Hoxe falamos con tres xuvenís do CD Palas, equipo que non deixa de acadar éxitos e de sorprender co seu fútbol. De feito, cada vez é maior a masa social que se despraza aos Chacotes cada 15 días para ver xogar a estes rapaces!
O pasado sábado 15 de abril, o CD Palas proclamouse campión en categoría xuvenil do II Torneo Promesas Xosé Manuel Alvelo, celebrado en Monterroso. A isto hai que sumar que o conxunto está a disputar a 2ª Fase de Primeira Autonómica lucense, e loita por facerse cunha das dúas primeiras prazas nesta liguilla que dan acceso á promoción de ascenso á Liga Galega.
Non obstante, non é casualidade que estes xogadores estean a firmar una gran campaña. Xa en idades cadete e infantil, o bloque xogou polo ascenso á Liga Galega. Este ano, a maioría dos xogadores están no seu segundo ano de xuvenís, polo que, de non conseguir o ascenso nesta campaña, de seguro o farán na próxima.
Falamos con tres dos seus grandes pilares para coñecer un pouco máis acerca do día a día nos Chacotes: Xesús, Ángel e Gabi.
Xesús xoga ou ben de extremo ou de dianteiro. É un pesadelo para as defensas rivais pola súa zurda e o amplo dinamismo do seu xogo. Según el mesmo di, entrar na fase de ascenso esta tempada é una tarefa complicada, pero aínda non dan nada por perdido, máis tendo en conta a confianza que lles otorgou vencer no torneo. Xesús xogou una campaña na SDC Residencia e sinala que, a pesar do bo trato recibido e que sempre estivo cómodo na Cheda, na casa séntese mellor que en ningures.
Gabi é o capitán do equipo, pero di que a figura do capitán no seu Palas queda nun segundo plano, posto que o grupo está moi unido. Apunta que o ambiente de fútbol que se respira nos Chacotes é realmente bo, non só pola cantidade de xente que acude aos partidos, senón porque, por norma, non hai enfrontamentos co árbitro ou con outras afecciones.
Ángel di que o seu fútbol consiste en tocar moito o balón, mediante paredes ou pases, sempre cara diante en busca do gol. Sinala que disfruta gañando copas ou torneos e, aínda que sabe que o ascenso está complicado este ano tentarán loitar por el, e xa na próxima campaña buscarán estar o máis arriba posible.
Os tres xogadores din que, sen dúbida, o que máis lles gusta do fútbol e o que máis disfrutan del é a posibilidade de facer o que máis lles gusta cos seus amigos, co borollismo existente entre eles e coa deportividade reinando. Isto pon de manifesto a unión do vestiario deste gran CD Palas, ao que desexamos todos os éxitos posibles!
