Os vellos rockeiros manteñen viva a 2ª Rexional

Manel (48) e Marcos (51) volvéronse enfrontar a pasada xornada

A foto de portada é unha das máis representativas da Segunda e tamén do fútbol afeccionado lucense. Marcos e Manel son emblemas dos seus clubs e do balompé da provincia. A imaxe de dous capitáns que prolongan a súa carreira amosando uns valores e un compromiso do que aprender. Pero, pola contra, tamén é a imaxe da falta dun relevo que garanta o seu legado. Agardemos estar aínda a tempo.

Luca´s Grill
Moreno´s Pizza

Evidentemente Manel e Marcos foron protagonistas da xornada, como sempre o son cando se enfrontan o Goiriz e o Iberia. Pero houbo moitos máis con dous hat-tricks e a intensa pelexa polo ascenso. Contámolo nunha nova entrega dos #OncesFutbolinlugo.

Na quinta xornada da fase de ascenso do grupo norte, o Sanci continúa no máis alto da clasificación. Venceu pola mínima no Suso Cruz ante un Guitiriz que non colleitou bos resultados neste segundo tramo da liga. Pola súa banda, o cadro adestrado por Jaime Méndez conta con dous puntos de vantaxe sobre o Cospeito, o seu próximo rival.

Deportes Élide

O club cospeités volveu ao camiño da vitoria e chega a recta final como un dos claros candidatos a loitar pola praza de ascenso. O dianteiro Jose marcou os dous goles que lle deron os tres puntos aos seus ante o Celta Barreiros.

O Meira é terceiro a tres puntos do líder. Derrotou a un Cabreiros que se afasta das súas opcións de pelexar polo primeiro posto. Cuarta é a Candelaria (a catro do 1º) a pesar da súa derrota ante o Muimenta. Non obstante, o peor para os de Jaime Matouse non foi perder os tres puntos senón a lesión do capitán. O central Simón operouse xa o pasado martes do tendón de Aquiles. Dende aquí desexámoslle a mellor recuperación posible.

Na quinta xornada da fase pola permanencia na zona norte, o Xermade e o Iberia seguen intratables neste tramo da competición. O conxunto xermadino derrotou ao Matela en San Lorenzo de Aguiar. E iso que tivo que innovar na portería. Ante a ausencia tanto de Ángel Prieto como de Juanxo, púxose baixo paus Borja Pellón, alcumado ‘Pitizarreta’ agora na súa faceta de gardameta.

O Iberia sacou os tres puntos do Ventiño ante o Goiriz con goles de Joni e Diego. A terceira praza é ocupada polo Fonsagrada que empatou sen goles ante o Roupar.

Pola súa banda, o derbi do Fiouco permitiu que o Abadín dese un paso adiante na súa loita por evitar o descenso directo. Derrotou ao Mondoñedo nun encontro no que Seco volveu ser protagonista cun dobrete. O cadro mindoniense queda agora a seis puntos da salvación (distancia co Abadín e co Roupar).

Na cuarta xornada da fase de ascenso da zona sur, este xoves xogouse aínda o encontro do líder. O SD Becerreá – SD Chantada B fora aprazado por mor da covid. Rematou en empate a un gol, non sendo un dos mellores partidos do intratable cadro da Montaña. O Becerreá mantense no primeiro posto con dous puntos de marxe sobre o Antas.

O cadro da Ulloa segue co pleno de vitorias neste tramo da competición. Derrotou pola mínima no Luis Pallín a un Oural que non conseguiu puntuar na 2ª fase.

A Milagrosa tampouco renuncia a praza de ascenso logo de lograr un importante triunfo ante o Ferreira no Baliño. Está a tres puntos do primeiro posto ao igual que o Paradela que derrotou tamén a domicilio ao Río Sil onde salientou a actuación de Juan Manuel. O dianteiro de Vila de Cruces marcou tres goles.

Na fase pola permanencia no grupo de cinco equipos da zona sur, non hai parón pola Semana Santa. O Páramo xa lle gañou ao Santa Comba pola mínima. O cadro adestrado por Santi completa así unha gran semana logo do seu triunfo tamén ante o Quiroga.

O cadro quirogués descansa esta xornada pero seguirá a dous puntos da salvación directa. O próximo partido co Santa Comba vai ser crucial para os dous conxuntos.

O grupo está liderado polo Sporting Lucense que xogará este domingo ante o Brollón precisamente poñendo en xogo a primeira praza. Ambos conxuntos teñen unha diferenza considerable para non meterse en apuros.

Na fase pola permanencia no grupo de catro equipos da zona sur, o Corgo venceu ao Palas para seguir como primeiro clasificado e manter oito puntos de diferenza coa praza de descenso directo.

A posición de descenso segue ocupada polo Bóveda pero o cadro adestrado por Pasín logrou un triunfo importantísimo ante o Incio. Ademais venceu con contundencia e con tres goles marcados por Álex Casares. O tres puntos permítenlle reducir a dous a diferenza co seu rival e seguir moi vivo na pelexa pola salvación.

Imagen por defecto
Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Artículos: 549

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.