Comezamos cunha baixa significativa no CD Lugo. O gardameta Julen causa baixa na entidade lucense logo de toda unha vida defendendo as cores albivermellas, sendo peza clave nos últimos anos do seu filial. Seguimos falando de porteiros. O ‘gato do Vicedo‘ Javi Pita asinou como novo xogador do As Pontes da Preferente, logo de acadar o ascenso nas filas da Sarriana. Competirá co mallorquín Jesús Jurado, que chega ao Poboado procedente do Arteixo.

Na Primeira Autonómica, máis novas de porteiros. A SD Chantada fichou a José Ramón Carballude ‘Moncho‘ para defender o arco do Sangoñedo. Procede da SD Cruces e militou en conxuntos como o Lalín e o Silleda. No Santaballés causa baixa Adrián, logo de nove temporadas baixo os paos da Liga. O conxunto chairego renovou a Josiño. O meta Roy chega ao Portomarín procedente do San Roque. Non é o único movimento no cadro miñoto, que renovou ao central Nacho Carbonell, logo de realizar un bo papel en Preferente. Asimesmo, xogará no Chao da Poza Alberto Caloto, a onde chega procedente do Sporting Lucense. E para rematar no Portomarín, Diego Díaz xa ten axudante no banquiño. Será Adrián Roa, que retorna ao club no cal xa estivo como xogador.

O Chantada Atlético asegurou a continuidade de Ariel Aquino e Álex Rodríguez ‘Arca‘. No Meira causa baixa, logo de dezasete temporadas, o capitán Javier Cortón. De tódolos xeitos non abandoará o club e será o novo vicepresidente.

O Burela asinou ao centrocampista Xoel Rodríguez. O futbolista, formado na base do Viveiro, militou no Conxo e no Compostela B antes de facer un paréntese na súa carreira futbolística que retomará na Marosa. Sen saír da Mariña, o CD Foz volve a xuntar nun campo de fútbol aos irmáns Moreda. Aitor renova unha temporada máis e Álvaro volverá calzar as botas no Martínez Otero despois de varios anos de parón.