Tras o paso polos vestiarios, as albivermellas saíron mellor ao campo, co partido máis controlado defensivamente, cun xogo de maior calidade e sen pasar tantos apuros como no primeiro tempo. As luguesas desfrutaron dalgunha ocasión illada mais unha hipotética remontada quedaba moi lonxe das súas posibilidades.

O partido comezou moi igualado, cunha primeira parte na que ningún dos dous equipos tivo ocasións claras para anotar.

Xa na segunda metade, as albivermellas non baixaron o ritmo e, nada máis comezar, unha ocasión clara por parte de Ánxela que acaba bloqueando a porteira do Breixo Lema avisaba do perigo das luguesas.

Pouco a pouco o partido foi tornándose de dominio totalmente lugués, sen ocasións para as visitantes (Breixo Lema) que apenas conseguía cruzar o mediocampo. Co Lugo mandando sobre o partido, María anotaría o primeiro gol e, aínda que Luchy e Xiana tiveron dúas opcións clarísimas de aumentar a vantaxe, o luminoso non se moveu.

A adestradora albivermella, Iria, amosouse moi satisfeita «do bo traballo das xogadoras que, unha vez máis, amosaron garra», indicaba ao remate do partido.

Cando xa semellaba que o partido remataría en táboas, no engadido, o Dumbría anotaría o segundo gol para privar do empate ao PM Friol B. Unhas táboas que terían sido un bo resultado para o cadro friolés tendo en conta que acudían ao encontro pragadas de baixas e ante un equipo que ocupa postos máis altos na táboa.

Sen Ana, a capitana e unha das referentes do equipo, o PM Friol sabía que era un encontro complicado. Aínda así as friolesas foron quen de mirar de ti a ti ao Dumbría e incluso de adiantarse no marcador por medio de Lidia. O partido semellaba bastante controlado polas amarelas durante a primeira parte, que evitaron ocasións das locais agás accións a balón parado. Porén, Carla tivo nas súas botas a ocasión para aumentar a diferenza a dous goles, mais fallou o disparo prácticamente a porta baleira que tería suposto unha diferenza de goles que, probablemente, tería mudado o partido.

Na segunda parte o perigo das xogadoras do Dumbría foi maior. Os primeiros minutos tras o paso polo vestiario, adiantando liñas, as locais facían dano. Unha vez parou o «chaparrón» durante os primeiros intres da segunda metade, o PM Friol B volveu a ter oportunidades e a sentirse máis cómodas sobre o terreo de xogo. Porén, a falta de contundencia na defensa preto da área e de bos despexes condenaron a un Friol que, ademais, quedou os últimos 15 minutos sen Carla, que foi expulsada. Todo se complicou para que finalmente o Dumbría puxera o definitivo 2-1 xa no tempo do desconto, privando así ao PM Friol B dun merecido, canto menos, empate.

Gran partido o vivido entre o CD Valladares e a SD Antas, dous conxuntos aspirantes aos postos altos da clasificación que finalmente puideron gañar as seoanesas grazas a unha grande eficacia.

O partido comezaba con 20 minutos de bo xogo de ambos equipos, sen ocasións pero con moita intensidade. Na saída dun córner, Lucía Núñez fíxose co balón dentro da área e o seu remate, desviado por unha defensora, deixa á porteira rival sen posibilidade de reacción para evitar que o balón chegue ata o fondo da rede.

Co gol visitante as locais reaccionaron na busca de igualar o partido mais un Antas moi sólido en defensa evitou todos os ataques e remates á vez que buscaba perigo á contra grazas á velocidade de Dana e Jenny.

Nuria tería preto o 0-2 á saída dun saque dende o curruncho, pero o seu golpeo de cabeza marchou alto.

Xa na segunda metade, Ángela lucíase cunha boa parada para evitar o empate e, de novo o Antas golpearía grazas a un córner moi pechado de Jenny que acaba tocando tamén na defensora na línea de gol para poñer, agora si, o 0-2.

O Valladares reaccionou ben e nada máis sacar o balón dende o mediocampo anotou tras un rexeite dentro da área seoanesa. De novo co partido máis apretado, Dana seguía loitando con intensidade por cada balón e chega a un balón en liña de fondo, dando un pase atrás que empurra Jenny para pór o 1-3 definitivo.

A partires dese intre a SD Antas botouse a defender para afianzar os tres puntos que, finalmente, trouxeron para a capital seoanesa.

Bo partido para a volta de Lucía Núñez (goleadora) á que xa fóra a súa casa logo do seu paso polo CD Illescas (Toledo). Un reforzo que sen dúbida será moi útil para a SD Antas neste último tramo da tempada no que tamén incorporou (á volta de Nadal) a Marta, que militara nas filas do Bergantiños e Lugo.

As xogadoras de Vicky saíron coas liñas moi descolocadas ao campo e, a pesares de que houbo xogadas de calidade como a que lles deu o seu único gol (de Daniela, ao pouco de comezar o encontro), non foi un bo partido.

Na segunda parte ademais fíxose notar o cansancio e, a pesares de que as luguesas tiveron algunha ocasión para anotar, o balón non quixo entrar. Quen si anotou foi o equipo local, o Arzúa, que con dous goles (no 63′ e no 68′) remontarían o tanto inicial do Comercial para quedarse cos tres puntos.

Pese a que o Monte Forte se adiantou cun gol tempraneiro (Arias, 10′) no marcador e o Monte Forte comezou dominando o partido durante os primeiros minutos grazas a unha defensa moi adiantada, o San Lázaro soubo comprender o partido para empatar grazas a unha xogada entre liñas que anotou Irene xusto antes de marchar ao descanso.

Á volta do vestiario o San Lázaro foi medrando cun Monte Forte a remolque pese a ter algunha ocasión. No 70′, Douaa adiantaría ao San Lázaro no marcador (2-1). Anita faría o tercerio tan só 6 minutos despois (3-1) e o último, de Ana, sentenciou o encontro (4-1).

O encontro estivo condicionado, dende o inicio, ponas numerosas baixas que o Carballedo presentaba nas súas filas. Aínda que tentou adaptarse coa xente dispoñible e dando todo de si, comezando moi ben a primeira parte, con moita intensidade e incluso algunhas ocasións, pero foi o Nicrariense o que, nunha contra, anotaría o 1-0.

Dende ese primeiro gol, o Carballedo veuse abaixo e o Nicrariense non tardaría en aumentar a diferenza a dous tantos de renda. Pouco antes do descanso, un penalti cometido polo Carballedo fai que o Nicrariense marche aos vestiarios cunha vantaxe xa de tres goles no luminoso: 3-0.

Á volta dos vestiarios Sementa facía o único cambio dispoñible para meter algo de aire fresco pero o cansancio do resto de xogadoras pásalle factura ao Carballedo, que tivo que xogar a defender para non sufrir demasiado na segunda parte. O Nicrariense atopouse cunha liña sólida das guerreiras que apenas conseguiron romper agás noutro penalti que remataría por pór o 4-0 definitivo.

O pasado mércores, Milagrosa e San Lázaro mediron as súas forzas na ronda previa da Copa Deputación, partido que clasificou ó San Lázaro tras impoñerse 1-2. Os seguintes encontros desta competición desputaranse a fin de semana do 18 de maio.