Fernando Corredoira (SD Pol): «O equipo foi medrando co paso das xornadas»

O pasado mes de marzo a SD Pol cumpría 40 anos. Meses máis tarde, celebraba ese aniversario coa permanencia na Primeira Autonómica, á que ascenderan na 2017/2018. Porén, a entidade polense, non contenta con iso, deseñou o pasado verán un proxecto para levar ao equipo á Preferente Autonómica nesta 2019/2020.

Para logralo, a directiva deu continuidade a boa parte dos xogadores que xa competiron o ano pasado na Primeira Galicia, pero tamén apostou por novos xogadores que están a dar bos resultados. Outra das novidades foi a fichaxe de Fernando Corredoira como adestrador, procedente do Cadete A do CD Lugo.

Polo momento, con dezasete xornadas disputadas, a SD Pol é cuarta clasificada, a tan só seis puntos das prazas de ascenso directo, propiedade até agora do Santaballés e dun intratable Atlético Escairón. O principio da temporada non foi o soñado para os vermellos, conseguindo tan só 5 dos primeiros 15 puntos en xogo. Porén, a partires de aí o conxunto foi gañando confianza e a afinidade entre os xogadores comezou a facerse visible no terreo de xogo, o que outorgou ao clube o privilexio de acharse na parte alta desta sempre complicada liga.

Hoxe, Futbolinlugo falou con Fernando Corredoira, técnico do Pol, para coñecer as ambicións do clube para o que resta de campaña e a método que empregarán para cumprir os obxectivos.

Futbolinlugo: Coa primeira volta rematada, mantéñense os obxectivos fixados a principio de temporada?

Fernando Corredoria: A verdade é que agora somos máis positivos que antes. Os obxectivos son difíciles de marcar nesta categoría pola gran igualdade, pero nós queriamos mellorar a clasificación do ano pasado; salvarnos canto antes para evitar sorpresas e a partires de aí ir cara arriba.

FIL: A mellora desde o comezo da campaña foi notable. A que se debeu?

FC: Xa non foron só cuestións deportivas, que tamén, senón que ademais tivemos mala sorte con algunha decisión e algunha lesión. Estivemos dous meses xustos de xogadores, sen ter que facer convocatorias, e a xente que estaba ben tamén se viu prexudicada porque, ao non haber cambios, daban todo cada día. A medida que pasaron os meses recuperamos a xente e esta situación mellorou. En canto o que a min respecta, os xogadores tiveron que adaptarse ao meu estilo de xogo. Pedinlles paciencia, expliqueilles o porqué das cousas que faciamos, e conseguimos adaptarnos cando xa se disputaran varios partidos. O equipo foi medrando coas xornadas, e iso é perfecto.

Sempre tentamos dar o mellor de nós.

FIL: Quizais pesou a presión de ser un dos equipos a bater, especialmente na casa?

FC: A xente vai un pouco de acordo cos resultados. Ademais, ao principio fallamos moito en casa (perdemos con Castro e Escairón, empatamos con Monterroso), pero tanto o cadro de xogadores coma min tratamos de aillarnos da presión. Semana tras semana vese que calquera pode gañar a calquera, así que tentamos estar tranquilos. Ao final, a presión é a que cada un se pon, pero sempre tentamos dar o mellor de nós.

FIL: Atréveste a dicir que equipos estarán o ano que vén na Preferente Norte?

FC: Aínda é cedo e a igualdade é máxima. Penso que hai dous meses poderiamos dicir que o Outeiro de Rei era imparable e agora leva unha xeira mala de resultados. Porén, si que é certo que o Escairón ten moitas papeletas para lograr o ascenso, e o Santaballés mostra unha regularidade que lle falta ao resto de conxuntos e que pode ser determinante. Aínda así, queda moita liga e moitos equipos teñen aínda moito que dicir.

FIL: E o ambiente dentro do vestiario, que tal? Mellor co paso das xornadas?

FC: O ambiente é moi bo. A xente dispoñible á hora de adestrar sempre está comprometida e estou contentísimo con iso. Se algún día tiñamos que cambiar a data de adestramento, todo o mundo adaptábase e iso é moi importante. A nivel humano paréceme un vestiario responsable e bo, no que todos tiran polo que peor pode estar en cada momento, así que nese aspecto é inmellorable.

Temos que remar todos xuntos polo noso clube.

FIL: Seguirá Fernando Corredoira no Pol o ano que vén  ou é cedo para mollarse?

FC: Polo momento estou moi contento e moi ilusionado. Veño de ser segundo adestrador en fútbol base e esta é a miña primeira experiencia como primeiro técnico cun grupo sénior, pero desde o primeiro día lles dixen aos meus xogadores que a min o que me move é a paixón polo fútbol e a ilusión. Busco facelo o mellor posible cada semana e estou moi agradecido ao clube pola aposta que fixo o clube por min, así que pola miña parte non vai faltar nin traballo nin ilusión. É cedo tamén para falar do ano que vén, pese a que trato de facer un bo traballo e de que sexa valorado. O primeiro paso é traballar para que as cousas vaian ben, porque se a min me vai ben aos xogadores tamén e viceversa, e ao final o principal beneficiario é o clube, que é polo que todos remamos. O que pase no futuro, polo demais, non depende de min.

Desde Futbolinlugo desexamos a Fernando e ao Pol unha segunda volta chea de éxitos, máis que merecidos por unha afección e un concello entregados ao deporte local e á súa fomentación.

Luca´s Grill
Moreno´s Pizza
Imagen por defecto
Santi Real

De campo en campo. Maniaco do fútbol. En formación continua, aprendendo cada día.

Artículos: 525

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.