O grupo FutbolIn (Futbolinlugo e Futbolinourense) vén de acordar ofrecer un paquete de publicidade de balde para todos aqueles negocios que se atopan en serios problemas. Este conglomerado ten moi claro que naceu por e para as persoas, que se debe a elas. Xa que como dicimos sempre, sen vós non somos ninguén. Son momentos de axudar e de estar cos nosos e coidalos.
Así que, neste día no que os nosos queridos bares e demais familia volverán pechar as súas portas, decidimos o seguinte. Queremos darlle a máxima vida posible a todas aquelas empresas, sociedades ou negocios que sofren e se apagan con esta pandemia. Queremos manter vivo o seu espírito e darlle luz. Por iso, Futbolinlugo e Futbolinourense publicitarán gratis a todos os negocios que se atopen pechados ou cun ERTE que afecte a un mínimo do 50% dos seus traballadores.
Durante canto tempo? Todo o que se manteñan nas citadas circunstancias.
E con algún compromiso de permanencia ou interese? Ningún. Toca estar coas persoas e ser persoas. Só queremos axudar.


Como xa podedes ver na nosa web, Tibor Meira e Discoteca Hermo xa se acolleron a esta iniciativa. Das cales nos aledamos de xeito especial, xa que tiñamos un proxecto conxunto xusto entre mans antes de que o mundo que coñecíamos estoupase en pedazos virulentos. Iso si, non queremos que sexan os únicos. Agardamos as vosas solicitudes no noso correo: futbolinlugo@gmail.com
Saúde e sorte!
