Non baixan a guardia os líderos de ambos os grupos da Segunda Galicia. No norte, o Burela encabeza a clasificación por cuarta semana seguida; mentras que o Friol deu un importante paso ao derrotar ao San Lázaro, que era ata entón o seu inmediato perseguidor. Goleadores e detalles volveron ser os protagonistas a sete xornadas para que remate a competición.
O Burela mantense intratable neste 2018 logo de sumar a novena vitoria consecutiva ante o Alfoz a domicilio e seguir sendo o equipo menos batido, xunto co Cabreiros (20 goles encaixados). Segundo segue o Guitiriz, que despois de pasar o seu baixón, leva unha xeira de tres triunfos; o último pola mínima ante o Iberia. De preto, séguenlles o Lourenzá que venceu con claridade ao Ourol (Iván Recalde marcou catro goles e Moncho tres); o Pol que derrotou no derbi ao Meira a domicilio e o Folgueiro que volveu ter en Aurelio o seu xogador referencia para superar ao Cospeito. O dianteiro marcou tres dos catro goles do seu equipo. Aumentaron as diferenzas co Cabreiros que sumou un punto nas últimas dúas xornadas. No último choque o equipo adestrado por José Manuel viuse superado por un Abadín que gañou, despois de catro encontros sen facelo e da un paso importante na loita pola salvación.
Quen seguen sumando son dous equipos da zona media. O Roupar e o Candelaria empataron a dous goles e achéganse a salvación nunha categoría que terá que estar moi pendente dos arrastres. Outro dos triunfadores da pasada fin de semana foi o Matela, xa que remontou e derrotou ao Mondoñedo nun duelo directo pola zona baixa. O cadro de Outeiro de Rei levaba quince partidos sen sumar de tres en tres.
Jose Costa Porto, regresa o primeiro equipo.
Dende o clube dámoslle a benvida e desexámoslle moita sorte nesta nova etapa. pic.twitter.com/u7P1BDDaAc
— ⚽ SD Antas (@SDAntas_Oficial) March 7, 2018
O gran duelo do grupo sur deixou ao Friol como máis líder ao vencer a un San Lázaro que levaba unha xeira de catorce partidos sen saber o que era perder. Situación que aproveitou o filial do Chantada para recuperar o posto de ascenso directo. Nunha xornada na que o conxunto adestrado por Rodrigo Amarante tivo dous encontros en 24 horas. O sábado venceron ao Sporting Lucense e o domingo perderon ante o seus veciños no derbi adiado . De aí que o Chantada Atlético estea tamén preto deses postos porque sumou seis puntos na fin de semana. Ademais do derbi chantadino, derrotou á SD Becerreá. Segue nos postos altos o Oural que despois de tres xornadas sen gañar venceu con claridade ao Rubián. Con dous puntos menos queda o Santa Comba que caeu derrotado pola mínima na casa ante o Brollón.
Na zona morna da táboa o Palas segue sumando puntos despois de igualar ante a Milagrosa. Quen segue indo cara arriba é o Portomarín que volveu gañar desta volta ante un rival directo como é o Antas. O cadro adestrado por Manu volveu ter en Óscar López o seu futbolista máis destacado con tres goles; o equipo suma xa 24 puntos, 18 conseguiunos no que vai de ano. Tamén espabilou o Castroverde que venceu ao filial do Monterroso e sumou a súa terceira vitoria nos últimos catro enfrontamentos.
