Xa sabedes que nesta casa non somos capaces de estar quietos. Que nos gusta seguir innovando e crecendo da man do noso fútbol. Por iso, hoxe queremos presentarvos un par de novidades para este recén chegado 2023.

A principal delas é unha aposta descarada polo multimedia, unha teima de Futbolinlugo desde os seus inicios. No escaso tempo libre dos nosos redactores, varios dos mesmos adicarano a narrar os vosos goles, as vosas xogadas de fútbol de salón ou as mellores paradas da provincia. Si, o que estades oíndo! Ao estilo dos Manolo Lama ou Ibai Llanos.

O procedemento é sinxelo. Vós nos facedes chegar o vídeo coa acción en cuestión (ben ao noso correo ou a algún dos nosos redactores) e nós facemos o resto (xa avisamos que non será de hoxe para mañá). Iso si, precisamos que acompañedes as imaxes con algo de información das mesmas para contextualizar a narración o mellor posible.

Queres ser o primeiro en enterarte das novidades de Futbolinlugo?

Por outra banda, Futbolinlugo vai actualizar a súa lista de difusión de Whatsapp. Desde hai uns anos, preto de 30 persoas gozan de todas as novidades desta casa desde o momento da súa publicación. Como é iso posible? Pois a través dunha alerta que chega ao móbil e que facilita un acceso directo á noticia na nosa web.

Neste 2023 queremos actualizar esta lista, aumentala. Por iso, a aqueles que nos facilitedes un correo co voso número de teléfono e o asunto «ALTA NOTICIAS FUTBOLINLUGO», farémosvos chegar as nosas novidades ao instante. Tedes de prazo ata o próximo 14 de xaneiro. Sigamos crecendo xuntos, amigos do fútbol lucense!