Os onces da 2ª xornada na Segunda

Na segunda xornada xa hai as primeiras diferenzas entre rivais na categoría. Só cinco equipos nos dous grupos contan os dous partidos por vitorias: Guitriz e Xermade no norte; Portomarín, Ferreira e Palas no sur. Repasamos os protagonistas da segunda fin de semana de fútbol.

No grupo norte, o ritmo márcase dende a Terra Chá. O Guitiriz encabeza a clasificación despois de vencer con claridade no marcador ao Meira. No cadro guitiricense o gardamallas Jesús, Borja e Jose rendiron a un bo nivel, diante dun conxunto meirego que, a pesar de encaixar catro goles, tivo ao seu porteiro Alberto Balsa como un dos destacados xunto con Marcos Salgado. O Xermade non fallou no seu primeiro encontro a domicilio ante o Abadín ao que derrotou por un axustado 2-3. O equipo adestrado por Óscar Pol non se deixou vencer tan facilmente e pelexou liderado por xogadores como Carro, Regueira ou Gesto. O Iberia e a Candelaria non desfixeron a súa condición de invictos e igualaron a dous goles con protagonismo para Eric que fixo un dobrete. Tamén empatou o Cabreiros, no derbi ante o Roupar, a diferenza do que acontecerá hai unhas semanas na Copa Xermade co triunfo do cadro adestrado por José Manuel.

Folgueiro, Comercial e Goiriz conseguiron o primeiro triunfo da temporada. O cadro de Vicedo superou ao Valadouro, despois de adiantarse no marcador e sentenciar cando o seu rival xa xogaba cun menos por expulsión. A Comercial venceu ao Lourenzá no seu primeiro partido na casa. Pola súa banda, o Goiriz derrotou pola mínima ao Mondoñedo grazas a un gol de Lucho. Por outro lado, o Cospeito e o Cervo estrearon a súa puntuación ao empatar a un gol no campo da Fonte.

No grupo sur, o Portomarín lidera a táboa clasificatoria despois de vencer fóra da casa ao Bóveda. Séguenlle de preto cos mesmos puntos o Ferreira e o Palas. O cadro de Pantón derrotou ao filial do Monterroso liderado por Enríquez, Carlos e Juan. No conxunto monterrosino destacaron Adrián Buján e o dianteiro Javi, pero tan só foron quen de facerlle fronte ao primeiro gol do seu rival. Pola súa banda, o Palas venceu ao filial do Chantada cunha nova gran actuación de Pol e de Alvarito. 

Catro equipos máis lograron a primeira vitoria da campaña. O Santa Comba venceu ao Incio cun destacado xogo dos dianteiros Seco e Jul; que foron quen de superar o bo facer por parte de Orlando, Noe e Pombo no club local. O San Roque derrotou pola mínima ao Oural cunha salientable actuación do centrocampista Bruno. Tamén pola mínima conseguiron o primeiro triunfo o Brollón ante a SD Becerreá e o San Lázaro que derrotou ao Guntín. Todos estes equipos empataran na primeira xornada polo que se sitúan con catro puntos. Quen estreou puntuación con tres puntos foi o Corgo que que derrotou ao Sporting Lucense no Anexo do Corgo.

Imagen por defecto
Iván Calaza
Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.
Artículos: 467

Deja un comentario