Os onces da 11ª xornada na Segunda

A undécima xornada da Segunda Rexional trouxo un sempre especial derbi da horta con emoción e vitoria pola mínima do Lourenzá. O Folgueiro continúa na cabeza da táboa, seguido por un Guitiriz que volveu gañar e un Roupar que na actualidade é o equipo máis en forma da categoría se temos en conta as últimas cinco xornadas. Na zona sur, o San Roque mantense como líder recuperando o segundo posto o Palas ao vencer no derbi da Ulloa ao Monterroso B. Ademais, estrea de nova parella aos mandos do Portomarín e vitoria da SD Becerreá case dous meses despois.

No grupo norte, un encontro destacou por riba de todos. O Lourenzá 1-0 Mondoñedo non tivo excesivo bo fútbol, pero si un gran ambiente con preto de 800 persoas desfrutando da emoción no Santa Cruz. O cadro mindoniense quedou con dez pola expulsión de Iván Croa e fallou un penalti antes de que o xuvenil Manu Santamarina marcase o gol que lle deu o triunfo o Lourenzá. O equipo laurentino suma sete partidos sen perder e consolídase na parte alta da táboa. Pero non foi o único derbi do grupo, tamén houbo duelo veciño na Cea con vitoria final do Cabreiros diante dun Xermade que leva dúas derrotas consecutivas. O encontro non foi moi vistoso pero impúxose o acerto dos pupilos adestrados por Abel Rochela.

O Folgueiro continúa como líder despois de vencer na súa casa ao Meira. A dous puntos, tamén en zona de ascenso directo, sitúase o Guitiriz que volveu ao camiño do triunfo na Fonte ante o Cospeito despois de tres xornadas sen gañar. Empatado a puntos, está o Roupar que suma cinco triunfos seguidos ao derrotar a Candelaria. Na zona morna da clasificación continúa o Goiriz que volveu sumar un novo punto ante o Abadín no Ventiño, campo onde ningún equipo visitante gañou no que vai de curso. Na zona baixa destacan os triunfos da Comercial e do Cervo. O equipo capitalino derrotou pola mínima ao Iberia nun encontro directo por evitar a zona de descenso. Pola súa banda, o Cervo logrou o primeiro triunfo da temporada ante o Valadouro nun choque no que puido gañar calquera e finalmente chegou a primeira vitoria tamén de Jesús Martín como adestrador no seu cuarto partido.

No grupo sur, o San Roque deu un pequeno golpe na mesa cunha vitoria de peso ante un dos rivais importantes como está sendo o Ferreira. O conxunto de Montirón amplía a diferenza co segundo a catro puntos e presenta a súa candidatura ao ascenso. Dende o club confirman que xa non teñen ningún tipo de relación de filial coa Residencia, polo que se o logran na clasificación non terían ningún impedimento para ascender á Primeira Rexional. Non obstante, aínda queda moita temporada por diante. Por exemplo, o Palas volve estar en postos de ascenso directo logo de derrotar pola mínima ao filial do Monterroso no Anexo de Cerdeiriños. O cadro da Ulloa está con 20 puntos, ao igual ca o Guntín, que sacou un meritorio empate nos Medos ante o Brollón logo de comezar perdendo 2-0, e tamén ca o Bóveda, que segue á alza e derrotou a un Corgo no que Vivian Dors se estreou no banco.

O Oural tamén está medrando moito na clasificación ao conseguir a súa terceira vitoria en catro partidos; desta volta xogando co San Lázaro como rival. Xeira contraria lévaa o Portomarín aínda que sumou un empate nos últimos intres do partido ante o Santa Comba no que supuxo a estrea no banco de Fernandito e Óscar Pampín como adestradores logo da saída a semana pasada de Sousa. Na zona baixa, o Sporting Lucense e a SD Becerreá protagonizaron dúas importantes vitorias para os seus intereses. O cadro adestrado por Lolo comeza a espabilar xa que suma 10 dos últimos 15 puntos en xogo con vitoria a pasada fin de semana ante o Incio. Cos mesmos puntos (11) pero en zona de descenso está o Becerreá que se reencontrou coa vitoria dende o 23 de setembro cando vencera ao Oural. Gañou diante dun Chantada B que tivo un partido accidentado xa que a ambulancia tivo que levar a Efrén por un choque de cabeza cun rival (acción na que o futbolista foi expulsado). O susto foi grande porque quedou mareado, pero está fóra de perigo.

Imagen por defecto
Iván Calaza
Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.
Artículos: 467

Deja un comentario