Os movementos na provincia non paran e o #DiarioDunMercado convértese nun imprescindible a estas alturas do ano.
Comezamos pola Terceira RFEF onde hai grandes novidades en canto aos clubs da provincia e a xogadores lucenses da categoría. O Racing Villalbés renova a Javi Rey. Segunda temporada seguida na segunda etapa do ’10’ no conxunto chairego.
Outro que segue é un rapaz da casa. O atacante Rares vivirá o seu segundo ano como sénior baixo a dirección de Simón, aínda que na súa etapa de formación xa contou con minutos no primeiro equipo.
Quen non continúa no Racing é Dani Pedrosa. O dianteiro de Ribadeo pon fin a dous anos coa camisola vilalbesa e xogará na Segunda RFEF. Estará as ordes de José Luis Lemos no Bergantiños.
Outro ex do Racing é protagonista esta semana. O central Xusto continuará unha temporada máis no Silva. O focense sumará xa a cuarta campaña no cadro da Grela.
Álex Ortiz xa ten novo destino logo de non continuar no Polvorín/Lugo B. O preparador andaluz regresa a súa casa. Adestrará ao Vélez malacitano na mesma categoría na que vai xogar o filial albivermello, a 2ª RFEF (aínda que en distinto grupo).
Seguindo na Terceira, o Somozas continúa vinculado á provincia. Logo de anunciar a renovación de Kiko, tamén confirmou a continuidade do mediocentro Luis Díaz.
Ademais, en principio, dous lucenses que este ano xogaron no Pol farán a pretemporada co cadro de Ferrolterra. O centrocampista Porto e o atacante Herrero todo fai indicar que se porán as ordes de Marco Roca en xullo. No caso do mediocentro a situación pódese complicar por mor dunha lesión.
Na Preferente, confirmouse a renovación de Dani Moirón como adestrador do Ribadeo tal e como xa contamos en episodios anteriores. De adestradores vai a cousa tamén en Primeira Rexional coa continuidade de Germán Campos como técnico do Pol logo do frustrado ascenso.
Na Segunda Rexional a cousa tamén vai de adestradores. Diego Díaz encargarase do equipo sénior do San Roque. Diego volve a casa tras ser preparador da base no EF Polvorín, club co que o San Roque ten unión en Montirón. No cadro capitalino seguen o lateral Luis Alberto, o medio César e o capitán Emilio.
Tamén en Lugo cidade, o San Lázaro aposta pola liña continuista. Seguen o adestrador Diego Rey, o seu segundo Álex Cortón e o delegado Óscar García. Pipita, Cadenas, Gabri, Vigo, Martín, Julio, Saúl, Viti, Pablo, Álex Ferreiro, Armesto, Borja Canda, Picatto, Manel e Santi renovan. O equipo contará coa volta de Luis Martín.
