Os onces da 19ª xornada na Segunda

O Guitiriz mantense no liderado do grupo norte e o Folgueiro reafirma o seu posto de ascenso ao vencer a outro dos candidatos. O Cospeito sae da posición de descenso directo quince xornadas despois e o Valadouro volve quedar sen adestrador. No sur, o Palas sacou un punto do Chao da Poza e continúa líder. Mentres, o San Roque, o Bóveda e o Ferreira volven meter presión. Unha fin de semana de dobretes de norte a sur.

No grupo norte, o Guitiriz venceu pola mínima a Candelaria para manter a posición de cabeza da clasificación. O gol do xogador de Santa Locadia, José Manuel Lorenzo, resultou definitivo. Na segunda posición mantense o Folgueiro que derrotou a un Cabreiros ao que deixa a dez puntos. Á espera do fallo dos dous de arriba continúa o Lourenzá. O dobrete de Montxo (un deles olímpico) e un gol máis de Recalde (xa van 18) foron parte importante para gañarlle ao Goiriz. Pola contra, o Xermade empatou na casa e queda a sete puntos do segundo. O cadro xermadino púxose tres veces por diante no marcador (os tres de Pedro Coria) e as tres veces empatou o Iberia (cun dobrete de Andina incluído). O Roupar volveu ao camiño da vitoria ante o Cervo despois de seis partidos sen gañar. De pouco serviu o dobrete de Miguel Gomes (abriu e pechou o resultado) fronte ao dobrete de Jacobo Ares para o Roupar e máis. Os locais pagaron caro os erros en defensa ante un rival que se presentou con 13 xogadores.

A competición está rota do sexto para abaixo dende hai unhas semanas. Polo que o sétimo posto cotízase para encabezar o outro grupo e marcar diferenzas coa loita entre os posibles arrastres. Nesta xornada houbo un duelo claro por ese posto. Provisionalmente pertence ao Meira que derrotou a domicilio pola mínima ao Mondoñedo. Tamén medra na clasificación o Abadín cunha vitoria importante no Árbol ante o Valadouro. Seijo fixo un bo partido e pechou o resultado para os seus. O Valadouro fallou un penalti que serviría para empatar o choque. Na seguinte xogada o Abadín marcou o segundo. O equipo de Ferreira volveu quedar sen adestrador, xa que Rubén Barrios presentou a súa dimisión. O cadro amarelo pasa por un futuro incerto. A nova na zona baixa é a saída dos postos de descenso directo do Cospeito. O equipo adestrado por Jose Carlos derrotou na Fonte a un rival directo. Venceu á Comercial nos últimos intres. Adiantouse por medio de Rus (que marcou un dobrete), os visitantes remontaron o encontro cun dobrete de Quiñones e o Cospeito volveu darlle a volta ao resultado ao seu favor.

No grupo sur, o líder Palas non foi quen de marcar no Chao da Poza e igualou sen goles ante un Portomarín que leva cinco xornadas sen gañar. O cadro da Ulloa mantén agora dous puntos de diferenza co segundo, o San Roque. O equipo adestrado por Manolo García sumou a terceira vitoria consecutiva ante o Monterroso B. A mellor nova foi o regreso de Borja despois da lesión. O Bóveda volve meter presión ao regresar ao carreiro da vitoria na casa da SD Becerreá. Tamén a mete o Ferreira que venceu por goleada a un rival directo como o Corgo. Cadanseu dobrete de Carlos e de Rafa Vázquez. Na parte alta, continúa estando o Guntín; aínda que nesta xornada fixo menos ruido porque empatou ante o Sporting Lucense. Tamén sumou pero non gañou o Oural. Igualou a un gol nun partido de alternativas ante o Incio.

Na zona baixa, destacaron as vitorias do Brollón e do San Lázaro. O cadro da Proba venceu na casa do Santa Comba con remontada incluída. Brochas abriu a conta cun bo gol dende tres cuartos de campo que entrou pola escadra. Despois os pupilos adestrados por Chura déronlle a volta ao resultado cun gol final do central Miguel. Vitoria importante tamén a do San Lázaro na estrea de Diego Rey no banco. Venceron a domicilio ao filial do Chantada con dobrete de Yago Armesto incluído. A SD Becerreá e o Monterroso B ocupan os postos de descenso directo.

Luca´s Grill
Moreno´s Pizza
Imagen por defecto
Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Artículos: 548

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.