Cando me pediron que pensase unha anécdota curiosa que me ocorrese xogando ao fútbol foi inevitable botar a vista ao meu primeiro ano de sénior no recentemente creado As Pontes B. É difícil escoller entre as moitas anécdotas a contar que hai dese ano pero, polo peculiar do caso, creo que me quedo con unha por enriba de todas.

Formouse un grupo rapaces novos con varios ‘veteranos’ que xa tiñan moito fútbol detrás, unha mestura perfecta no campo, xa que ascendemos a Segunda, e tamén no vestiario. O míster era o gran Calpita, cunha extensa traxectoria tanto na base como en categorías sénior. Polas súas mans pasaran multitude de xogadores e seguro que viviu moitas experiencias curiosas. Pero esta non a viu vir.

Acabábamos de comezar a pretemporada, debíamos levar unha ou dúas semanas adestrando. Tocaba sesión de físico na Fraga, lugar onde cada 25 de xullo se celebra unha das mellores festas que coñezo. Chegou a hora de comezar e non estábamos todos, faltaba un: Iván Rodríguez, máis coñecido como ‘Buba’, un grande que pasou por unha chea de equipos na provincia da Coruña e tamén na de Lugo (Neda, As Pontes, Dorneda, Santaballés…). El viña a adestrar desde Neda, pensamos que se retrasaría por calquera cousa e decidimos comezar.

Cando xa levábamos unha hora de extenuante carreira, apareceu. Todos nos quedamos coa boca aberta pero a cara do míster foi un poema.