No segundo tempo, non houbo excesivas ocasións de perigo. Ambos equipos tiveron algunha opción, a última foi para os locais, pero finalmente quedou en empate.

O Folgueiro interrumpiu o seu bo momento de resultados ante o Xermade (2-0). A diferenza agora entre eles é de cinco puntos, cos do Vicedo manténdose na praza de promoción de ascenso. É a terceira derrota do curso, que, en cambio, leva o mesmo número de vitorias que o líder, 8.

O Xermade sumou o sexto triunfo da campaña e dálle ás para seguir manténdose nesa parte nobre da clasificación. Os locais adiantáronse no primeiro tempo, ao aproveitarse Sergio Vila dun rexeite. Nun contragolpe, o Xermade sentenciou nunha xogada de Nando pola esquerda que rematou a gol Josito.

O Riotorto volve aúparse á 5ª praza tras gañar de xeito contundente en canto ao resultado á Piringalla (5-1). O club da Veiga anda na procura de adestrador, tras destituír a Omar. Aínda así, amosou a súa faceta goleadora o pasado domingo.

Óscar, dos irmáns López Cabo, anotou un hat tick; antes de que Manu Carreira redondease a conta cun 5-0. No tramo final de partido, os pupilos de Marcos Moscoso lograron o gol da honra por medio de Iker.

Na 6ª posición queda o Sporting Pontenova con 18 puntos, un máis que o rival que lle gañou esta fin de semana, o Casás (2-1). O conxunto capitalino reencontrouse coa vitoria despois de cinco partidos sen conseguila.

O encontro comezou igualado, aínda que pouco a pouco o Casás fíxose dono do balón. Con todo, quen marchou gañando ao descanso foi o cadro visitante con gol de Camilo, nun bo disparo dende fóra da área.

No segundo tempo, o Casás dominou e foi a pola remontada. Herrero logrou un dobrete, primeiro marcou a saída dun córner, e logo cun bo disparo que entrou pola escadra rival.

A Candelaria é oitava, empatada co Casás, a seis puntos da promoción e seis puntos por riba do antepenúltimo. Queda cun punto máis que o seu rival, perdeu en Alfoz (2-0).

Os locais puxéronse con dous goles de vantaxe antes do descanso. Anotou un dobrete Iván García, que volveu esta pasada fin de semana a enfundarse a camisola do Alfoz. Mellor redebut, imposible. A pesar de quedar cun futbolista menos por expulsión no segundo tempo, os locais contralon ben o partido para lograr os tres puntos.

O Celta Barreiros é décimo, logo de golear a un Muimenta que non perdera dende a chegada de Basi (5-0). Desta maneira, o conxunto do Cascabeiro deixa o descenso directo a dez puntos. O Muimenta queda a cinco da do antepenúltimo.

Tamén gañou o Guitiriz, 1-3 ante o Cospeito, e enlaza dous triunfos consecutivos por segunda vez na temporada. Suma 15 puntos, catro de diferenza co antepenúltimo.

Foi un partido ademais de estatísticas para o cadro guitiricense. Marcou Asier o seu primeiro gol co primeiro equipo en competición oficial. Anotou César, convertíndose no futbolista con máis anos en anotar un tanto co club. O futbolista de 46 anos leva máis de 30 tempadas ligadas ao conxunto do Suso Cruz. Ademais debutou o xuvenil Aitor Díaz.

O gran beneficiado da zona baixa é o Mondoñedo. Logrou a segunda vitoria consecutiva no Viñas da Veiga. Desta volta ante un rival directo como o Cabreiros (2-1), do que queda a un punto. O cadro mindoniense segue sendo antepenúltimo, con cinco puntos de vantaxe sobre o Muimenta.

Na zona sur, o Ferreira suma a oitava vitoria do curso para seguir no máis alto. Derrotou ao Antas (3-0) e acumula 26 puntos. Conta con dous de marxe sobre o Becerreá e tres con respecto ao San Roque. Levan oito xornadas sen perder.

O Antas queda na novena praza con catorce puntos, a dez da promoción e oito por riba do descenso directo. Os pupilos preparados por Hugo Vázquez deron a cara ante o Ferreira a pesar do resultado. Encaixaron o primeiro gol e tiveron a opción de empatar por medio de Besteiro.

Tamén por medio de Iván Ramos puideron igualar ao vir dos vestiarios. Pero logo chegou o 2-0 local e máis tarde sentenciaron co 3-0. En ambos goles foi protagonista Kylian que entrou no segundo tempo e realizou dúas grandes accións individuais.

O Becerreá suma tres vitorias seguidas e sitúase no posto de promoción de ascenso, a dous puntos do líder. Superou ao Friol (2-3) e queda cunha marxe de un punto co San Roque, dous co Palas e tres co Paradela. A parte nobre da zona sur está moito máis apertada que a do norte.

O Friol é 10º con once puntos, cinco máis que o descenso directo. Nunha boa primeira parte de ambos equipos, cada un marcou un gol dende lonxe. No segundo tempo, os visitantes marcaron o segundo e á contra anotaron o terceiro. Costoulle retomar as sensacións ao Friol que nos últimos minutos logrou meter o segundo.

Nove encontros sen coñecer a derrota suma o San Roque. A sétima vitoria do curso logrouna ante un rival directo nestes momentos, o Paradela (3-2). O cadro capitalino supera ao seu rival na clasificación e quedan con dous puntos de diferenza na 3ª e na 5ª praza, respectivamente.

O Palas é 4º ao conseguir o terceiro triunfo seguido ante o Quiroga (2-1). O club dos Chacotes permanece a catro puntos do liderado e consolídase na parte alta da táboa clasificatoria. O Quiroga é último, a un punto do seu antecesor e a tres do 14º.

Vinte puntos leva o Santa Comba (6º) na tempada do seu regreso á Segunda. Superou pola mínima (1-0) ao Brollón (7º), na segunda derrota da tempada do cadro dos Medos e segunda consecutiva. O club da parroquia de Lugo queda un punto por riba do seu rival na pasada finde.

O Portomarín é 8º tras gañar 3-1 ao Incio e acumular catro encontros sen perder. O Incio é 13º con 9 puntos, tres máis que o descenso directo.

Na zona media baixa, o duelo dos dous recén ascendidos finalizou en empate. O Páramo (11º) segue por diante do Rubián (12º), logo do 1-1. A diferenza entre eles é de dous puntos.

Na zona baixa, o duelo de filiais tamén rematou en empate. O Lemos B e o Chantada non pasaron do 1-1 e continúan na parte perigosa da clasificación. O club chantadés é penúltimo con 6 puntos, dous menos que o Lemos B (antepenúltimo).