A terceira vitoria seguida do Folgueiro déixao na terceira praza, a catro puntos do liderado. Superou a outro dos equipos da zona alta, o Riotorto (1-2). Dominou o cadro visitante no primeiro tempo, pero na seguna metade os pupilos de Omar foron mellores e puideron empatar nun balón que petou no pau.

Na cuarta e na quinta praza sitúanse o Casás e o Xermade con trece puntos (mesmos que a Pontenova – 6º). Ambos equipos enfrontáronse nun partido cuxa segunda parte solapouse en horario co primeiro tempo do Real Madrid – Barça.

Foi un encontro igualado, no que o Casás se puxo por diante ao marcar Cristian de penalti. Antes do descanso igualou o Xermade por medio de Pedro Coria. Ambos equipos tiveron ocasións, aínda que Raúl, gardamallas local, realizou as mellores intervencións.

Na zona media da táboa sitúase a Candelaria con doce puntos. Logrou o cuarto triunfo do curso ante a Piringalla (4-1), que queda con seis puntos. O acerto do club da Rúa e o bo traballo defensivo facilitaron que os tres puntos quedasen na Granda.

O Alfoz conseguiu unha das grandes vitorias da finde ao impoñerse ao Guitiriz (4-0). Os pupilos preparados por Javi Chinchón sumaron o segundo triunfo seguido e acumulan dez puntos na 9ª posición, un máis que o seu rival.

O conxunto verdibranco dominou na maior parte do partido. Axudoulle aos locais marcar cedo, o Guitiriz tivo un cuarto de hora no que tratou de achegarse á área rival, pero o Alfoz marcou o segundo. Logo chegaron dous goles máis, en detrimento da falta de gol que arrastraba o conxunto nas primeiras xornadas.

O Celta Barreiros tamén está con nove puntos na clasificación logo de vencer a un rival directo nestes momentos como o Cabreiros (4-2). Os visitantes adiantáronse nun penalti. Miguel Andina empatou, pero novamente o Cabreiros anotou o segundo e marchou gañando ao descanso.

O Celta Barreiros saíu a polo encontro no segundo tempo e marcoaron dous goles rápidos por medio de Pita e Casanova. Nos últimos minutos Nico redondeou a vitoria por medio dun penalti.

Na zona baixa, salientamos o primeiro punto que logrou o Cospeito ante un rival directo como o Mondoñedo (1-1). O cadro da Fonte continúa de pechacancelas pero a catro puntos do seu rival.

O Mondoñedo non foi capaz de marcar máis goles nas opcións que tivo no primeiro tempo despois de poñerse por diante. Logo o encontro pasou por un tramo de partido igualado. Mediado o segundo acto, Cancio marcou de falta directa o segundo gol da tempada do equipo e del memo.

Na zona sur, o Ferreira mantense como líder logo de sumar a cuarta vitoria consecutiva. Suma seis triunfos no que vai de liga, o último ante o Quiroga por (1-2).

Adiantouse o cadro local nun primeiro tempo no que tiveron algunha ocasión máis. No segundo acto, marcaron o segundo nunha acción polémica que acabou con tres expulsados no conxunto visitante (un deles futbolista do campo).

Con todo, o conxunto verde non se veu abaixo, empurraron e xeraron oportunidades poñendo en aperto o líder. Recurtaron diferenzas por medio de Jato. O propio Jato puido empatar pero o ex gardamallas do Quiroga Adri García detivo un penalti.

Becerreá, Paradela e San Roque son os perseguidores do líder con quince puntos e a tres do primeiro posto. O Becerreá sumou o cuarto triunfo da campaña na súa saída a Portomarín (1-2).

Os pupilos de Diego Rey foron os que se adiantaron no marcador. A reacción visitante foi rápida para empatar. No segundo tempo, desperdiciaron un penalti pero posteriormente Xairo completou a remontada. No último tramo de xogo os locais tentaron a igualada, pero sen éxito.

O Paradela venceu a domicilio ao Lemos B (1-2). Todo despois de que o filial comezase gañando no primeiro minuto. Puido ampliar diferenzas, pero non foron capaces de tomar máis vantaxe. O Paradela igualou no segundo acto, empurrou e logrou a remontada final.

O San Roque reafírmase na súa condición de conxunto máis en forma da Segunda lucense co seu quinto triunfo seguido. Desta volta ante o Friol (0-3). O acerto decantou dende o inicio o encontro ao seu favor. Conseguiron dous goles no primeiro tempo. Logo a expulsión do local Marcos tamén condicionou o xogo.

Aínda así, no segundo tempo o Friol intentou achegarse no marcador. Non o logrou, e o conxunto capitalino aproveitou un erro rival para facelo terceiro tanto.

Na 5ª praza aparece un Brollón mermado polas lesións que esta semana lle fixo ficha a Ibán Pires, xogador de club que continúa coas súas tarefas de axudante do adestrador Chura. O equipo dos Medos sumou o seu cuarto empate consecutivo ante o Palas (0-0). Precisamente, ambos clubs tamén igualan na táboa clasificatoria con 13 puntos.

Tamén teñen 13 puntos o Santa Comba e o Antas. O equipo da parroquia lucense do mesmo nome leva tamén ritmo de líder: catro vitorias nas últimas catro citas. Superou pola mínima ao Chantada B (1-0).

O gol decisivo chegou nada máis comezar. Os locais puideron ampliar nalgunha chegada máis e no segundo acto o filial tamén o tentou. Con todo, a falta de gol está condicionando o cadro chantadés, dous en sete partidos.

Pola súa parte, o Antas sumou o cuarto partido gañado da temporada ante O Páramo (tamén por 1-2), que acumula tres derrotas seguidas e baixa ata o 10º posto.

Os visitantes tentaron levar o dominio e marcaron antes do descanso por medio de Besteiro. No segundo acto, O Páramo tivo as súas chegadas, pero Portu puxo máis vantaxe para o Antas. Os locais metéronse no partido cun tanto e pelexárono ata o final.

Da zona baixa tan só gañou o Incio. Sumou o segundo triunfo e cortou a mala xeira de cinco encontros perdidos. Venceu ao Rubián (1-0). Resultou decisivo o tanto de Urdi nun encontro que estivo envolto na polémica con dúas expulsións no Rubián e unha nos locais.

Hai tres equipos que non gañaron no que vai de liga e acumulan un punto: Lemos B, Chantada B e Quiroga.