O bo facer do Pol permítelle soñar

O Manuel Luna de Pol está a vivir un ano moi especial. O debut na Preferente do cadro vermello vaise pechar, como mínimo, cun notable. Porén, os de Labrada e Teipa queren chegar ao sobresaínte, e aínda están a tempo. A boa xeira de resultados do conxunto o sitúan a tan só 7 puntos da promoción de ascenso á Terceira RFEF, que sería un fito histórico para a entidade.

Os futbolistas do cadro polense rebosan calidade, pero os adestradores lograron asentar un cadro compacto que disipou as dúbidas do comezo para dar ás a un equipo cada vez máis solvente e dominador. Hoxe falamos con catro dos seus integrantes: Julio Camba, David López, Omar Rodríguez e Manu Cedrón.

O porteiro —agora mesmo lesionado— sinalou que «está a ser un bon ano. Sempre custa adaptarse a unha nova categoría e o comezo foi irregular, pero agora estamos nunha boa dinámica e queremos manter ese nivel». A nivel persoal, Cedrón recoñeceu que «estaba na liña do equipo. Comecei peor e fun de menos a máis, pero a lesión detivo dous meses a boa dinámica. Agora toca recuperarse para axudar ao equipo o antes posible».

Con respecto á posibilidade de xogar a promoción, o gardamallas admitiu que «é complicado porque temos varios equipos por riba e unha distancia de 7 puntos. Ademais tan só gañamos un partido fóra da casa e quedan varias saídas difíciles. Aínda así, creo que co mal inicio que tivemos é moi positivo estar tan preto deses postos». Un dos culpables dese éxito é o grupo humano do Manuel Luna, pois «temos un bo vestiario. Eu tiven a sorte de compartir vivenzas con moitos outras temporadas e xa son amigos. E creo que isto tamén axuda a que revertesemos a situación».

Julio Camba coñece o fútbol profesional, pero é consciente de que «creo que na provincia non hai instalacións mellores que as de Pol, non hai máis que ver os equipos que as empregan». A maiores, o defensor pensa que «temos que asentar ao equipo na Preferente, ser ambicións pero manter os pés no chan. No futuro, quen sabe», mentres que «a salvación debe ser o obxectivo principal deste curso, sen renunciar a nada, pero primando asentar ao equipo».

As chegadas de Labrada e Teipa cambiaron a dinámica do Pol

Pola súa banda, Omar é un dos xogadores máis contrastados da provincia e coñece ben o que é un vestiario. Por iso, o futbolista admitiu que «temos un vestiario unido que xunta veteranía con xente moi nova, pero sempre con boa harmonía e traballo para axudarnos e facer todo esto máis doado». Ademais, o xogador é sabedor do «talento que hai en Pol. Hai xogadores que por diversos motivos son de categoría superior e xogan aquí, mentres que outros teñen nas súas mans dar o salto. Temos un cadro para competirlle a calquera».

Porén, Omar tamén recoñeceu que «non nos metemos presión coa promoción, pois o obxectivo dun recén ascendido sempre é a permanencia e, despois, soñar. Primeiro temos que loitar por facer os puntos que nos dean a salvación matematicamente e, por que non, soñar».

David López, por outro lado, aínda é novo e ten moito fútbol por deixar nos campos, pero xa está máis que contrastado. Para el, «este ano fomos de menos a máis, pero desde comezos de 2025 sentímonos moi cómodos coa nosa idea e comezamos a gañar. Se houbese un mes máis de competición, o Pol aspiraría a cotas maiores».

Tamén se referiu ao partido desta fin de semana contra o Negreira, pois considera que «é difícil, pero temos opcións. Na ida perdimos ao final logo de xogar cun xogador menos case todo o partido… e eles chegan nunha dinámica mala e temos que aproveitalo. Se gañamos, estou seguro de que entramos de cheo na loita pola promoción». O mediocentro recoñece que a nivel persoal está «moi ledo, tanto polo corpo técnico como polos compañeiros. Neste vestiario ves a xente veterana traballar e adestrar coma os que máis, e iso motiva moito ao resto para dar o mellor de cada un».