Antes de nada, son Fran ‘Carbeta’. Levo desde os 18 anos xogando na SDC Roupar. Aínda que parei catro temporadas para xogar no Codesido. Problemas con un míster… Actualmente son xogador e directivo, pero deixareino a final de ano.

O que vos vou contar aconteceu hai máis ou menos tres anos. A primeira temporada despois da miña estancia en Codesido. Dirixíanos Diego Dopico e a campaña estaba sendo boa, loitando co desaparecido Ourol polo ascenso e o primeiro posto.

Pois ben, ese día xogabamos co Matela en Roupar. Era sábado. Non houbo convocatoria xa que só tiñamos doce xogadores dispoñibles. Un deles, era eu. Que tiña que ir traballar pola mañá á central debido a unha avaría (traballaba nunha empresa que levaba o mantemento de fontanaría para Endesa).

Avisei ao míster e díxenlle que contaba chegar sin problemas. O detalle surxiu cando acabamos o traballo e fomos entregar os partes. Serían as 12.30-13.00 horas cando o encargado de mantemento nos dixo: «Moi ben chavales, ide comer e vide pola tarde ás 14.00 horas que houbo outro problema e necesítovos dúas horas máis». O primeiro que pensei é que non chegaba. Chamei ao míster e díxome que a ver se daba feito o antes posible.