O Polvorín xogará a fase de ascenso por primeira vez na súa historia

Rematou a primeira fase da Terceira División e fíxoo coa clasificación do Polvorín para fase de ascenso. É a primeira vez que o filial do C. D. Lugo xogará para tentar subir á Segunda División RFEF. Preto estivo de acadar ese obxectivo o Racing Vilalbés. Foron quen de gañar no campo do Silva, pero non erraron Polvorín nin Somozas. As peores novas chegan desde A Mariña. O Viveiro, que precisaba gañar, caeu de xeito abultado diante do Fabril e terá que xogar a fase de permanencia.

Luca´s Grill
Moreno´s Pizza

O triunfo do Polvorín diante do Arzúa outórgalle o pasaporte para a fase de ascenso (2-0).

Deportes Élide

Día histórico para o Polvorín, que co triunfo diante do Arzúa xogará por primeira vez na súa historia a promoción de ascenso á antiga Segunda División B. Diante dun rival que se xogaba a permanencia, os de Álex Ortiz foron os claros dominadores do encontro e tiveron o control durante a totalidade do mesmo.

De tódolos xeitos, foi o Arzúa quen asustou primeiro. Un mal despexe da defensa rematou co disparo de Iker Hurtado ao pao. Moi poucas máis novas en ataque do conxunto visitante. O Polvorín colleu o timón, pero non atopaba con claridade aos seus xogadores de ataque, e a primeira metade rematou sen ocasións claras de gol. Tan só dúas faltas desde a frontal que saíron por enriba da portería.

Na segunda metade o Arzúa repregouse máis e o filial albivermello, ao que lle chegaban novas desde outros campos nos que os seus rivais gañaban os seus encontros, viuse obrigado a buscar o tanto por tódolos medios para non quedar fóra das tres primeiras prazas. Tentouno coa entrada de Christian no sitio de Marcos, buscando así máis presenza en área rival. Comezou a aclararse o panorama coa expulsión do zagueiro arzuán Tomé, que viu o cartón vermello directo no minuto 66 ao derribar a Christian cando ía só cara a portería.

Dez minutos despois chegou o gol. Jesús rematou de tacón, no primeiro pao, un saque desde o curruncho. O Arzúa lanzouse ao ataque, ao precisar dous tantos para salvar a categoría. O Polvorín aproveitou os espazos e nunha contra chegou a sentencia. Iago Novo recolleu o balón ao borde da área propia e protagonizou unha xogada maradoniana. Regatou a quen se lle puxo diante e logo de driblar ao portería fixo o segundo.

O Racing Vilalbés cumpriu coa súa obriga e venceu na Grela ao Silva, pero rematou cuarto (1-2).

Non puido ser. O conxunto chairego rematou a primeira fase na cuarta posición e xogará a segunda fase na procura dun posto no play off de ascenso. Os triunfos de Polvorín e Somozas evitaron que o Racing Vilalbés entrase entres os tres primeiros, pero os 40 puntos obtidos polo conxunto de Simón Lamas outórgalles unha importante vantaxe de cara á nova competición.

O encontro comezou co Silva levando o peso do encontro e xerando certo perigo cun testarazo de Joao Paulo que saiu desviado por poucos centímetros. Pero non tardou o Racing e adiantarse no marcador. Pedrosa aproveitou unha indecisión entre a zaga e o porteiro local e meteu a punteira da bota para facer o primeiro tanto da tarde desde a frontal da área grande. Gozou de máis ocasións de gol o cadro coruñés, aínda que sen excesivo perigo. As máis claras chegaron en internadas pola banda dereita de Brais Lema e cun lanzamento de Souto desde a frontal.

O segundo tempo non comezou ben para os vilalbeses. Nun saque desde o curruncho lanzado por Fabio, o balón bateu en López que marcou na súa propia porta. Nos seguintes minutos non se viron xogadas de perigo. Ao Racing costáballe chegar e os de Bardanca tan só chegaban á porta de Rumbo en accións a balón parado. Nos últimos minutos, os de Simón Lamas xeraron máis perigo. Marino conectou un bo testarazo logo dun saque de falta de Pedrosa e xa co tempo cumprido chegou o tanto do triunfo. Rumbo sacou, Vérez peinou e Muíña, que recibiu dentro da área definiu diante de Ríos. Cuarto tanto da temporada para o central chairego.

O Viveiro non foi rival para un Fabril que xa sentenciou na primeira metade (1-4).

Todo pasaba por gañar, pero as esperanzas esvaecéronse axiña. O Fabril, que recuperou a súa mellor versión neste tramo final de competición, pasou por enriba dos mariñáns e acadaron a permanencia. Non o puido facer o Viveiro, que terá que pelexar por evitar voltar a a Preferente nunha segunda fase cos seis últimos clasificados do grupo sur.

O encontro comezou con alternativas no xogo e nas áreas. Primeiro foi Adri Castro quen a piques estivo de marcar cunha volea que rozou o pao de Manu Cedrón. Non tardou en respostar Arturo, pero o seu lanzamento atopouse coa gran resposta do meta Alberto. A partir de aí o Fabril foi moi superior e o dominio materializouno de contado. Javi Sánchez aproveitou a boa xogada de Yuste para facer o primeiro e só tres minutos despois a internada de Peke pola banda esquerda rematou co disparo raso de Barba desde a frontal ao que non puido respostar Manu Cedrón. Foron momento espectaculares de xogo do filial deportivista, que volcaba os seus ataques pola banda esquerda, na que Guille e Peke se entendían á perfección. Pouco antes do descanso chegou o terceiro. Sarmiento sacou unha falta con picardía e Adri Castro rematou ao fondo da portería.

No descanso Chusky realizou un triple troco e deu entrada a Uriol, Rolle e Álex Meitín no canto de Nico, Dani Montes e Facu. O decorado pouco trocou e o encontro non tivo demasiada historia. O Fabril anotou o cuarto, segundo na conta particular de Javi Sánchez e o Viveiro maquillou o resultado cun tanto de Javi Rey logo dun rexeite de Alberto a tiro de Arturo.

Imagen por defecto
Redacción Futbolinlugo
Artículos: 274

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.