Ter un referente que marque goles no teu equipo non garantiza un ascenso, pero si pode ser determinante en diversos partidos. Dous dos protagonistas da xornada xa nos teñen afeitos a facer moitos tantos, pero a súa facilidade para ver porta sempre merece ser salientada. Tres goles de Seijo no norte e catro de Samba no sur animaron unha fin de semana na 2ª que contamos do seguinte xeito nos #OncesFutbolinlugo.
Na terceira xornada da fase polo ascenso na zona norte, queda como reflexión que a igualdade é a protagonista. O Cospeito mantense como primeiro clasificado, aínda que igualado a puntos co Meira e co Sanci. O conxunto preparado por Luis ten un punto de diferenza co seu rival da pasada finde, a Candelaria. O cadro da Rúa conseguiu os tres puntos na súa casa.
No outro dos grandes partidos da finde, o Sanci non desaproveitou a oportunidade de impedir que o Meira se escapara na clasificación. Os pupilos preparados por Jaime Méndez repuxéronse ben da derrota en Cospeito e conseguiron tres importantes puntos como locais, a primeira vitoria desta 2ª fase.
Cabreiros e Celta Barreiros sumánse á pelexa ao conseguir o primeiro triunfo deste tramo de competición. O conxunto xermadino venceu con claridade ao Guitiriz. Atopou de novo en Seijo a súa mellor baza para superar aos rivais a base de goles. O dianteiro abadinense marcou un hat-trick. Acumula cinco xa nesta parte do campionato e anotara 7 na 1ª fase.
Pola súa banda, o Celta Barreiros impúxose na súa casa ao Muimenta, equipo ao que supera na táboa clasificatoria. O Cabreiros e o Celta Barreiros colócanse no tren perseguidor con seis puntos e o Guitiriz e o Muimenta quedan con catro.
Na terceira xornada da fase pola permanencia na zona norte, o Xermade e o Iberia continúan no bo camiño. A súa distancia coa praza de descenso directo é de 10 puntos. O cadro xermadino segue co seu pleno nesta 2ª fase. Terceira vitoria seguida e recuperando o olfacto goleador que botou de menos no primeiro tramo de competición. Desta volta gañoulle ao Goiriz. Entre os que recuperaron a puntería atópase Diego Bellas, coñecido ultimamente como ‘Piti’.
Con claridade tamén logrou os tres puntos o Iberia sobre o Matela. No equipo de Outeiro de Rei debutou Roberto como central e entrou tamén no segundo tempo Mauricio, a outra das incoporacións que estaba pendente de estrearse.
O Fonsagrada colócase 3º e suma nove puntos logo de sumar tres nun duelo clave ante o Mondoñedo. O Viñas da Veiga albergou un bo ambiente, tal e como planificaron dende o club mindioniense. Pero novamente o resultado a favor non estivo do seu lado. O tanto de Igor e o dobrete no segundo tempo de Rubén rematou coas aspiracións locais. O Mondoñedo queda agora a tres puntos da salvación.
No outro duelo directo da xornada, triunfo capital do Roupar sobre o Abadín. Ambos equipos están na zona baixa do grupo e o conxunto verde non gañara nesta 2ª fase. Pellón foi un dos grandes protagonistas do choque ao marcar os dous goles que lle deron o triunfo aos seus.
Na segunda xornada da fase polo ascenso na zona sur, o Becerreá continúa dando bos pasos para chegar ben posicionado á recta final. É líder con tres puntos de marxe sobre o Ferreira, o seu vindeiro rival no Municipal. Na pasada fin de semana foi quen de vencer a domicilio ao Oural. O cadro preparado por Negrete queda provisionalmente unha miga afastado dos primeiros postos.
Pola súa parte, o Ferreira conseguiu o primeiro triunfo da 2ª fase nun duelo directo ante o Paradela ao que agora supera en dous puntos. Foi un partido moi desputado e con moitos goles. Adiantáronse os do Baliño por dúas veces antes do tempo de descanso. Das dúas empatou o Paradela; nunha delas cun bo gol de falta directa de Raúl.
No segundo tempo os locais aproveitaron o contragolpe para facer dous goles máis. O Paradela marcou o terceiro xa contra o final nunha xogada embarullada. De todas as veces que marcou o Ferreira a autoría foi de Samba. O dianteiro de orixe senegalés xa nos ten afeitos a actuacións similares. O atacante xunta estes catro tantos cos once que marcou no primeiro tramo de competición.
Segue medrando o Antas ocupando o 3º posto, a catro puntos da praza de ascenso. Superaron a domicilio ao filial da SD Chantada cun solitario gol de Álex Diéguez no primeiro tempo; ben asistido polo mediocentro Cristian, un dos protagonistas do encontro. O bo facer defensivo do cadro da Ulloa no segundo tempo mantivo intacto o resultado e mesmo puideron ampliar a vantaxe.
Por outra banda, na Carqueixa o encontro entre o Río Sil e a Milagrosa rematou con empate a un gol. O balón parado custoulle un gol aos locais que se volcaron ao ataque no tramo final. Jordi antou de falta directa para igualar o marcador.
Na terceira xornada da fase pola permanencia no grupo de cinco equipos na zona sur, tocoulle descansar ao Santa Comba. O Sporting Lucense lidera este grupo con nove puntos logo da vitoria ante o colista. O Quiroga queda a dous puntos da salvación.
Entre medias o Páramo e o Brollón empataron a un gol. Tito volveu ser un dos grandes destacados no cadro preparado por Santi López. O central de Guntín de 44 anos está nun bo momento.
Na segunda xornada da fase pola permanencia no grupo de catro equipos da zona sur, o Corgo e o Incio están igualados a puntos na cabeza. Ambos suman sete. O Corgo derrotou nesta xornada ao Bóveda, último clasificado a catro da salvación.
Pola súa parte o Incio perdeu na súa visita ao Palas nos Chacotes. O club da Ulloa ponse con seis puntos e afástase momentaneamente da praza que ningúen quere.
