Máxicos que se achegan aos obxectivos, e outros que se afastan

Os Máxicos Salvatierra Abogados chegan co resumo do mellor que aconteceu nunha xornada na que o Burela se fixo máis líder, o Outeiro estreou técnico con victoria e a Milagrosa saiu do descenso.

A Milagrosa gaña a un rival directo e sae do descenso (2-1). Os Máxicos de Madriles sabían da importancia do duelo, froito do cal se produciu un comezo de partido con dúbidas e nervios. O Santa Mariña golpeou primeiro e puxo o 0-1 no 12′, pero o rápido gol de Marco para igualar deu forzas a unha Milagrosa que se mostrou moi seria e agardou o seu momento no Gorgoso. Logo dunha segunda metade igualada, Rafa fixo das súas para poñer o 2-1 cando apenas restaba tempo e os puntos quedaron na Frigsa para desatar a tolemia no feudo lucense.

O Foz levou o derbi mariñán dos Máxicos

O Outeiro de Aarón Sánchez gaña diante do Pastoricense (2-1). Saiu moi enchufado o Outeiro, que acadou o 1-0 logo dunha boa xogada individual de Redondo para asistir a Rubén. O Pastoricense non se fixo ao partido ata a media hora de xogo, aínda que facía dano en accións a balón parado. Na recta final da primeira parte, o Pastoricense logou a igualada nun penalti froito do asedio visitante.

Os Máxicos chairegos, porén, mantiveron a súa idea na reanudación e de novo Redondo fixo unha gran xogada para poñer o 2-1. Desde ese momento o partido baseouse nos segundos balóns, con opcións para os Máxicos locais de sentenciar, pero tamén para o Pastoricense de lograr un empate que non chegou.

O Guntín asegura a permanencia diante do San Lázaro (2-5). 40 minutos tolos nos que o San Lázaro foi quen de adiantarse dúas veces e o Guntín logrou empatar en ambos casos deixaron o electrónico en 2-2 no tempo de lecer. Na reanudación, porén, o Guntín fixo ver a súa superioridade física e anotou tres goles (dous de Debasa —un de penalti— e un de Juancar) para poñer un 2-5 que fixo xustiza ao visto sobre o céspede das Gándaras.

O Foz leva o derbi diante do Lourenzá (2-0). Foi un duelo pechado entre dos cadros que sabían da relevancia do derbi. Porén, os Máxicos focenses están nunha dinámica boísima e Jorge rematou ao fondo das mallas un centro de Aitor xusto antes do descanso. Na reanudación, os locais conseguiron o segundo gol nunha pena máxima que transformou Álvaro e, xa co «Atleti» envorcado, houbo opcións para máis goles por parte de ambos conxuntos, pero o electrónico non se moveu máis.

A SD Chantada supera con claridade á Residencia (3-0). O dominio inicial da SD Chantada non se fixo notar no electrónico ata o 31′, cando Sergio asinou unha gran xogada individual e cedeu a Migui para poñer o 1-0. Na reanudación, porén, os Máxicos branquiazuis deron un paso adiante e someteron aos de Traste, pero o cadro chantadino foi gañando presencia a medida que pasaban os minutos e limitando as oportunidades visitantes. Un lanzamento de falta que non atopou rematador colouse no fondo das mallas no 77′ e, co golpe psicolóxico para a Resi, Brais Mariño sentenciou no 84′ para deixar tres puntos de ouro no Sangoñedo.

O Monterroso remonta na seguna parte e gaña ao Chantada Atlético (2-1). Estiveron cómodos os Máxicos chantadinos na primeira metade a pesares do mal estado do céspede de Cerdeiriños. Ivi Gayoso foi quen de poñer o 0-1 nun segundo balón no que eliminou a dous adversarios e disparou desde a frontal. O Monterroso, porén, foi de menos a máis e gañou presenza a medida que pasaron os minutos. Gabi fixo unha gran conducción que rematou co disparo do 1-1 e Martín culminou a remontada no 85′, cando os Máxicos vermellos contaban cun xogador menos no seu haber, 2-1 en Monterroso.

O Meira cae con dignidade ante o líder (1-2). Foi un partido pechado na Lomba. O Burela adiantouse cun gol a balón parado de Yago e Adri fixo das súas cun golazo con rosca para dobrar a diferenza antes do descanso. O Meira, porén, saiu moito mellor no segundo tempo e fixo dano co xogo directo sobre Farra diante dun Burela ao que lle custaba defendelo. Sergio fixo un golazo de falta para facer o 1-2 no engadido, pero apenas houbo tempo para máis e os puntos marcharon cara A Marosa.

O Castro supera ao Racing Villalbés ‘B’ (3-1). Os primeiros dez minutos foron para os locais, pero os Máxicos racinguistas medraron no choque e anotaron o 0-1 cun centro lateral de Gegun ben rematado por Brais. O gol, unha ocasión posterior de Kaká e un gol anulado ao Villalbés, porén, deron ímpetu a un Castro que remontou antes do descanso por medio de Marino (nun saque de esquina) e Goás, aínda que o Racing tamén puido aproveitar algún erro local para facer máis goles.

Dani Díaz puxo o 3-1 nunha transición cando mellor estaba o cadro de Ivan Lamas e, desde entón, os Máxicos de Dumi xestionaron a vantaxe para deixar tres puntos moi importantes no Arturo Pereiro diante dun Racing ao que se lle está a facer longa a temporada e que errou ocasións claras na recta final para recurtar diferenzas.

O Oural manda na primeira metade, o Xove na segunda (2-2). Os sarriáns dominaron en Xove con máis intensidade e tiveron as máis claras ata o tempo de lecer, aínda que non foron todo o efectivos que deberon (0-2 ao descanso) e pagaron na segunda metade. Os Máxicos locais aproveitaron a presenza de Cora na punta do ataque para aproveitar un rexeite que puxo o 1-2 e un balón parado para o 2-2. Os últimos vinte minutos foron moi abertos e houbo opcións para ambos, pero o marcador non se moveu máis no Municipal.

Taboada e Santaballés asinan táboas nun duelo bonito (2-2). Un gol en propia meta do Santaballés no comezo puxo o choque costa arriba para os chairegos, que ademais sufriron o 2-0 cun penalti pouco despois. A reacción sí que foi inmediata e Vérez aproveitou unha serie de rexeites para poñer o 2-1, pero o duelo baixou o ritmo ata o descanso. Pouco despois da reanudación, Vérez transformou unha pena máxima para poñer o 2-2 e, desde entón, ambos equipos fixeron dano con ataques verticais que non se traduciron en goles pero que si consistiron nun gran espectáculo no «Canti». Ao final, reparto de puntos.