Con agosto á volta da esquina, o mercado segue moi activo. Por exemplo, o Guntín quere consolidarse na Primeira Galicia logo deste novo ascenso. Para iso, Kiko Sanfiz únese a Hugo Vázquez no corpo técnico dos do Ladairo. O preparador naronés está asentado na provincia desde o seu paso polo Racing Villalbés, desde onde chegou á base do CD Lugo.

Un pouco máis ao sur, o Chantada Atlético segue reforzando o seu proxecto para a nova temporada. A última incorporación, a do contrastado defensor Ivo, que chega desde o Escairón e que ten pasado en outros equipos da comarca como Bóveda, Lemos ou Sarriana.

Na Terceira Galicia, dous conxuntos recén descendidos ao Grupo Norte queren voltar o antes posible á Segunda. O Celta Barreiros anunciou a fichaxe do focense Anxo Marqués, que vivirá a súa segunda etapa na zaga do conxunto barreirense, mentres que Lucho tamén regresa á que xa foi a súa casa, neste caso o Goiriz.

No Grupo Sur, o Páramo pretende fuxir canto antes dunha categoría que se agarda moi competitiva nesta 23/24. Para facelo, renovan ao gardamallas Javi López, un seguro baixo paus.