores e hábitos de traballo que quería. Quedei decepcionado desa experiencia. Non volverei coller un equipo coa temporada xa comezada.

Xa me chamaran o ano pasado ao comezo e en decembro

FIL: Agora en Sarria, dende o inicio e cun cadro de xogadores de garantías…

Charly na súa etapa en Castro

CHA: Tendo en conta que é un ano moi compricado tanto para planificar como para facer un equipo, fomos a un perfil de xogador con máis táboas e peso na categoría e un cadro deles máis curto. Sobre o papel a Liga será máis curta e de menos equipos. Fixemos un bo grupo e con fame. Faremos un vestiario forte.

Temos que estar entre eses catro ou cinco equipos que pelexen polo ascenso

FIL: O feito dos subgrupos e de xogar contra menos equipos, favorécevos ou non?

CHA: Non se sabe nada aínda do plan competicional. E non é o mesmo comezar en novembro que en xaneiro. Despois que equipos van a cada subgrupo e cantos se clasifican para xogar por un ascenso ou descenso… Todo o que poidamos falar agora é especular. É un ano moi raro.

FIL: Independentemente do plan competicional, cal é obxectivo da Sarriana para esta campaña?

CHA: Estar no grupo de cabeza dunha maneira ou doutra. Logo marcará a Liga o nivel dos equipos, os posibles ascensos que haxa. Temos que estar entre eses catro ou cinco equipos que pelexen polo ascenso. Dicir o contrario sería ir de falsos humides.

Borja Rego: «Como non adestres, todo se iguala»

É o director deportivo dun dos grandes damnificados pola pandemia. Ademais, comparte esta tarefa coa de xogador dun auténtico grupo de amigos. Hoxe falamos con Borja Rego Ferreira (Cervo, 23-03-1994), un home cunha tremenda facilidade para alternar os despachos e o verde.

FUTBOLINLUGO: Boas Borja! Imaxino que esta ‘pretemporada’ está sendo menos movida que nunca.

BORJA REGO: Pechamos ao míster Jaime e andamos mirando o mercado de reollo. A verdade é que está todo bastante parado con esta incertidume.

Viñamos con outro ritmo pero baixamos no inverno

FIL: Con todo o tempo que temos, imaxino que teriades tempo a analizar a pasada campaña polo miúdo. Que foi o mellor que vos pasou nela?

Un domingo clásico en San Ciprián. CANTI

B.R: O mellor foi como comezamos. Viñamos cun ritmo doutra categoría tralo descenso. O problema é que temos moita xente de fóra e os primeiros meses iso non o acusamos. Logo vas baixando no inverno. Os equipos que adestran con 15-20 xogadores acaban pasándoche por enriba nos finais de partido.

FIL: É preferible entón apostar por máis calidade e sacrificar un maior número de adestramentos? Ou viceversa?

B.R: Tes que saber o que hai. Nós sabíamos que para adestrar entre semana o tiñamos complicado. Pero eran xogadores de nome e doutra categoría. Pero a día de hoxe por moi bo que sexas, como non adestres todo se iguala.

Non entendo o porqué desa decisión. A Federación saberá os motivos.

FIL: Igualdade como a que tivestes co Pontenova a puntos. Subiron eles polo famoso ‘golaverage’… Foi como quedar co mel nos labios, non?

B.R: Co mel nos labios quedamos debido a que non rematamos a Liga. Había que acabala. Aínda non entendo o porqué desa decisión. A Federación saberá os motivos de dar así os ascensos. Non é só unha cousa nosa, pasou con máis clubs. Aceptamos a decisión e apostamos pola autocrítica.

FIL: E que vos di esa autocrítica?

B.R: Que fomos primeiros moito tempo e hai que aprender diso. Aprender a manexar mellor ese tipo de situacións.

O máis importante é crear un grupo para ascender a curto prazo

FIL: Por último, despois da análise, cal é o novo obxectivo para a próxima temporada?

B.R: Quedar o máis arriba posible. O ascenso está aí. Buscarémolo pero se non se ascende non pasa nada. O máis importante é crear un grupo para ascender a curto prazo.

Cócese un novo protocolo para poder xogar en Galicia

Hoxe Galicia superou a barreira dos mil casos activos do COVID-19. Pero o ser humano rara vez aprende. E todos seguimos pensando no que máis nos gusta, neste caso o fútbol. Resulta frívolo falar da pelotiña a estas alturas da película pero os máis e os menos queremos saber que vai pasar co noso fútbol.

Así que unha vez máis acudimos á porta de Carlos Negrín, o vicepresidente da Federación Galega de fútbol, para ver como evoluciona o noso deporte da man desta pandemia.

ÚLTIMOS PASOS

A Real Federación Galega de Fútbol reuniuse esta semana «con todos os clubs de categoría nacional: masculinos e femininos e de fútbol sala. As ligas que ían comezar a principios de setembro pospuxéronse, quizais ata finais de setembro», asegura Negrín.

Esta próxima semana probablemente nos reunamos cos clubs de Preferente

Así serán os dous grupos da Terceira a vindeira temporada

O PROBLEMA DO PROTOCOLO A NIVEL NACIONAL

«A RFEF estableceu dúas premisas principais: Se non saes do teu territorio, ríxese polo protocolo da Xunta. A Terceira División sería ese caso. Os que saen fóra da comunidade teñen que agardar á elaboración dun protocolo por parte do Consello Superior de Deportes (CSD) para todas as territoriais», dixo Negrín. Isto implica un maior peso da Federación Galega en competicións como a Terceira División e a Liga Nacional xuvenil.

Cara finais de agosto ou principios de setembro, se todo fora ben, haberá un novo protocolo para tentar facer adestramentos colectivos e partidos amigables

O PROBLEMA DO PROTOCOLO A NIVEL GALEGO

«A día de hoxe o protocolo actual da Xunta de Galicia non permite xogar nin adestramentos colectivos. Fixémolo consensuado con eles», asegurou o directivo.

O NOVO PROTOCOLO

Sobre todo será «realista e realizable», en palabras do vicepresidente. Incluirá medidas de desinfección ou tomas de temperatura, aspectos básicos. Realizar test PCR é inviable.

«Tivemos reunión con Lete Lasa -Secretario Xeral para o Deporte da Xunta-. Cara finais de agosto ou principios de setembro, se todo fora ben, haberá un novo protocolo para tentar facer adestramentos colectivos e partidos amigables. Todo irá en función da evolución da pandemia. Nós temos que traballar nuns escenarios, aínda que son totalmente incertos. Todo vai quedar definido no día a día«, resume Negrín.

DESIGUALDADE ENTRE COMUNIDADES

«Na Rioxa ou en Madrid pódese xogar ao fútbol, en Galicia non. Non está homoxeneizado todo o territorio español na pandemia. A RFEF comunicounos que avisará cun mes de antelación aos equipos para o inicio das competicións. Sempre e cando haxa protocolo, respaldado polos poderes públicos», afirmou Negrín.

Na Rioxa ou en Madrid pódese xogar ao fútbol, en Galicia non

PREFERENTE E REXIONAIS

«Vimos de reunirnos cos clubs de Terceira esta semana e facer os dous grupos. Esta próima semana probablemente nos reunamos cos de Preferente. Despois miraremos cara abaixo», sinalou.

FÚTBOL BASE

O fútbol base vaino marcar a volta ao colexio. Toca agardar. Quedan moitos pasos antes por diante.

 

José Durán: «Estaría máis tempo pero non son un funcionario»

Un lustro despois da súa chegada, José Durán despídese do club da súa cidade. O adestrador lugués quixo analizar con nós o seu paso polo conxunto albivermello. E tamén o que vislumbra como o seu futuro máis próximo.

FUTBOLINLUGO: Boas José! Parece que a aventura chegou ao final. Agardabas que o adeus fose así?

JOSÉ DURÁN: Pilloume por sorpresa. Ademais creo que foi en pleno confinamento. Martín Murado e Manolo Mandiá -integrantes da secretaría técnica- querían darlle continuidade a este proxecto, que estaban moi contentos. Tiñamos dado baixas e propostas de continuidade e peticións de altas, de feito. Tiña a total confianza. Antes dos cambios no club dixéranme iso. Agora toca respectar totalmente a decisión. Non teño nada que reprochar aninguén. Se é bo para o club, adiante.

«O adeus pilloume por sorpresa, querían darlle continuidade ao proxecto»

FIL: Cinco anos dan para moito. Quédaste con algún momento en especial?

J.D: Quédome con todo. Estou contento e orgulloso do traballo realizado. É algo que queda para o club. O primeiro ano estivemos toda unha volta ou máis de líderes co xuvenil de División de Honra. Creo que o club nunca o conseguira antes. Despois no primeiro equipo démoslle continuidade ao traballo de Luis Milla. Incluso demos un paso máis. Pelexamos cerca do play off moitas xornadas e salvamos a categoría 4 ou 5 xornadas antes do remate, algo moi meritorio.

FIL: Pero a etapa máis longa no club foi no filial. Cal é a túa valoración?

J.D: O primeiro ano consolidámonos na categoría con xogadores moi xóvenes e algunha fichaxe. Pelexamos case ata o final polo ascenso. No segundo ano, ganamos a Preferente. E despois os dous anos de Terceira. É para sentirse orgulloso, contento e feliz.

«No primeiro equipo, demos un paso máis ao traballo de Luis Milla»

FIL: Quizais non foi a mellor temporada para pechar o ciclo. Nin siquiera chegou a pecharse…

J.D: Seguro que teríamos rematado entre os 5-6 primeiros, por puntuación e sensacións. E pola competitividade do grupo. O equipo tería optado a estar aí. A frecha estaba cara arriba e quedaban moitos puntos en xogo. Ademais 6 ou 7 futbolistas axudaron ao Lugo a conseguir o obxectivo da permanencia. É mérito de toda a xente que traballamos no filial.

«Pasamos de ter un filial que apenas podía axudar a un no que varios xogadores tiveron varios minutos co Lugo»

Duran consolidou o Polvorín na Terceira logo de adestrar ao CD Lugo na Segunda na tramo final da temporada 16/17

FIL: Falabas dun determinado número de xogadores, algún deles pode valer realmente para o primeiro equipo?

J.D: Álex Rey, na progresión que está, debera chegar como mínimo a Segunda B. Pero está preparado para aportar no primeiro equipo. Na Segunda B xa estiveron este ano xogadores como Pedro López ou Cacharrón. Logo Matías ou Morais, que vai vivir este ano o da súa explosión individual. Ou Ángel Fraga. Futbolistas como Quindimil ou Chiqui aportaron moita axuda. Sería importante rematar pero tan importante foi o traballo realizado. Pasamos de ter un filial que apenas podía axudar ao primeiro equipo a un no que varios xogadores tiveron varios minutos co Lugo. Foron anos moi produtivos.

«Vou seguir adestrando pero as esixencias son bastante altas»

Jose Durán ascendeu á Terceira co Polvorín fai dúas temporadas. Foto: Endie DoaRúa

FIL: Tal e como explicas todo o conseguido, custa entender que se buscase un cambio no Polvorín…

J.D: Díxoseme que se buscaba un golpe de timón. Simplemente creo que o que decidiu ese cambio terá os seus motivos. Sei o difícil que é tomar ese tipo de decisións. Só desexo que, como mínimo, dean continuidade ao que se fixo no filial e o club siga crecendo. Producindo futbolistas para o primeiro equipo ou xogar un play off a Segunda División B. Penso que estabamos moi cerca, sería este ano ou o seguinte. Cinco anos desgastan moito e o momento ía chegar. Eu estaría máis tempo pero non son un funcionario do fútbol. Non vou reprochar nada, só dar as grazas. Non é un adeus. Ou un un ata logo ou unha paréntese, como xa foi no seu día.

«Estabamos moi cerca de xogar un play off de ascenso, quizais este ano ou o seguinte, pero buscaban un golpe de timón»

FIL: Vai seguir adestrando José Durán ou pídelle o corpo un descanso?

J.D: Tocará irme lonxe. Vou seguir adestrando, non sei onde nin a que nivel. Veremos posibilidades. As esixencias son bastante altas. Sei o difícil que é atopar equipo nestes días. Veño dun club profesional cunhas condicións moi boas. Estou aberto a escoitar e ver proxectos. Xa sexa en Lugo, en Galicia ou fóra dela.

A II Guía Futbolinlugo, en dixital (1)

Xa sabemos que isto do COVID-19 vai para largo. E tamén que nós somos moi pesados. E queremos seguir difundindo o noso fútbol diariamente a pesares de que xa levamos máis de 150 días acumulados dende a disputa do último partido. Nun importante esforzo, mantemos a nosa premisa de levar ás vosas casas un contido diario. E hoxe toca estrear unha nova sección. Esa na que iremos subindo, en formato dixital, os distintos equipos que formaron parte da II Guía Futbolinlugo.

Nestas datas estaríamos en plena confección da terceira edición. Percorrendo fotos, recabando datos e queimándovos a fotos. Pero toca isto. O importante: o noso fútbol vai seguir vivo!

Sen máis dilación, hoxe deixámosvos con catro equipos de Primeira. E que continuarán nesta categoría unha campaña máis: Outeiro de Rei, Xove Lago, Chantada Atlético e Riotorto.

Diario dun mercado. Episodio 183

Hoxe traemos un Diario dun Mercado moi específico e centralizado. Xa que os porteiros e a zona da Mariña copan o protagonismo desta edición. Comezamos cunha especie de cambio de cromos. O Burela reforzou a súa portería con Kiko Mariño, un clásico. O antigo gardamallas do Viveiro sumará unha nova experiencia ao seu amplo currículo na Marosa. Esa chegada permite a marcha de Tomy cara Cantarrana. O cadro de Chusky andaba á procura dun meta. E no lucense atopa xusto o que precisaba: garantías.

Sen movernos moitos quilómetros, en Alfoz renovaron a un antigo integrante do Burela: Ramiro. A portería do Municipal queda en boas mans. Un Municipal que queda un tanto orfo despois das retiradas de Martín, Legaspi, Pablo Souto e Juanra. Pola súa parte, o Mondoñedo conta cunha cara nova. Non é outra que a de David Rivas, procedente do Cospeito. E xa fóra dos marcos da fermosa Mariña coñecemos unha baixa importante no Palas: Anxo.

Diario dun mercado. Episodio 182

Os nosos clubs xa camiñan na nova normalidade. De feito, varios deles xa deron comezo ás súas pretemporadas. Iso si, a gran maioría con adestramentos individuais e con todas as garantías sanitarias posibles. Por exemplo, o Pol ou o Incio. Os do Carboeiro estréanse no día de hoxe, de feito.

Mentres, a gran maioría de equipos seguen a traballar na confección dos seus bloques. O Polvorín continúa a súa busca de adestrador, despois da negativa de Álex Antón nas últimas horas. Por certo, un vello coñecido desa casa, non se manterá no seu destino. Javi Rey deixa o Arenteiro despois dunha notable campaña. Veremos cal será a súa nova casa.

Na Primeira, a cousa vai de porteiros. O Burela renovou a Simón e o Monterroso fixo o propio con Rubén. Dos da Ulloa tamén coñecemos o nome do seu segundo adestrador: Omar, home da casa. Baixamos de categoría para anunciar o regreso de Miguel a Meira despois do seu paso por Pastoriza. Por último, na Terceira, Hasier continuará no filial do Monterroso. E no Castroverde seguen  lateral Dani e o dianteiro David.

Nico: «Non necesitamos moito máis se seguimos todos»

Foi un dos dominadores do fútbol provincial. Líder sólido de principio a fin, o Fonsagrada chega á Segunda Galicia pola parte grande. E farao co bloque que conseguiu ese ansiado ascenso, liderado polo seu adestrador Nico Longhini. Co que falamos hoxe para analizar o que foi a súa primeira temporada no club vermello e o que aínda queda por vir.
FUTBOLINLUGO: Boas Nico! Dende fóra a temporada semella incrible. Como a cualificarías dende dentro?
NICO: Foi excelente, coa ‘espiniña’ de non ter rematado a Liga e ascender no campo. Fixemos un moi bo bloque, fomos de menos a máis para firmar un temporadón.
FIL: Os números meten medo: 12 vitorias, 3 empates e 1 derrota…
NIC: A derrota foi no último partido. Ía estar apretado o final de liga pero estou convencido de que non íamos pegar un baixón e seguir na mesma dinámica.
FIL: O final da competición semellaba apaixoante, con moitos duelos directos nas derradeiras catro xornadas…
NIC: A semana na que todo se parou xogábamos contra o segundo, o Matela. Xa lles ganaramos nun campo difícil para todos. Íamos sen medo pero sabendo que todos os rivais eran difíciles. Fomos sacando así o resto de partidos. Deixamos algún punto na casa en partidos que dominamos enteiros. Tiñamos ocasións pero non entraban.
FIL: Resulta curioso que hai un equipo ao que non fostes quen de gañarlle: o Lugo Unión, penúltimo clasificado.

Nico comandará a aventura do Fonsagrada na Segunda Galicia.

NIC: En casa, sen xogar mal, non poidemos gañarlles. O campo estaba encharcado e non chegábamos ben. Non fomos capaces de marcar aínda que nos xeraron pouco e defendíamos ben. No seu campo, saímos mal. Non tivemos a personalidade para pegar o golpe na mesa ese día, para deixalo pechado. Penso que nos superaron ata en intensidade. Igual foron os nervos de verse aí, non sei. Era un campo complicado e non merecemos gañar. Tampouco sei se merecimos perder.

FIL: E agora, como se presenta ese futuro ilusionante na Segunda?
NIC: Imos continuar todos ou case todos. Estamos pendentes dun máximo de dous xogadores que poidan vir. Non necesitamos máis se continuamos todos. Marcarémonos o obxectivo de desfrutar. Desfrutar do fútbol, que se bota moito de menos. Buscaremos salvarnos, asentarnos na categoría e despois ver que pasa. O obxectivo en si marcarao o compromiso do equipo e que se vaian dando resultados.

Negrín: «A día de hoxe non se pode xogar ao fútbol»

Unha vez rematada a temporada 19-20 en Galicia, toca pensar xa na seguinte. A incertidume segue máis que presente. De feito é a que domina a situación. Poucas respostas se poden buscar nun contexto tan complicado. E se as hai, toca golpear a porta onde todo comeza. Así que alá nos fomos. A atopar respostas á Real Federación Galega de Fútbol (RFGF). Onde o seu vicepresidente, Carlos Méndez ‘Negrín’, nos atendeu unha vez máis amablemente.

Carlos Negrín. LAVOZDEGALICIA

FUTBOLINLUGO: Boas de novo Carlos! Unha vez finalizado ese play off de ascenso, cales serán os seguintes pasos da RFGF?

NEGRÍN: A Federación está en ERTE pero os que están operativos, xunto cos directivos, non paramos de traballar. Os plans competicionais vanse presentar en breve pero condicionados ao día a día e ao nivel sanitario en Galicia e España.

É o ano máis difícil da historia para organizar unha competición

FIL: Pódesnos facer un adianto deses novos plans competitivos?

NEG: Trataremos de facer grupos máis pequenos e ligas curtas. Así, se hai parón teremos capacidade de manobra. É o ano máis difícil da historia do fútbol para organizar unha competición.

Os plans competicionais vanse presentar en breve así como o portal do federado

FIL: Lévase un tempo falando de subgrupos nas diferentes categorías. E dunha posible desaparición da Terceira Galicia. Será así?

NEG: Vai haber Terceira Rexional. Desde Terceira División a Terceira Autonómica, contaremos con subgrupos. En Lugo, a día de hoxe, hai dezaseis equipos en Terceira. Non temos constancia de altas e baixas novas.

FIL: Imaxinamos que o protocolo para o desenvolvemento da actividade futbolística estará xa listo, non si?

NEG: O protocolo témolo prácticamente finiquitado. Faltamos varias das federacións máis importantes, ao ser deportes de contacto. Estamos pendentes da Xunta, estábamos esperando por se había cambio na situación actual do COVID e a que finalizara a fase de ascenso a Segunda B. A semana pasada reuníronse todas as federacións deportivas coa Xunta e moitas temen pola súa continuidade e viabilidade.

Vai haber Terceira Rexional e subgrupos de Terceira División a Terceira Rexional

FIL: Pódesnos facer un breve esbozo dese futuro protocolo da RFGF?

NEG: Agora mesmo non se pode adestrar máis que facelo sen contacto. A semana quee vén case seguro que o colgaremos na rede. Estámolo consensuando coa Xunta. A día de hoxe, segundo o protocolo da Xunta, non se pode xogar ao fútbol. Cando vimos de ver o que pasa ademáis no fútbol profesional… Vimos o do Fuenlabrada, o do Portugalete no País Vasco… E iso tendo a proba PCR feita do día anterior.

FIL: Desde que se teña ese protocolo aprobado xa sería todo máis ‘sinxelo’ para retomar as diferentes ligas?

NEG: É moi complexo. Hai que contar con todos os protocolos dos Concellos para as súas instalación e vecinos. Cada Concello pode establecer os seus e habería que cadralos cos da RFGF e a Xunta.

Moitas federacións deportivas temen pola súa viabilidade e continuidade

FIL: Deixando a un lado o plano deportivo propiamente dito; contaremos con algunha novidade máis que a da presenza da COVID-19?

Negrín nun acto co Sagrado Corazón. FUTGAL

NEG: Imos presentar o portal do federado moi pronto. Asi como os plans competicionais de cada delegación, como xa falamos. O portal do federado é algo moderno para facilitar a xestión dos clubs, acorde aos tempos que corren. Unha aposta de presente e futuro para os tempos que corren. Levamos anos traballando nel. Supón un esforzo a nivel bestial e tocaría cargalo de contidos, como as propias licenzas.

Hai que cadrar os protocolos dos Concellos cos da RFGF e a Xunta

FIL: Última pregunta. Cal sería o mellor escenario posible e cal o peor para a vindeira campaña?

NEG: O mellor dos escenarios sería poder empezar en outubro e a pretemporada en setembro, coa disputa dalgúns partidos amigables. Ese sería o mellor, con moita diferencia. O peor, non podo falar de cal sería. Sobre todo, con temas sanitarios. Prefiro non poñerme no peor dos escenarios, non quero ser alarmista.