As renovacións seguen acaparando o protagonismo nesta nova edición do Diario dun Mercado.
O lucense Pedro Delgado asinou a súa renovación co Arzúa. Será o único lucense no «queixo mecánico», logo das saídas de Brais Prieto, que xogará no Viveiro, e de Álex Vázquez, novo lateral da UD Ourense. O fisterrán Martín Traba, cun extenso currículum na nosa provincia (Lemos, Ribadeo, Sarriana) é novo xogador do CD As Pontes.
O Santaballés anunciou tres renovacións máis. Os mediocentros Martín, que cumprirá a oitava temporada no cadro chairego e Óscar que xogará por terceira campaña na Liga, así como o lateral Rubén, estarán ás ordes de Juan Rodríguez loitando pola permanencia en Preferente.
Tamén renova o compromiso co San Lázaro o seu adestrador Diego Rey. O lucense cumprirá a súa terceira temporada no banquiño do cadro lucense e foi quen de acadar o ascenso a Primeira Autonómica, categoría na que militará a próxima campaña. Como axudante continuará Óscar García, que fará tamén as funcións de delegado.
As fichaxes chegan da man do Sporting Pontenova. O conxunto dirixido por Andrés Bouza fichou ao mediocentro Juan Álvarez, procedente do Atlético Lugones e formado nas categorías inferiores do Covadonga. Xogará tamén na Mina un vello coñecido da afección pontenovesa: Bruno Bouza. O defensor descolgou as botas logo dun periodo de inactividade.
A SD Chantada anunciou as renovacións de Yaiza, Laura, Andrea e Ana de cara a nova temporada. O Ribadeo FC vén de anunciar o Enma Cuervo de fútbol feminino que disputarán no Pepe Barrera o Athletic Club de Bilbao e o Real Oviedo. Será o vindeiro sábado 14 de agosto ás 17:30 horas. Un encontro do máis alto nivel na nosa provincia.
No fútbol base, Juan Gómez seguirá un ano máis como coordinador da Piringalla.
