Once da Xornada 34 na Primeira Galicia

Rematou unha das mellores Primeira Galicia da última década. Con todo resolto polas alturas, a atención centrábase esta xornada na zona baixa. Especialmente, en fuxir dos famosos ‘descensos por arrastres’. Había tres equipos implicados nesta loita. Dous gañaron e un, non. O Chantada Atlético non pasou do empate no campo do Riotorto a pesares da boa actuación de Dani Delgado na medular. Agora, casualidades da vida, os do Sangoñedo quedan en mans dos seus veciños da SD Chantada. E a cousa pinta mal, porque o cadro de Pepe Martín ten case os dous pés no descenso.

O Burela fixo os deberes no derbi mariñán. O San Ciprián, que xa tiña unha sufrida salvación no peto, cedeu ante a intensidade e o ímpetu dos de Abel Eijo. Os da Marosa xogábanse a vida e Jairo tirou de galóns para soñar cunha permanencia pola que moi poucos apostaban hai tres meses. O Burela depende agora do Lemos. Se os de Monforte aguantan na Preferente, os mariñáns seguirán un ano máis na Primeira Galicia. O que seguirá fixo nesta categoría é o Xove Lago. O equipo de Kiko Rey venceu pola mínima ao Chantada B e pechou o obxectivo. O lateral Aitorín sobresaiu xunto con Juanjo Coello, autor dun gol.

Falando de goles, imos co gol da xornada. Ese viuse no Martínez Otero. Alí, o Foz tumbou ao campión. Desfíxose da Residencia cun auténtico golazo de Álvaro. O central marcou o 2-1 dende máis alá do centro do campo. Se alguén o ten en vídeo, que nolo faga saber! Unha victoria que lle valeu aos de Jesús Gayol para rematar terceiros. O Monterroso deixouse a victoria no desconto na Frigsa. O cadro de Adrián Vázquez marcou moi pronto e relaxouse ante unha Milagrosa que foi a máis. Ao ritmo do capitán Diego Redondo. Na segunda metade, David realizou varias boas paradas para gardar a vantaxe dos da Ulloa. Non puido ser. Álex marcou no desconto e deu unha pequena alegría á parroquia do Gorgoso, que o ano que vén apoiará aos seus na Segunda Galicia.

Por outra banda, o Outeiro de Rei pechou esta histórica campaña cunha goleada ante o Valadouro. Nunha tarde de despedidas, Míchel deixou dous goles. Logo xa veu a homenaxe dos seus despois de catorce anos de servizo ao clube azulón. Ademais, o Santaballés impúxose a domicilio ao Taboada. ‘Apache’ Vérez resultou decisivo e amargou o último partido de Liga de Emilio García na Medela. Despois de catorce tempadas coma técnico branquiazul, Emilio non seguirá ao fronte do Taboada na vindeira campaña. O Pastoricense levouse o triunfo ante o Bóveda. Os do Acebreiro dispuxeron de máis ocasións que o seu rival. Kanuto marcou as diferenzas no centro do campo. Por último, o Antas neutralizou un 0-2 en contra ante o Páramo no seu adeus á categoría. Zhasky desquiciou aos atacantes do cadro de Melenas, que bailaron ao ritmo de Brais ‘Thiaguiño’.

Imagen por defecto
Diego Díaz Martínez
Polivalente hiperactivo. Enfermo do "balompié". Só estás a un mal día de ser coma min.
Artículos: 752

Deja un comentario