Hoxe iniciamos o noso Diario dun mercado pola Segunda RFEF, onde coñecemos dúas baixas en clave lucense. Iago Parga abandona a disciplina do Bergantiños e o seu destino podería estar no Polvorín, según comentan os compañeiros de InfutbolGalicia. Así mesmo o ex do filial do Lugo Iago Novo non seguirá no Formentera. Nalgúns mentidoiros de Twitter tamén se especulaba cun posible regreso ao Polvorín.
Xa na Preferente temos novidades importantes. A Sarriana vén de realizar dúas fichaxes de renome. O mediocentro Marcos e o lateral esquerdo Pablo Rey chegan á Ribela procedentes do Viveiro. Así mesmo, a Residencia incorpora ao meta Marcos Sanfiz desde o xuvenil de Liga Galega do EF Polvorín. E no Lemos renova Dafonte segundo La Voz de Galicia.
Na Primeira as principais noticias nacen do corazón do Sangoñedo. O Chantada conta con novo comandante tralo adeus de Montoto. Adrián Méndez ‘Traste’, ata agora defensa do primeiro equipo, cambia o filial e a coordinación do club polo banco do Chantada A. Home da casa e sobradamente preparado, é a primeira gran aposta da nova directiva vermella. Pola súa parte, o Chantada Atlético conseguiu a renovación do pichichi das últimas temporadas. Adrián ‘Tino’ manterase coma a principal ameaza ofensiva dos de Fernando Corredoira.
No Outeiro continúan coas renovacións. Desta vez é o turno dos Veiga, Adri, David Teijeiro e Óscar Ben. E en Burela teñen novos coordinadores na base. Javi Ruiz (San Ciprián) coordinará o fútbol-11 e o meta Simón Martínez, o fútbol-8.
Unha categoría máis abaixo, o Paradela terá no banco a Rubén Bergantiños unha temporada máis. Xa na Terceira, o Rioaveso cambiará de director de orquestra. Miguel Fernández non seguirá á fronte do Machinango. Por último, o Relámpago Taboada presentou á súa nova directiva e corpo técnico. Gorri, procedente do Chantada Atlético, será o novo adestrador dos da Medela.
