Viveiro vs Vilalbés 2020/2021

Os derbis da Terceira xogaranse en decembro e en abril

Os equipos lucenses da Terceira RFEF xa teñen a súa axenda para esta temporada. Este xoves sorteouse o calendario da competición na sede da Real Federación Galega de Fútbol en Compostela. Unha das principais novidades do curso que vén por diante é que a categoría está composta por dezasete equipos. O formato de xogo volve ao tradicional dun único grupo. Un conxunto descansará cada xornada.

A liga comeza a segunda fin de semana de setembro. Agás para o Polvorín. O filial albivermello será o primeiro equipo en descansar. Non haberá fútbol na provincia eses días porque o Racing Villalbés desprazarase na primeira xornada a Abegondo para xogar contra o Fabril. Pola súa banda, o Viveiro comezará no sur. Visitará ao Choco en Santa Mariña.

Fútbol en simultáneo na provincia:

Cristian é un dos xogadores que continúa no filial do CD Lugo. Foto: Endie Doa Rúa

Será unha campaña na que tocará facer quendas para ver aos cadros lucenses. Os tres van coincidir en xornada como locais. Semana a semana veremos se tamén coinciden en horario. A segunda xornada será a da plena estrea en territorio lugués. O Polvorín debutará ante o Choco. Ademais o Racing estrearase na Magdalena ante o Sofán adestrador por Alberto Rodríguez. O preparador formou parte do corpo técnico racinguista en parte da etapa de Óscar Gilsanz como adestrador. Pola seu lado, o Viveiro xogará en Cantarrana ante o Ourense CF.

Os derbis chegarán concentrados en tres semanas. Na primeira volta xóganse en decembro e na segunda en abril. O primeiro enfrontará ao Viveiro co Racing en Cantarrana na primeira finde de decembro. E tres días despois chegará o Racing – Polvorín. A competición aproveita a Ponte da Constitución para poder acabar a primeira volta antes do Nadal. É habitual que nesa Ponte se xoguen partidos de Terceira. A última xornada da primeira volta (19 de decembro) traerá o duelo entre o Viveiro e o Polvorín.

Os lucenses moi pendentes dos rivais dos compañeiros:

O Polvorín xogará contra os rivais que xoguen previamente co Viveiro

Os conxuntos da provincia estarán moi pendentes entre si dos seus respectivos partidos xa que se enfrontarán practicamente a rivais consecutivos. O Polvorín fixarase moito nos duelos do Viveiro. Xa que xoga seguidamente cos rivais do cadro viveirense da xornada anterior. A súa vez, o Viveiro vixiará os encontros do Racing. Xoga contra os equipos que dúas findes antes se mediron cos pupilos preparados por Simón Lamas.

Nin Xira, nin Naseiro, nin fútbol de estrea en agosto:

A situación de pandemia deixa por segunda temporada a Vilalba e a Viveiro sen fútbol de competición oficial. Era tradicional que o Racing comezase a competición da 3ª o sábado da Xira, onde o fútbol era unha excusa máis da finde de troula polos arredores da Magdalena. Quen tamén podía aproveitar os festexos era o Viveiro. O seu regreso á Terceira podería cadrar coa finde do Naseiro, pero polo momento esa circunstancia tampouco se deu.

Os dezasete equipos que compiten este ano na Terceira RFEF xogarán trinta e dous partidos. O primeiro clasificado ascende directamente á Segunda RFEF. Do segundo ao quinto desputan un play off interno. O gañador xogará unha final polo ascenso ante outro equipo doutro grupo. Por abaixo, descenden seguro os tres últimos equipos. O cuarto pola cola descendería, se no play off non ascende o equipo galego.

Imagen por defecto
Iván Calaza
Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.
Artículos: 467

Deja un comentario