As primeiras novas desta edición do Diario dun Mercado veñen desde fóra dos nosos marcos. Na Segunda RFEF teremos máis representación provincial despois de que o ribadense Rubén Vilela firmase polo Compos. Chega á cidade picheleira despois de lograr dous ascensos consecutivos coa Sarriana e co Fabril. Non saímos da Coruña porque o viveirense Mauro Salgueiro, autor do gol que subiu ao Burela á Preferente e fillo de Luchi, xogará no Silva en Terceira RFEF no seu primeiro ano sénior. Por último, o taboadense Brais Vázquez chega ao Lalín procedente do Noia para seguir na Terceira.

O mercado agasalla un regreso

Na Preferente tamén hai movemento e, neste caso, falamos dun meirego que volta aos campos de fútbol. Marino regresa ao verde con 25 anos e faino na Preferente, categoría que non pisa desde que descendeu co Castro. A súa última tempada foi na Primeira Futgal e foi quen de marcar nove tantos.

Na Primeira Futgal é onde continúan as novidades do mercado cun xogador que se está a convertir nun buque insignia. Pablo Novoa cumprirá a súa sexta temporada no Chantada Atlético. Ven de superar os 2.400 minutos na pasada campaña, terceira na que se asentou na titularidade a tempo completo.

A Segunda Futgal é a que máis reforzos ten nesta edición do Diario dun Mercado. O vilalbés Pedro Pernas será novo xogador do Xermade despois dunha tempada no Riotorto. Hai continuidades importantes tamén, como a de Muiña no Castro ou Pepe, que seguirá sendo o capitán do Cabreiros na súa vixésimo sexta temporada. No Goiriz seguirá Nico Santomé, pero causan baixa Barro, Eladio, Álex e Alber.

Neste grupo norte veñen fortes os tres ascendidos, que siguen incorporando nomes ás súas filas. O Abadín quedase a Iker e Álex, que cumprirán a súa segunda temporada. No Mondoñedo continuarán unha campaña máis Alberto, Nacho e Óscar. Por último, o Catro Roldas firmou a Hugo Prieto do Vilalba FS B e a Nico Fuentes do xuvenil do Racing Villalbés.

Por último, na Terceira Futgal móvense cousas tanto no campo como nos bancos. Roberto Carlos renovou no Carballedo, mentres que Óscar Ramallal será o adestrador axudante e preparador físico do Sporting Pontenova.