O partido da xornada . . . S.D.C. San Roque – E.D. Lourenzá: a permanencia en xogo no Polvorín

Si existe emoción na pelexa polo ascenso na Primeira Autonómica, a situación na zona baixa non está menos interesante. Este domingo ás 16:30 horas no Polvorín o San Roque e o Lourenzá, dous dos implicados na loita pola permanencia veranse as caras nun encontro con sabor a final. Arbitrará o colexiado José Luis López Rodríguez.

O San Roque atópase na antepenúltima praza da clasificación con dezaoito puntos, os mesmos que o Friol penúltimo e en postos de descenso a Segunda. Unha racha de nove encontros sen coñecela derrota situaron ao conxunto que dirixe Manolo García nunha situación complexa. O último triunfo dos lucenses remóntase ao quince de decembro do pasado ano, fronte a outros dos equipos chamados a pelexar pola permanencia, o Pastoricense, que ten dous puntos de marxe sobre os capitalinos. Na última xornada, o San Roque caeu por un contundente 3-0 na Veiga ante o Riotorto.

A temporada do Lourenzá non é a que agardaban no clube mariñán no ano do seu retorno á categoría. Con un só partido gañado no que vai de temporada, os laurentinos ocupan o derradeiro posto da clasificación a sete puntos da permanencia, que marca o seu rival desta xornada. Polo tanto, o encontro diante do San Roque é unha auténtica final para os pupilos de Diego Rego. Un triunfo mantería viva a esperanza da permanencia para un Lourenzá que, malia non gañar desde o seis de outubro en plena festa da faba, soubo competir na maioría dos encontros perdendo sete deles pola mínima.

Falamos con Manolo García e Diego Rego, adestradores de ámbolos conxuntos, antes dun encontro que resultará decisivo.

QUE OPINAN OS PROTAGONISTAS?

MANOLO GARCÍA (S.D.C. SAN ROQUE)

 – O encontro. «Seguro que vai ser un partido moi disputado e igualado. O Lourenzá sumou puntos en cinco dos últimos sete partidos e foi un rival que xa no partido de ida nos creou moito perigo. É un equipo que intenta dominar os partidos con Recalde como o seu gran referente. Aínda que sexa colista non van baixar os brazos en ningún momento».

– A mala racha. «Non é fácil de explicar. Adestramos desde o comezo de temporada tres días por semana cun bo número de xogadores e os rapaces están implicados ao cento por cento, pero somos o equipo máis novo da categoría e a falta de gol tamén nos está penalizando«.

– A permanencia. «Estamos convencidos de acadar a permanencia. Todos pasa por facernos fortes na casa e non deixar fuxir máis puntos. Seguiremos traballando ata o final. Unha derrota do Lourenzá deixaríao tocado, pero non fundido…porque as matemáticas aínda lle darían opcións«.

DIEGO REGO (E.D. LOURENZÁ)

 – O San Roque. «Agardo un partido intenso e igualado entre dous equipos moi necesitados. Creo que o que entre mellor non partido e cometa menos erros levará os tres puntos. Nesta categoría tódolos equipos teñen varios xogadores dun gran ivel, e o San Roque non é unha excepción«.

 – Encontro decisivo. «A verdade é que para nós é unha das últimas oportunidades de agarrarnos á permanencia. Na situación que estamos o equipo segue adestrando e competindo moi ben, así que algún día ten que chegar a vitoria, agardemos que sexa esta xornada«.

 – Dificultade para pechar os encontros. «A verdade é que é unha das varias asinaturas pendentes. As veces que nos adiantamos non soubemos xogar co marcador a favor. A verdade é que estamos aí por méritos propios. Non creo na mala sorte nin nas malas decisións arbitrais. Debemos facer autocrítica para mellorar e seguir competindo e dando a cara«.

 

 

 

Luca´s Grill
Moreno´s Pizza
Imagen por defecto
Marcos Fernández

Apaixoado do fútbol, en especial do modesto, que aínda mantén os verdadeiros valores do deporte

Artículos: 499

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.