Na metade do mes de agosto, a pretemporada avanza e os movementos redúcense. Aínda que varios conxuntos continúan perfilando o seu cadro de xogadores.
Na Segunda e na Terceira RFEF xa coñecen a folla de ruta. A Sarriana ten a disposición un xogador máis para a súa estrea ligueira diante do Gran Peña Celta C. Precisamente trátase dun ex futbolista da canteira celeste. O mediocentro vigués Miguel Fernández chega ao club de Sarria procedente do Estradense.
Que non continúa na Sarriana é Diego Santín. O futbolista berciano que xogou o III All Star Futbolinlugo xogará na Terceira pero no Atlético Arteixo.
Na Preferente tamén saben do seu calendario. Mentres agardamos polo calendario da Primeira, o Lourenzá reforza o seu conxunto. O defensa Isaac xogará no club da súa vila tras catro temporadas no Riotorto.
O Burela comunicou que Jairo López, Jimmy, Yeray e Brais Penelo seguirán un ano máis vestindo de verde. O cadro da Marosa continúa coa súa aposta pola xente da casa.
Na Segunda Rexional, o Xermade reforza o seu conxunto con dúas incorporacións. Chega o mediocentro Anxo Teixeira procedente do xuvenil do Racing Villalbés.
Tamén se suma ao proxecto de Borja Bouza, Andrés Seco ‘Andy’. Vén do UD Cebarca pero o atacante pontés xa sabe o que é xogar na provincia no Roupar.
Na Terceira Rexional, o Celta Barreiros ficha ao mediocentro Antón. A última campaña xogou no xuvenil da SD Ribadeo, ao igual que outros seis compañeiros que chegaron da canteira ribadense ao club do Cascabeiro.
